Nzaikulu 14 - Le Nouveau Testament en Kikwango 1950

Yoane monaka Mwana Dimene va mongo ya Sioni

¹ Mono monaka ye tala, Mwana Dimeme telema va mongo ya Sioni ye bantu mafunda nkama mosi ye makumi iya ye iya kutelema sikamosi na yandi, ikele na nkumbu ya yandi ye nkumbu ya Tata ya yandi sonikwa va mbunzu ya bau. Nzai. 5:6

² Mono kuwaka ndinga tuka zulu bonso ndinga ya bamasa mingi, bonso ndinga ya mbandanu ya ngolo, ye ndinga ya mono kuwaka vandaka bonso ndinga ya babudi va bansambi ya bau. Nzai. 1:15; 19:6

³ Bau yimbaka nkunga yampa nantwala na kiti ya nkembo, ye nantwala na bambizi iya ya moyo ye bambuta; muntu lenda ve kulonguka nkunga yina, kansi bayina mafunda nkama mosi ye makumi iya ye iya ya sumbwaka tuko ntoto. Nk. 33:3; 96:1; Nzai. 5:9

⁴ Ikele bau ya konda kusumunwa na bankento, kadi bau ikele bandumba, ikele bau ya landa Mwana Dimeme konsosika ya yandi kwenda. Ikele bau ya sumbwaka nakati na bantu kuvanda mabundu ya ntete kwa Nzambi ye kwa Mwana Dimeme.

⁵ Mu munoko ya bau monikaka luvunu ve, bau konda kieta. Nk. 32:2; Sef. 3:13; Mal. 2:6; 5:2, 7

Yoane monaka banjo tatu kusonga mambu ya mfundusu

⁶ Mono monaka wanjo yankaka kutilumuka nakati zulu, ya ikele na nsamu mbote ya mvu ya mvu, kusamuna kwa bau ya vandaka va ntoto, ye kwa ba-nsi ya bantu, ye makanda, ye bandinga ye bantu. 1 Pet. 1:25; Nzai. 8:13; 19:7

⁷ Yandi tubaka mu ndinga ya nene: Vumina Nzambi ye pesa yandi nkembo, kadi lokula ya mfudusu ya yandi imene kwiza, ye sambila yandi ya salaka zulu ye ntoto ye mbu ye banto ya masa. 5 Mose 32:3; Nk. 146:6; Bis. 4:24; 14:15; Nzai. 10:6; 15:4

⁸ Wanjo yankaka ya zole landaka kutuba: Babeli ya nene imene kubwa, imene kubwa, yandi ya pesaka bantu yonso va ntoto kunwa vinia ya makasi ya bizumba ya yandi. Yes. 21:9; Yel. 51:7; Dan. 4:30; Nzai. 18:2

⁹ Wanjo yankaka ya tatu landaka bau, kutuba na ndinga ya nene: Kana muntu ikele kusambila mbizi ye kifwanusu ya yandi, ye baka kidimbu ya yandi va mbunzu ya yandi keti va diboko ya yandi, Nzai. 13:12, 15

¹⁰ buna yandi mpe takunwa vinia ya makasi ya Nzambi, ya yidikwa, ya konda kuvuka, mu kopo ya makasi ya yandi; yandi tamoniswa mpasi na tiya ye solofo nantwala ya banjo yanlongo ye nantwala ya Mwana Dimeme. Nk. 75:8; Yes. 51:17, 21; Yel. 25:15; Nzai. 16:9

¹¹ Midinga ya mpasi ya bau ikele kutomboka mvu ya mvu, ye bau ikele na luvundu ve ntangu ye mpimpa, bau ya sambila mbizi ye kifwanusu ya yandi ye konsonani ya baka kidimbu ya nkumbu ya yandi. Yes. 34:9

¹² Awa ikele mvibudulu ya banlongo, bau ya lunda bansikudukusu ya Nzambi ye lukwikilu ya Yesu. Eb. 4:10; Nzai. 19:9

¹³ Mono kuwaka ndinga tuka zulu, kutuba: Sonika. Tuka ntangu yai nsakumunu kwa bafwa, ya kufwaka mu Mfumu. E, Mpeve tubaka, bau tavundisa tuka bisalu ya bau, kadi bisalu ya bau ikele kulanda bau. Eb. 4:10; Nzai. 19:9

Yoani mona Mwana ya muntu ye banjo tatu

¹⁴ Mono monaka ye tala, dituti ya mpembe, va dituti vandaka mosi bonso Mwana ya muntu, yandi vandaka na koloa ya wola va ntu ya yandi ye mu diboko ya yandi kizengilu ya makasi. Nk. 21:4; Yeh. 1:26; Dan. 7:13; Nzai. 1:13

¹⁵ Wanjo yankaka basikaka na tempelo, kuboka mu ndinga ya nene kwa yandi ya vandaka va dituti: Fidisa kizengilu ya nge ye yonzika, kadi lokula ya ngionzoko imene kwiza, ye bilanga ya ntoto imene kuyela. Yoeli 3:13; Malaki 4:2-5

¹⁶ Yandi ya vandaka va dituti tulaka kizengilu ya yandi va ntoto, ye bilanga ya ntoto yonzikwaka. Mat. 13:39

¹⁷ Wanjo yankaka basikaka na tempelo ya ikele mu zulu, yandi mpe vandaka na kizengilu ya makasi. Nzai. 15:5

¹⁸ Wanjo yankaka basika na zikwa, yandi lutaka tiya ngolo, yandi bingaka mu ndinga ya nene kwa yandi ya vandaka na kizengilu ya makasi, kutuba: Fidisa kizengilu ya nge ya makasi, kutikisa mabundu ya vinia ya ntoto kadi mabundu na yau imene kuyela. Yel. 2:21; Nzai. 8:3

¹⁹ Wanjo tulaka kizengilu ya yandi va ntoto ye kutikisaka mabundu ya vinia ya ntoto, ye losaka yau mu kamunu ya nene ya makasi ya Nzambi. Yes. 63:3; Yoeli 3:13; Nzai. 19:15

²⁰ Kamunu diatwaka nanganda ya mbanza, menga basikaka tuka kamunu, ya kuma ti mukaba ya munoko ya bakavalu kitezo ya kilometela nkama tatu ye makumi zole. Yes. 63:2