Ngalata 6 - Le Nouveau Testament en Kikwango 1950

Sadisa bau ya sumukaka

¹ Bampangi, kana muntu bakwa mu masuma, buna beno ya kimpeve sungika muntu ya mpilayai, mu mpeve ya nlembami; ye dikenga na nge tapukumunwa mpe ve.

² Beno natana bizitu ya beno, buna beno talungisa nsiku ya Klisto. Lom. 15:1-2; Lom. 15:1; 1 Tes. 5:14

³ Kadi kana muntu dibanza yandi ikele nene, bu yandi ikele mpamba, yandi ikele kudikusa. Lom. 12:3

⁴ Kansi bika muntu na muntu ditala mu bisalu ya yandi, buna yandi tavanda luyanu ya yandi mu yandi kibeni kaka, mu muntu yankaka ve. 1 Kol. 11:28

⁵ Kadi muntu na muntu tanata kizitu ya yandi kibeni.

Yina ya beto kuna beto tayonzikwa

⁶ Yandi ya longwa mu mambu, bika yandi vanda kintuadi na yandi ya longa yandi, mu bima yonso ya mbote.

⁷ Beno dikuswa ve. Muntu lenda kuseka Nzambi ve, kadi yina ya muntu kuna, yandi tabuka yo mpe. Nk. 62:12; Yel. 17:10; Lom. 2:6; 2 Kol. 5:10; 9:6; Nzai. 2:23

⁸ Kadi yandi ya kuna sambu na nsuni ya yandi, tabuka mbivisu mu nsuni ya yandi, kansi yandi ya kuna sambu na Mpeve tabuka moyo ya mvu ya mvu mu Mpeve.

⁹ Bika beto konda kikesa ve mu kisalu ya mbote, kadi mu ntangu ya lunga, beto tabuka, kana beto lembwa ve. 2 Kol. 4:16; 2 Tes. 2:13

¹⁰ Buna bonso beto ikele na ntangu, bika beto sala mbote kwa bantu yonso, kansi ya luta kwa bau ya ikele na kintuadi na beto mu lukwikilu.

Ndongisilu sambu na mambu ya luvunu

¹¹ Tala bisono ya nene yai ya mono sonika kwa beno, na diboko ya mono kibeni.

¹² Bantu yonso ya tonda kudisonga mbote mu nsuni, bau tula beno mu kuzengwa, kaka na bau zomwa ve sambu na kulunsi ya Klisto, Fili. 3:18

¹³ Kadi bau ya nzengolo ikele kukeba nsiku mpe ve, kansi bau tonda beno zengwa, na bau lenda kuyana mu nsuni ya beno.

¹⁴ Kansi mu mono, Nzambi zaba mono zola kuyana ve, kansi mu kulunsi ya Mfumu ya beto Yesu Klisto kaka, mu yo nsi imene kukomwa kwa mono, ye mono ku nsi. Lom. 6:6; Ngal. 2:19

¹⁵ Kadi nzengolo ikele kima ve keti konda nzengolo ikele kima ve, kansi nsemono yampa. 1 Kol. 7:19; 2 Kol. 5:17; Ngal. 5:6; Kolo. 3:11

¹⁶ Bantu yonso ya ikele kutambula mu malongi yai, bika yenge ye nkenda vanda va bau, ye va Isaeli ya Nzambi. Nk. 125:4; 128:6

¹⁷ Tuka na ntangu yai, bika muntu monisa mono mpasi ve, kadi mu nitu ya mono, mono ikele kunata kidimbu ya Yesu.

¹⁸ Bampangi, bika nlemvo ya Mfumu ya beto Yesu Klisto vanda na mpeve ya beno. Amen. Ngal. 1:3