Nzaikulu 12 - Le Nouveau Testament en Kikwango 1950

Mona-meso ya Yoane, nkento, ye dalaka

¹ Kidimbu ya nene monikaka mu zulu, nkento ya vwata ntangu, ngonda vandaka nansi ya makulu ya yandi, va ntu ya yandi vandaka koloa ya bambwetete kumi ye zole.

² Yandi vandaka na kivumu, ye yandi bokaka ye vandaka na nsongo ye mpasi ye kubuta. Yes. 26:17

³ Kidimbu yankaka monikaka mu zulu, tala, dalaka ya nene ya mbwaki ya vandaka na ba-ntu nsambwadi ye bampoka kumi ye va ba-ntu ya yandi bakoloa nsambwadi ya kimfumu.

⁴ Mukila ya yandi bendaka mosi ya tatu ya bambwetete ya zulu, yandi losaka yau va ntoto. Dalaka telemaka nantwala ya nkento ya vanda mfinama kubuta, na yandi lenda kumina mwana ya yandi, bu yandi buta. Yes. 14:12; Dan. 8:10

⁵ Yandi butaka mwana, ikele mwana bakala, yandi tayala bantu yonso na nkawa ya bisengu. Mwana ya yandi bakwaka kwa Nzambi ye kwa kiti ya yandi ya nkembo. Nk. 2:9; Nzai. 2:27; 19:15

⁶ Nkento tinaka ku nsi ya mpamba, na sika ya Nzambi yidikaka sambu na yandi, kuna bau pesaka yandi madia bilumbu funda mosi ye nkama zole ye makumi sambanu. Nzai. 11:3

Mvita ya nene nakati Mikaeli ya dalaka

⁷ Mvita vandaka mu zulu: Mikaeli ye banjo ya yandi nwanaka na dalaka; dalaka ye banjo ye yandi nwanaka mpe. Dan. 10:12; 12:1; Yud. 9

⁸ Kansi bau nungaka ve, ye sika monikaka diaka ve mu zulu sambu na bau.

⁹ Dalaka ya nene loswaka na nsi, yandi ikele nioka ya nkulu, ya bingwa diable ye Satana, yandi ikele mukusi ya bantu yonso na nsi, yandi loswaka ku ntoto, ye banjo ya yandi loswaka sikamosi na vandi 1 Mose 3:1, 4; Luk. 10:18; Yoa. 12:31; Nzai. 20:2

¹⁰ Mono kuwaka ndinga ya nene mu zulu kutuba: Ntangu yai mpulusu ye ngolo imene kwiza, ye kimfumu ya Nzambi ya beto, ye ngolo ya Klisto ya yandi imene kwiza, kadi mufundi ya bampangi ya beto imene kuloswa nansi, yandi ya fundaka bau nantwala ya Nzambi ya beto ntangu ye mpimpa. Yobi 1:6; Zak. 3:1; Nzai. 11:15

¹¹ Bau lutaka yandi ngolo sambu na menga ya Mwana Dimeme ye sambu na mambu ya kitemo ya bau, bau zolaka moyo ya bau ve ti lufwa. Nzai. 7:14; 6:9

¹² Sambu na yai yangalala, o mazulu, ye beno yonso ya vanda mu yau. Ndola ku ntoto ye ku mbu, kadi diable ikele kulumuka kwa beno, yandi ikele na makasi mingi, kadi yandi zaba ntangu ya yandi bika fioti.

Dalaka landa nkento ye bana ya yandi

¹³ Bu dalaka monaka yandi imene kuloswa va ntoto, yandi zomaka nkento ya butaka mwana bakala. Nzai. 12:4

¹⁴ Nkento peswaka maveve ya ngo ya zulu ya nene, na yandi lenda kutilumuka ku nsi ya mpamba ku sika ya yandi, kuna yandi tapeswa madia ntangu ye bantangu ye ndambu ya ntangu, tuka na luse ya nioka. 2 Mose 19:4; Yes. 40:31; Dan. 7:25; 12:7

¹⁵ Ye nioka basisaka masa tuka munoko ya yandi nanima na nkento bonso nzadi, na yandi lenda kunatisa yandi na nzadi. Nzai. 17:15

¹⁶ Ntoto sadisaka nkento, ntoto kangulaka munoko ya yo ye minaka nzadi ya dalaka basisaka na munoko ya yandi.

¹⁷ Dalaka bakaka makasi mingi na nkento, yandi kwendaka kunwanisa bankuna ya yandi ya bikaka, bau ya lunda nsikudukusu ya Nzambi ye simba kitemo ya Yesu. Yandi telemaka va zelo ya mbu. 1 Mose 3:15; Nzai. 14:12; 19:10