Nzaikulu 11 - Le Nouveau Testament en Kikwango 1950

Tempelo teswa

¹ Mono peswaka tutu bonso tutu mkawa, mosi tubaka. Telema ye teza tempelo ya Nzambi ye zikwa, ye bau ya ikele kusambila muna.

² Kansi kianzala ya ikele nanganda ya tempelo, bika yo, teza yo ve, kadi yo peswaka kwa bapaien, bau tadiata mbanza yanlongo nansi ya makulu ya bau bangonda makumi iya ye zole.

Bantemo zole bikula, bau kufwa bau, ye bau fulukiswa, ye tomboka ku zulu

³ Mono tapesa ngolo kwa bantemo ya mono zole ye bau tabikula bilumbu funda mosi ye nkama zole ye makumi sambanu, ye vwata ngoto. Nzai. 12:6

⁴ Bayai ikele banti zole ya olive ye bilundilu zole ya minda ya telema nantwala ya Mfumu ya ntoto. Zak. 4:3, 11, 14

⁵ Kana muntu zola kumonisa bau mpasi, tiya tabasika na munoko ya bau ye mina bambeni ya bau; kana muntu zola kumonisa bau mpasi yandi takufwa mutindu yina mpe.

⁶ Bau ikele na ngolo kukanga zulu, na mvula noka ve bilumbu ya mbikudulu ya bau, ye bau ikele na ngolo na zulu na bamasa kukitula yau menga, ye kubula ntoto na bampasi konso ntangu ya bau zola. 2 Mose 7:19; 1 Nt. 17:1; Luk. 4:25; Nzai. 16:3

⁷ Bu bau manisaka kitemo ya bau, mbizi ya basika na dibulu ya konda nsuka tanwana na bau ye bedisa bau ye kufwa bau. Dan. 7:3, 21; Nzai. 13:1, 7; 17:8

⁸ Bamvumbi ya bau talala na balabala ya mbanza ya nene ya bingwa mu kimpeve Sodoma ye Ngipiti, mpe sika yina Mfumu ya bau komwaka va kulunsi.

⁹ Ye tuka makanda ya bantu, ye bandinga, ye bansi ya bantu bau tamona bamvumbi ya bau bilumbu tatu ye ndambu, bau tabuya bamvumbi ya bau kutulwa mu ndiamu.

¹⁰ Bau ya vanda va ntoto tayangalala sambu na bau, ye vanda na kiese, ye fidisana matabisi, sambu na bambikudi yai zole monisaka mpasi kwa bau ya vanda va ntoto. Est. 9:19, 22

¹¹ Nanima na bilumbu tatu ye ndambu, mpeve ya moyo tuka Nzambi kotaka mu bau, ye bau telemaka na makulu ya bau, ye boma mingi bwilaka bau ya monaka bau. Yeh. 37:5, 10

¹² Bau kuwaka ndinga ya nene tuka zulu kutuba kwa bau: Kwiza awa, ye bau kwendaka ku zulu mu dituti, bambeni ya bau monaka bau.

¹³ Na lokula yina vandaka ndikunu ya nene ya ntoto, mosi ya kumi ya mbanza kubwaka, bantu mafunda nsambwadi kufwaka mu ndikunu yina; ya bikaka vandaka na boma mingi ye pesaka nkembo kwa Nzambi ya zulu.

¹⁴ Ndola ya zole imene kuluta; Tala, ndola ya tatu ikele kwiza nswalu.

Wanjo ya nsambwadi bula mpungi

¹⁵ Wanjo ya nsambwadi bulaka mpungi; bandinga ya nene vandaka kutuba mu zulu, ye tubaka: Kimfumu ya nsi imene kwiza, ya Mfumu ya beto ye ya Klisto ya yandi, ye yandi tayala ti mvu ya mvu. Nk. 2:2, 6; Dan. 2:44; 7:27; Nzai. 7:10; 12:10

¹⁶ Ye bambuta makumi zole ye iya ya vanda va bakiti ya nkembo ya bau nantwala ya Nzambi, fukamaka va luse ya bau ye sambilaka Nzambi, kutuba: Nzai. 4:4

¹⁷ Beto pesa matondo kwa nge Mfumu, Nzambi, Nkwa ngolo, ya ikele, ye ya vandaka, kadi nge imene kubaka ngolo ya nge ya nene, ye nge imene kuyala.

¹⁸ Bantu ya nsi vandaka na makasi, makasi ya nge kwizaka, ye ntangu kufundisa bafwa, ye ntangu kupesa kifutu kwa basielo ya nge bambikudi, ye kwa banlongo ye kwa bau ya vumina nkumbu ya nge, ya fioti ye ya nene, ye yai ikele ntangu ya kufwa bau ya kufwaka ntoto, Nk. 2:1; 115:13; Nzai. 10:7; 13:16; 19:2

¹⁹ Tempelo ya Nzambi ya ikele mu zulu kangulaka, nkela ya luwawanu ya yandi monikaka mu tempelo ya yandi, buna vandaka banzazi ye bandinga ye bambandanu ye ndikunu ya ntoto ye mvula ya nene ya matadi. Nzai. 8:5; 16:18, 21