Nzaikulu 17 - Le Nouveau Testament en Kikwango 1950

Nkwa bizumba ye mbizi

¹ Mosi ya banjo nsambwadi ya vandaka na malonga nsambwadi kwizaka kutuba kwa mono: Kwiza awa, mono tasonga nge mfundusu ya nkwa bizumba ya nene ya ikele kuvanda va bamasa mingi. Yel. 51:13; Nzai. 15:1; 21:9

² Bantinu ya ntoto imene kusala bizumba na yandi, bau ya vandaka va ntoto imene kukolwa na vinia ya bizumba ya yandi. Yel. 51:7; Nah 3:4; Nzai. 18:9

³ Yandi nataka mono mu mpeve mu nsi ya mpamba; mono monaka nkento kuvanda va mbizi ya mbwaki, ya ikele kufuluka na bankumbu ya kutubambi, yo vandaka na ba-ntu nsambwadi ye na bampoka kumi. Yes. 21:1; Nzai. 13:1; 21:10

⁴ Nkento vwatiswaka mvwatu ya mpumbu ye mbwaki, ye vwatiswaka wola ye matadi ya ntalu ye matadi nzimbu, mu diboko ya yandi vandaka kopo ya wola ya fuluka na masumu ye mambu ya sumuka ya bizumba ya yandi. Yel. 51:7; Yeh. 28:13; Nzai. 18:16

⁵ Na mbunzu ya yandi ikele kusonikwa nkumbu, mambu ya kinsweki: Babeli ya nene, ngudi ya bankwa bizumba ye masumu yonso ya ntoto. Dan. 4:30; Nzai. 14:8

⁶ Mono monaka nkento yina kolwa na menga ya banlongo, ye menga ya bantemo ya Yesu, mono yituka na nyitukulu ya nene, bu mono monaka yandi. Nzai. 18:24

⁷ Wanjo tubaka kwa mono: Sambu ya nki nge ikele kuyituka ? Mono tasonga nge mambu ya kinsweki ya nkento, ye ya mbizi ya ikele kunata yandi, yandi ya ikele na bantu nsambwadi ye bampoka kumi.

⁸ Mbizi ya nge monaka, vandaka ntete, ye ikele ve, ye tabasika na dibulu ya konda nsuka ye kwenda ku mbungulu. Bantu ya vandaka na ntoto, na nkumbu ya bau konda kusonika mu nkanda ya moyo tuka lufulu ya nsi, bau tayituka bu bau mona mbizi ya vandaka, ye ikele ve, ye takwiza.

⁹ Awa ikele mabanza ya ikele na ngangu. Bantu nsambwadi ikele miongo nsambwadi, va yau nkento ikele kuvanda,

¹⁰ Bau ikele bantinu nsambwadi, tanu imene kubwa, mosi ikele, yankaka imene kwiza ve; bu yandi takwiza, yandi fwiti kuvanda ntangu ndambu.

¹¹ Mbizi yina ya vandaka ye ikele ve, yandi kibeni ikele ya nana, ye basika na bantinu nsambwadi ye takwenda mu mbungulu.

¹² Ye bampoka kumi ya nge monaka ikele bantinu kumi ya bakaka kimfumu ntete ve; kansi bau tabaka ngolo bonso bantinu sikamosi na mbizi mu lokula mosi.

¹³ Bau ikele na mabanza mosi, bau ikele kupesa ngolo ya bau ye luyalu kwa mbizi yina.

Kununga ya Mwana Dimeme

¹⁴ Bau tanwana na Mwana Dimeme, ye Mwana Dimeme taluta bau ngolo, kadi yandi ikele Mfumu ya bamfumu ye Ntinu ya bantinu ye bau mpe ya ikele sikamosi na yandi tanunga mpe, bau ya ikele bingwa ye solwa ye kwikama. 5 Mose 10:17; 1 Tim. 6:16; Nzai. 19:16

¹⁵ Yandi tubaka kwa mono: Bamasa ya nge monaka sika ya nkwa bizumba ikele kuvanda, ikele bantu, ye bibuka ye ba-nsi ya bantu ye bandinga. Yes. 8:7; Yel. 47:2

¹⁶ Ye bampoka kumi ya nge monaka ye mbizi, bau tavanda na makasi na nkwa bizumba ye bau tabika yandi mpamba ye kinkonga ye bau takudia nsuni ya yandi ye yoka yandi na tiya. Nzai. 18:8

¹⁷ Kadi Nzambi tulaka mu ntima ya bau kusala makani ya yandi ye kuvanda na mabanza mosi ye kupesa kimfumu ya bau kwa mbizi, ti mambu ya Nzambi tamaniswa.

¹⁸ Nkento ya nge monaka ikele mbanza ya nene, ikele yina ya yala va bantinu ya ntoto. Nzai. 14:8; 16:19