Nzaikulu 13 - Le Nouveau Testament en Kikwango 1950

Yoane monaka mbizi ya tomboka tuka mbu

¹ Mono monaka mbizi katuka na mbu ya ikele na bampoka kumi ye ba-ntu nsambwadi ye va bampoka ya yandi ikele na bakoloa kumi ya kimfumu ye va ba-ntu ya yandi bankumbu ya kutuba mbi. Dan. 7:3, 7, 19; Nzai. 11:7; 12:3; 17:3, 8

² Mbizi ya mono monaka vandaka bonso nkoi, makulu ya yandi vandaka bonso makulu ya ulusu, munoko ya yandi bonso munoko ya nkosi, dalaka pesa yandi ngolo ya yandi ye kiti ya nkembo ye luyalu nene. Dan. 7:4; Hos. 13:7

³ Mono monaka ntu mosi ya yandi bonso yo bulwa ti lufwa, mputa ya yandi ya bulwaka ya lufwa belukaka, ye bantu yonso ya nsi yitukaka ye landaka mbizi. Nzai. 17:8

⁴ Bau sambilaka dalaka sambu na yandi pesaka ngolo ya yandi kwa mbizi, bau sambilaka mbizi, kutuba: Nani ikele mpilamosi mbizi yai, nani lenda kunwana na yandi ? Nzai. 18:18

⁵ Yandi peswa munoko kutuba mambu ya nene ye kutuba mbi, yandi peswa ngolo kuyala ngonda makumi iya ye zole. Dan. 7:8, 11, 25; Nzai. 11:2

⁶ Yandi kangulaka munoko ya yandi sambu na kutuba mbi sambu na Nzambi ye kutuba mbi sambu na nkumbu ya yandi ye nzo ya yandi ye bau ya vandaka mu zulu. Nzai. 16:9; 21:3

⁷ Yandi peswaka ngolo kunwana na banlongo ye kuluta bau ngolo; yandi peswa ngolo va zulu ya makanda yonso ye bandinga ye bansi ya bantu. Dan. 7:21; Nzai. 11:7; 14:6

⁸ Bau yonso ya vanda va ntoto tasambila yandi, ye konso muntu ya nkumbu ya yandi ikele kusonama ve tuka ni lufulu ya nsi mu nkanda ya moyo ya Mwana Dimeme ya bau kufwaka. Dan. 12:1; Nzai. 5:12; 17:8; 20:15

⁹ Kana muntu ikele na makutu, bika yandi kuwa. Nzai. 2:7

¹⁰ Kana muntu zola kimpika, yandi takangwa mu kimpika mpe, kana muntu takufwa na mbele, yandi takufwa na mbele mpe. Awa ikele mvibudulu ye lukwikilu ya banlongo. 1 Mose 9:6; Yel. 15:2; Mat. 26:52; Nzai. 14:12

Nanima yandi monaka mbizi yankaka basika na ntoto

¹¹ Mono monaka mbizi yankaka basika na ntoto, yandi vandaka na mpoka zole mpilamosi ya mwana dimeme, yandi tubaka bonso dalaka.

¹² Yandi sadilaka ngolo yonso ya mbizi ya ntete nantwala ya yandi. Yandi salaka ntoto ye bau ya ikele kuvanda muna kusambila mbizi ya ntete ya belulaka na kubulwa ya yandi ya lufwa. Nzai. 13:3, 4, 7

¹³ Yandi salaka bidimbu ya nene ye yandi mpe kulumusa tiya tuka zulu va ntoto nantwala ya bantu. Mat. 24:24; 2 Tes. 2:9; Nzai. 16:14

¹⁴ Ye yandi kusaka bau ya vandaka va ntoto sambu na bidimbu ya yandi peswaka kusala nantwala ya mbizi, ye kutuba kwa bau ya vandaka va ntoto na bau tasala kifwanusu sambu na mbizi ya lwadiswa na mbele ye ikele na moyo. 2 Tes. 2:11; Nzai. 13:3

¹⁵ Yandi peswa kupesa moyo kwa kifwanusu ya mbizi, na kifwanusu ya mbizi tatuba, ye yonso ya konda kusambila kiteki ya mbizi takufwa. Dan. 3:5; Nzai. 14:9

¹⁶ Yandi salaka bantu yonso ya fioti ye ya nene, bamvwama ye bansukami ye bampwanza ye bampika. Yandi kupesaka bau kidimbu na diboko kibakala keti na mbunzu ya bau. Nzai. 14:9, 11; 19:20

¹⁷ Na muntu lenda ve kusumba keti kuteka kana yandi ikele na kidimbu yina ve, yo ikele nkumbu ya mbizi yina keti ntalu ya nkumbu ya yandi. Nzai. 14:11; 15:2

¹⁸ Awa ikele ngangu, yandi ya ikele na ngangu, bika yandi tanga ntalu ya mbizi, kadi yo ikele ntalu ya muntu, ntalu ya yandi ikele: nkama sambanu ye makumi sambanu ye sambanu.