Nzaikulu 15 - Le Nouveau Testament en Kikwango 1950

Yoane monaka bau ya imene kuvuluswa, ye yandi kuwaka nkunga ya bau

¹ Mono monaka kidimbu yankaka mu zulu, ya nene ye ya nyitukulu; banjo nsambwadi vandaka na bampasi nsambwadi ya nsuka, kadi mu yau makasi ya Nzambi maniswa. 3 Mose 26:21; Nzai. 12:1, 3; 17:1

² Mono monaka bonso mbu ya talatala kuvuka na tiya; mono monaka bau ya bedisaka mbizi yina ye kifwanusu ya yandi ye ntalu ya nkumbu ya yandi bau telemaka mfinama na mbu ya talatala, bau vandaka na bansambi ya Nzambi. Nzai. 4:6; 5:8; 12:11; 13:15, 18

³ Ye bau yimbaka nkunga ya Mose, sielo ya Nzambi, ye nkunga ya Mwana Dimeme, kutuba: Mfumu Nzambi, Nkwa Ngolo, bisalu ya nge ikele ya nene ye ya nyitukulu, nge ikele ntinu ya makanda ya bantu, nzila ya nge ikele ya lunungu ye ya kieleka. 2 Mose 5:9; 16:7; Nk. 111:2; 139:14; 145:17; Amosi. 4:13; Nzai. 5:9; 16:7

⁴ Nani tatita ve, O Mfumu ye kembila nkumbu ya nge ? Kadi nge kaka ikele yanlongo kadi ba-nsi yonso ya ntoto takwiza kusambila nantwala ya nge, kadi mfundusu ya nge ya lunungu imene kuzabakana. Nk. 86:9; Yel. 10:7

Yandi monaka banjo nsambwadi ye malonga nsambwadi ya makasi

⁵ Nanima na mambu yai mono monaka tempelo ya nzo ya lele ya kitemo mu zulu kangulwa.

⁶ Banjo nsambwadi basikaka na tempelo, bau vandaka na bampasi nsambwadi, ye bau vwataka lele ya lino ya vedila ya kienzima ye mikaba ya wola kangwa va ntulu ya bau. Yeh. 9:2; Nzai. 1:13; 19:8

⁷ Mosi ya bambizi iya ya moyo pesaka banjo nsambwadi malonga nsambwadi ya wola, ya fuluka na makasi ya Nzambi ya ikele na moyo mvu ya mvu. Yeh. 22:31; Nzai. 4:6

⁸ Tempelo fulukaka na midinga ya nkembo ya Nzambi ye ya ngolo ya yandi; muntu lendaka ve kukota mu tempelo; ti bampasi nsambwadi ya banjo nsambwadi tamaniswa. 2 Mose 40:34; Yes. 6:4; Yeh. 10:4