Nzaikulu 2 - Le Nouveau Testament en Kikwango 1950

Nkanda kwa dibundu ya Efeso

¹ Sonika kwa wanjo ya dibundu mu Efeso: Mambu yai tubaka yandi ya simbaka bambwetete nsambwadi mu diboko kibakala ya yandi, yandi ya tambula nakati ya bilundilu ya wola ya minda. Nzai. 1:13, 16, 20

² Mono zaba bifu ya nge ye kisalu ya nge ye mvibudulu ya nge, nge lenda ve kuvibidila bankwa mbi, ye nge mekaka bau ya dibinga bantumwa, kansi bau ikele yo ve, nge monaka bau bankwa luvunu. 2 Kol. 11:13; 1 Tes. 1:3; 1 Yoa. 4:1

³ Nge ikele na mvibidulu ye vibidilaka sambu na nkumbu ya mono, ye nge lembwaka ve.

⁴ Kansi mono ikele na nge mambu, sambu na nge bikaka zola ya nge ya ntete.

⁵ Buna, bambuka sika ya nge kubwaka, ye pindula mabanza ye sala bisalu ya ntete, keti mono takwiza kwa nge ye katula kilundilu ya nge ya mwinda na sika na yo, kana nge pindula ve.

⁶ Kansi yai ikele na nge, nge ikele na makasi na bisalu ya bantu ya Nikolau, ya mono mpe ikele kuwa makasi.

⁷ Yandi ya ikele na makutu, bika yandi kuwa ya Mpeve tuba kwa mabundu. Kwa yandi ya nunga, mono tapesa kudia na nti ya moyo ya ikele mu Paladiso ya Nzambi. 1 Mose 2:9; Nzai. 22:2

Nkanda kwa dibundu ya Smilina

⁸ Sonika kwa wanjo ya dibundu mu Smilina: Mambu yai tubaka yandi ya ikele ya ntete ye ya nsuka yandi ya kufwaka ye ikele na moyo diaka. Yes. 44:6; Nzai. 1:17

⁹ Mono zaba mpasi ya nge ye kinsukami ya nge, kansi nge ikele mvwama, ye mono zaba mafingu ya bau ya tuba bau ikele baYuda, kansi bau ikele ve, kansi bau ikele nzo ya sambilu ya Satana. Yoa. 8:39, 44; Lom. 2:28; 2 Kol. 6:10; 8:9

¹⁰ Tita ve mambu ya mpasi ya takwiza kwa nge. Tala, diable talosa bankaka ya beno mu boloko, na beno lenda kuyunswa, beno tamona mpasi bilumbu kumi. Vanda kwikama ti lufwa ye mono tapesa nge koloa ya moyo. Dan. 1:12, 14; 1 Kol. 9:25; 2 Tim. 4:7; Yak. 1:12

¹¹ Yandi ya ikele na makutu, bika yandi kuwa mambu ya Mpeve tuba kwa mabundu. Yandi ya nunga tamoniswa mpasi ve ya lufwa ya zole. Nzai. 20:6

Nkanda kwa dibundu mu Pelengamo

¹² Sonika kwa wanjo ya dibundu mu Pelengamo: Mambu yai tubaka yandi ya ikele na mbele ya mvita ya makasi ndambu zole. Nzai. 1:16

¹³ Mono zaba sika ya nge ikele kuvanda, kuna ikele kiti ya Satana. Nge ikele kusimba nkumbu ya mono ngolo, ye nge buyaka ve lukwikilu ya mono, mu bilumbu ya Antipa, ntemo ya mono ya kwikama, ya kufwaka nakati na beno, sika ya Satana ikele kuvanda.

¹⁴ Kansi mono ikele na nge mambu, kadi nge ikele na bankaka ya simba malongi ya Balami, ya longaka Balaki kutula kibwisilu nantwala ya bana ya Isaeli, kudia bima ya yokwa ku biteki ye kusala bizumba. 4 Mose 31:16; 25:1

¹⁵ Buna nge mpe ikele na bankaka ya simba malongi ya bankwa Nikolau mpilamosi. Nzai. 2:6

¹⁶ Buna pindula mabanza, keti mono takwiza nswalu kwa nge ye kunwanina bau na mbele ya munoko ya mono. Nzai. 2:5; 3:3

¹⁷ Yandi ya ikele na makutu, bika yandi kuwa mambu ya Mpeve tuba kwa mabundu. Kwa yandi ya nunga, mono tapesa mana ya swekwa, mono tapesa yandi ditadi ya mpembe ya sonama nkumbu yampa ya muntu zaba ve, kansi yandi kaka ya baka yo.

Nkanda kwa dibundu ya Tiatila

¹⁸ Sonika kwa wanjo ya dibundu mu Tiatila: Mambu yai tubaka Mwana ya Nzambi, meso ya yandi ikele bonso nlemo ya tiya, ye makulu ya yandi bonso mitaku.

¹⁹ Mono zaba bisalu ya nge ye zola ya nge ye lukwikilu ya nge ye nsadulu ya nge ye mvibudulu ya nge, ye bisalu ya nge ya nsuka luta yina ya ntete. Eb. 4:10; Nzai. 2:2

²⁰ Kansi mono ikele na nge mambu, na nge ndima nkento yina Isabeli ya dibinga mbikudi, yandi ikele kulonga ye kuvengumuna basielo ya mono, na bau sala bizumba ye kudia bima ya yokwa ku biteki. 1 Nt. 16:31; 2 Nt. 9:22; Bis. 15:20; 1 Kol. 10:19

²¹ Mono pesaka yandi ntangu na yandi tapindula mabanza, kansi yandi zolaka ve kupindula mabanza tuka bizumba ya yandi.

²² Tala, mono talosa yandi mu fulu ya bela ye bau ya salaka bizumba na yandi mu mpasi ya nene, kana bau pindula mabanza ve tuka bisalu ya yandi. Nzai. 17:2; 18:9

²³ Mono takufwa bana ya yandi na lufwa, ye mabundu yonso tazaba mono ikele yandi ya meka mabanza ye mintima, ye mono tapesa beno muntu na muntu bonso bisalu ya beno. Nk. 7:9; Yel. 11:20; Lom. 2:6

²⁴ Kansi mono tuba kwa beno yankaka mu Tiatila, ya ikele na malongi yai ve, ya zaba ve mambu ya mudindu ya Satana, bonso bau ikele kutuba: Mono tula beno kizitu yankaka ve.

²⁵ Kansi mambu ya ikele na beno, simba yau ngolo ti mono kwiza. Nzai. 3:11

²⁶ Yandi ya nunga ye lunda bisalu ya mono ti nsuka, kwa yandi mono tapesa ngolo va zulu ya bapaien. Nk. 2:8; Nzai. 3:21

²⁷ Yandi tayala bau na nkawa ya kisengu, bonso wumbwa ya muwumbi ikele kupasula mu bitini, bonso mono mpe bakaka na Tata ya mono. Nk. 12:5; Nzai. 2:9

²⁸ Mono tapesa yandi mbwetete ya suka.

²⁹ Yandi ya ikele na makutu, bika yandi kuwa mambu ya Mpeve tuba kwa mabundu.