Nzaikulu 16 - Le Nouveau Testament en Kikwango 1950

Malonga nsambwadi ya makasi tiamunwa

¹ Mono kuwaka ndinga ya nene basika na tempelo, kutuba kwa banjo yina nsambwadi: Beno kwenda kutiamuna malonga nsambwadi ya makasi ya Nzambi va ntoto. Nzai. 15:5

² Ya ntete kwendaka kutiamuna dilonga ya yandi va ntoto, yo kituka bamputa ya mpasi ye mbi va bantu yonso ya ikele na kidimbu ya mbizi, ye bau ya sambilaka kifwanusu ya yandi. 2 Mose 9:9; Nzai. 13:17

³ Ya zole tiamunaka dilonga ya yandi mu mbu, yo kituka menga bonso ya muntu ya kufwa; bima yonso ya ikele na moyo mu masa kufwaka. 2 Mose 7:17; Nzai. 8:8

⁴ Ya tatu tiamunaka dilonga ya yandi mu banzadi ye mu banto ya masa; yo kituka menga. 2 Mose 7:19

⁵ Mono kuwaka wanjo ya bamasa kutuba: Nge ikele ya lunungu, nge ya ikele ye ya vandaka, Nge Nkwa Nlongo, sambu na nge fundisa mpilayai. Nzai. 6:16; 11:6

⁶ Kadi bau tiamunaka menga ya banlongo ye bambikudi, nge mpe pesaka bau menga kunwa; yai lunga na bau. Nk. 79:2; Nzai. 18:24

⁷ Mono kuwaka zikwa kutuba: E, Mfumu, Nkwa Ngolo, mfundusu ya nge ikele ya kieleka ye ya lunungu. Nk. 19:9; Amosi. 4:13; Nzai. 4:11; 6:9; 15:3; 19:2

⁸ Wanjo ya iya tiamunuka dilonga ya yandi va ntangu; yo peswa kuyoka bantu na tiya.

⁹ Bantu yokwaka na tiya ya ngolo, bau tuba mbi sambu na nkumbu ya Nzambi, yandi ya ikele na ngolo va zulu ya bampasi yina, ye bau pindulaka mabanza ve kupesa yandi nkembo. Nzai. 9:20; 13:6

¹⁰ Wanjo ya tanu tiamunaka dilonga ya yandi va kiti ya mbizi; kimfumu ya yandi kwizaka tombe, bau kudiaka tudimi ya bau sambu na mpasi. 2 Mose 10:22; Yes. 8:22; Nzai. 13:2

¹¹ Bau tubaka mbi sambu na Nzambi ya zulu sambu na mpasi ya bau ye bamputa ya bau, bau pindulaka mabanza ya bau ye tuka bisalu ya bau ya mbi. Nzai. 2:21

¹² Wanjo ya sambanu tiamunaka dilonga ya yandi va nzadi ya nene ya Eufalata, masa ya yo yumaka na nzila lenda kuyidikwa sambu na bantinu, ya ikele kwiza tuka ntangu ikele kubasika. Yos. 3:13; Yes. 11:15; 51:10; Nzai. 9:14

¹³ Mono monaka bampeve tatu ya sumuka bonso makoto basika na munoko ya dalaka ye na munoko ya mbizi ye na munoko ya mbikudi ya luvunu. 2 Mose 8:6; Nzai. 12:9; 13:1

¹⁴ Kadi bau ikele mpeve ya bampeve mbi ya ikele kusala bidimbu, bau ikele kwenda kwa bantinu ya nsi yamvimba ye kutikisa bau ku mvita ya kilumbu ya nene ya Nzambi, Nkwa Ngolo. 1 Nt. 22:21; Nzai. 13:13

¹⁵ Tala, mono kwiza bonso mwivi. Kiese ikele na yandi ya tomatala ye keba mvwatu ya yandi, na yandi lenda kutambula kinkonga ve, ye bau tamona nsoni ya yandi ve. Luk. 12:35; 2 Kol. 5:3; Nzai. 3:3

¹⁶ Bau kutikisaka bau na sika ya bingwa mu ndinga ya kiEbeleo Halamangedo. Mfund. 5:19; 2 Lus. 35:22; Zak. 12:11

¹⁷ Ye wanjo ya nsambwadi tiamunaka dilonga ya yandi va mupepe, ndinga ya nene basikaka mu tempelo tuka kiti ya nkembo, kutuba: Yo imene kusalwa. Nzai. 15:5; 21:6

¹⁸ Kuna vandaka banzazi ye bandinga ye bambandanu, ye ndikunu ya ngolo ya ntoto, bonso imene kuvanda ntete ve tuka nsemono ya bantu va ntoto, ndikunu ya nene ye ya ngolo. Dan. 12:1; Nzai. 4:5; 11:9

¹⁹ Mbanza yina ya nene kabanaka mu ndambu tatu, bambanza yonso ya bansi ya bantu kubwaka; Nzambi bambukaka Babeli ya nene, kupesa yandi kopo ya vinia ya ngolo ya makasi ya yandi. Yes. 30:25; 51:22; Nzai. 14:8, 10; 17:5; 18:5

²⁰ Basanga yonso tinaka, miongo monikaka diaka ve. Nzai. 6:14; 20:11

²¹ Mvula ya nene ya matadi, mosimosi kizitu ya kilo makumi tanu, kubwaka va bantu tuka zulu; bantu tubaka mbi sambu na Nzambi sambu na mpasi ya mvula ya matadi, sambu na mpasi yina lutaka nene. 2 Mose 9:18; Nzai. 11:19