Nzaikulu 19 - Le Nouveau Testament en Kikwango 1950

Yoane kuwaka nkunga ya nkembo mu zulu

¹ Nanima na mambu yai mono kuwaka ndinga bonso ya kibuka ya nene mu zulu, kutuba: Aleluya: Mpulusu ye nkembo ye ngolo ikele ya Nzambi ya beto. Nzai. 7:10; 12:10

² Kadi mfundusu ya yandi ikele ya kieleka ye lunungu, kadi yandi fundisaka nkwa bizumba ya nene, ya bivisaka ntoto na bizumba ya yandi, ye yandi imene kuvutula ndinda kwa yandi sambu na menga ya basielo ya yandi. 5 Mose 32:43; Yel. 51:25; Nzai. 6:10; 15:3; 16:7; 18:20

³ Mbala ya zole bau tuba: Aleluya! Midinga ya yandi ikele kutomboka mvu ya mvu. Yes. 34:10; Nzai. 18:9

⁴ Bambuta makumi zole ye iya ye bisemwa iya ya moyo fukamaka ye sambilaka Nzambi ya ikele kuvanda va kiti ya nkembo, kutuba: Amen, Aleluya! Nk. 106:1, 20; Nzai. 4:4; 5:14

⁵ Ndinga basikaka tuka kiti ya nkembo, kutuba: Kembila Nzambi ya beto, beno basielo ya yandi yonso ya ikele kuvumina yandi, ya fioti ye ya nene. Nk. 115:13; 134:1; 135:1, 20

⁶ Mono kuwaka ndinga bonso ya kibuka ya nene, ye bonso ndinga ya bamasa mingi ye bonso ndinga ya mbandanu ya ngolo, kutuba: Aleluya! Kadi Mfumu, Nzambi ya beto, Nkwa Ngolo ikele Ntinu. Yeh. 1:24; Nzai. 11:15; 14:2

⁷ Bika beto yangalala ye vanda na kiese mingi, beto pesa yandi nkembo, kadi makwela ya Mwana Dimeme imene kwiza; nkento ya yandi imene kuyidikwa. Nk. 118:24

⁸ Yandi peswaka kuvwata lele ya lino ya mbote ya kienzima ya mpembe, kadi lele ya lino ya mbote ikele bisalu ya lunungu ya banlongo. Nzai. 12:14; 15:6

Wanjo songa Yoane kusonika

⁹ Yandi tubaka kwa mono: Sonika: Kiese ikele na bau ya bingwa ku fete ya makwela ya Mwana Dimeme. Yandi tubaka kwa mono: Yai ikele mambu ya kieleka ya Nzambi. Nzai. 14:13; 20:6; 21:5; 22:6

¹⁰ Mono fukamaka nantwala ya yandi ye sambilaka yandi. Yandi tubaka kwa mono: Tala, sala mpilayai ve. Mono ikele sielo sikamosi na nge ye na bampangi ya nge ya simba kitemo ya Yesu, sambila Nzambi. Kadi kitemo ya Yesu ikele mpeve ya mbikudulu. Nzai. 2:17; 22:8

Yoane monaka ntinu ya bantinu mu zulu ye kibuka ya basoldat kwenda kunwana

¹¹ Mono monaka zulu kanguka, tala, kavalu ya mpembe ye yandi ya vandaka va yo bingwaka ya Kwikama ye ya Kieleka, mu lunungu yandi ikele kufundisa ya kunwana mvita. Nzai. 6:2

¹² Meso ya yandi vandaka bonso nlemo ya tiya, va ntu ya yandi vandaka koloa mingi ya kimfumu, yandi vandaka na nkumbu ya sonama ya muntu zaba ve, kansi yandi kibeni kaka. Nzai. 12:3; 2:17

¹³ Yandi vwataka mvwatu ya lembwa na menga, nkumbu ya yandi bingwa Mambu ya Nzambi. Yes. 63:1

¹⁴ Bibuka ya basoldat ya zulu landaka nanima na yandi va bakavalu ya mpembe, bau vwataka lele ya lino ya mbote, ya mpembe ye vedila. Nzai. 4:4; 19:8

¹⁵ Na munoko ya yandi basikaka mbele ya makasi, na yo yandi tabula makanda ya bantu. Yandi tayala bau na nkawa ya bisengu, yandi tadiata kamunu ya vinia ya makasi ya ngolo ya Nzambi, Nkwa Ngolo. Nk. 2:9; Yes. 63:3; Nzai. 1:16; 2:12, 27; 12:5; 14:19; 16:19

¹⁶ Va mvwatu ya yandi ye va luketo ya yandi, ikele nkumbu ya sonama: Ntinu ya bantinu, ye Mfumu ya bamfumu. Nzai. 17:14

Mbizi ye mbikudi ya luvunu ye bau ya loswa mu zanga ya tiya

¹⁷ Mono monaka wanjo telema mu ntangu, yandi bokaka na ndinga ya ngolo, kutuba kwa bandeke yonso ya tilumuka nakati na zulu: Kwiza kutakana sikamosi ku fete ya nene ya Nzambi, Yeh. 39:4, 17

¹⁸ na beno lenda kudia nsuni ya bantinu ye nsuni ya bakuluntu ya basoldat ye nsuni ya bankwa ngolo ye nsuni ya bakavalu, ye ya bau ya ikele kuvanda va yau, ye nsuni ya bampwanza yonso, ye ba mpika, ya fioti ye ya nene, Yes. 49:26; Yeh. 39:18, 20

¹⁹ Mono monaka mbizi ye bantinu ya ntoto ye bibuka ya basoldat ya bau kutakana sikamosi kunwana mvita na yandi ya vanda va kavalu ye kibuka ya basoldat ya yandi. Nzai. 13:1; 16:14; 17:12

²⁰ Mbizi bakwaka sikamosi na mbikudi ya luvunu ya salaka bidimbu nantwala na yandi, mu yai yandi kusaka bau ya bakaka kidimbu ya mbizi, ye bau ya sambilaka kifwanusu ya yandi. Bau zole loswaka mu zanga ya tiya ya ikele kulema na solofo. Yes. 30:33; Dan. 7:11; Nzai. 16:13; 20:10

²¹ Bau ya bikaka kufwaka na mbele ya yandi ya vandaka va kavalu, mbele ya basikaka na munoko ya yandi; bandeke yonso yukutaka na nsuni ya bau.