Nzaikulu 1 - Le Nouveau Testament en Kikwango 1950

Luyantiku

¹ Nzaikusu ya Yesu Klisto, ya Nzambi pesaka yandi kusonga kwa basielo ya yandi, mambu yonso ya fwiti nswalu. Yandi fidisaka ye zaikisaka yau na wanjo ya yandi, kwa sielo ya yandi Yoane, Dan. 2:28; Nzai. 22:6

² yandi songaka kitemo sambu na mambu ya Nzambi ye kitemo ya Yesu Klisto, ye mambu yonso ya yandi monaka. Nzai. 1:9; 6:9

³ Kiese ikele na yandi ya tanga, ye bau ya kuwa mambu ya mbikudulu yai, ye ya lunda mambu ya sonama muna, kadi ntangu ikele mfinama. Yak. 5:8; 1 Pet. 4:7; Nzai. 22:7, 10

Mbote kwa mabundu nsambwadi mu Asia

⁴ Yoane sonika kwa mabundu nsambwadi ya ikele mu Asia. Nlemvo kwa beno ye yenge tuka yandi ya ikele, ye ya vandaka ye ya takwiza, ye tuka bampeve nsambwadi ya ikele nantwala ya kiti ya nkembo ya yandi 2 Mose 3:14; Nzai. 3:1; 5:6; 11:17; 16:5

⁵ ye tuka Yesu Klisto, ntemo ya kwikama, ya ntete ya fulukiswa tuka bafwa ye yandi ikele nyadi ya bamfumu ya ntoto. Kwa yandi ya zolaka beto ye sukulaka masumu ya beto mu menga ya yandi. Nk. 89:27; 51:2; 1 Kol. 15:20; Kolo. 1:18; Eb. 9:12, 14; 1 Pet. 1:18; 1 Yoa. 1:7, 9; Nzai. 3:14

⁶ Yandi salaka beto kimfumu ye banganga kwa Nzambi ya yandi ye Tata, kwa yandi nkembo ye luyalu mvu ya mvu! Amen. 2 Mose 19:6; Yes. 61:6; Dan. 7:22, 27; 1 Pet. 2:5, 9; Nzai. 5:10

Kwiza ya Mfumu samunwa

⁷ Tala, yandi ikele kwiza mu matuti, meso yonsi tamona yandi, ye bau ya bulaka yandi dionga, ye makanda yonso ya ntoto tadila sambu na yandi. Yo ikele mpilayai. Amen Dan. 7:13; Zak. 12:10; Mat. 24:30; 26:64; Yoa. 19:37

⁸ Mono ikele Alafa ye Omega, Mfumu Nzambi ikele kutuba, yandi ya ikele, ye ya vandaka, ye ya ikele kwiza, Nkwa ngolo yonso. Yes. 44:6; Amosi. 4:13; Nzai. 1:4; 21:6

Yoane kumona Yesuye yandi fwiti kusonika

⁹ Mono Yoane mpangi ya beno, ya nkwa kintuadi na beno mu mpasi ye kimfumu ye mvibudulu ya ikele mu Yesu, mono vandaka va sanga ya bingwa Patamo sambu na mambu ya Nzambi ye sambu na kitemo ya Yesu.

¹⁰ Mono vandaka mu Mpeve mu kilumbu ya Mfumu, mono kuwaka ndinga ya nene nanima na mono, bonso ndinga ya mpungi. Nzai. 4:1

¹¹ kutuba: Mambu ya nge mona, sonika mu nkanda ye fidisa yau ku mabundu nsambwadi: ku Efeso, ku Smilina, ku Pelengamo, ku Tiatila, ku Salade, ku Filadelefia ye ku Laodikia.

¹² Mono pindulaka kutala ndinga yina ya tubaka kwa mono. Bu mono pindulaka, mono monaka bilundilu ya wola nsambwadi ya minda 2 Mose 37:23; Zak. 4:2

¹³ ye nakati na bilundilu ya minda, mosi ya vandaka bonso Mwana ya muntu, yandi vwataka mvwatu ya nda, ye kangwa mukaba ya wola na ntulu ya yandi. Yeh. 1:26; Dan. 7:13; 10:5

¹⁴ Kansi ntu ya yandi ye nsuki vandaka mpembe bonso mika ya mpembe, bonso mvula ya mpembe, meso ya yandi vandaka bonso nlema ya tiya. Dan. 7:9; 10:6; Nzai. 2:18

¹⁵ Makulu ya yandi bonso mitaku ya kienzima ya bau tulaka mu tiya, ndinga ya yandi bonso ndinga ya bamasa mingi. Yeh. 1:24; Dan. 10:6

¹⁶ Mu diboko kibakala ya yandi vandaka bambwetete nsambwadi, mu munoko ya yandi basikaka mbele ya mvita ya ikele na makasi ndambu zole, luse ya yandi vandaka bonso ntangu, bu yo tentina mu ngolo ya yandi. Yes. 49:2; Nzai. 3:1; 2:12, 16; 19:15, 21

¹⁷ Bu mono monaka yandi, mono kubwaka na makulu ya yandi bonso muntu ya kufwa, yandi tulaka diboko kibakala ya yandi va mono, kutuba: Tita ve, mono ikele ya ntete ye ya nsuka. Yes. 44:2, 6; 48:12; Dan. 8:18; 10:9, 10, 12

¹⁸ Ye mono ikele Nkwa moyo, mono vandaka ya kufwa, ye tala, mono ikele na moyo mvu ya mvu, ye mono ikele na nsabi ya lufwa ye ya sika ya bafwa.

¹⁹ Sambu na yai sonika mambu ya nge imene kumona ye mambu ya ikele ntangu yai ye mambu ya takwiza nantwala.

²⁰ Yai mambu ya kinsweki ya bambwetete nsambwadi ya nge monaka na diboko kibakala ya mono ye bilundilu ya wola nsambwadi ya minda. Bambwetete nsambwadi ikele banjo ya mabundu nsambwadi, bilundilu nsambwadi ya minda ikele mabundu nsambwadi.