Ngalata 5 - Le Nouveau Testament en Kikwango 1950

¹ Sambu na kimpwanza, Klisto kangulaka beto, sambu na yai, telema ngolo, ye kangwa diaka ve na vangu ya kimpika.

² Tala, mono Paulu ikele kutuba kwa beno: Kana beno kubaka nzengolo, Klisto ikele kusadisa beno ve. Bis. 15:1, 7

³ Mono tuba kitemo diaka kwa konso muntu ya baka nzengolo, na yandi fwiti kusala nsiku yonso. 5 Mose 27:26; Yak. 2:10

⁴ Beno ya nungiswa mu nsiku, beno imene kukatuka na Klisto, beno imene kukatuka na nlemvo.

⁵ Kadi mu Mpeve beto ikele kuvingila mu lukwikilu vuvu ya lunungu.

⁶ Kadi mu Klisto Yesu nzengolo keti konda nzengolo ikele na mfunu ve, kansi lukwikilu ya ikele kusala mu zola. 1 Kol. 7:19; 13:1; Ngal. 6:15

⁷ Beno tinaka mbote. Nani buyaka beno, na beno talemvuka ve mambu ya kieleka ? Ngal. 3:1

⁸ Malongi yai katuka ve na yandi ya binga beno.

⁹ Lufunusu fioti ikele kufunisa mampa yamvimba. 1 Kol. 5:6

¹⁰ Mono ikele na vuvu mu Mfumu sambu na beno, na beno tabaka mabanza yankaka ve, kansi konsonani ya monisa beno mpasi tanata mfundusu ya yandi.

¹¹ Bampangi, kana mono ikele kusamuna mambu ya nzengolo, sambu na nki mono ikele kumoniswa mpasi ? Buna nteso ya sakuba ya kulunsi imene.

¹² Bau ya monisa beno mpasi, mono zola bau kukatulwa.

¹³ Bampangi, beno bingwaka sambu na kimpwanza, kansi sala kimpwanza ya beno pesa nzila kwa nsuni ve, kansi sadilana mu zola. 1 Kol. 8:9; 9:19; Ngal. 6:1

¹⁴ Kadi nsiku yamvimba ikele kulungiswa mu mambu mosi yai: Nge tazola bamfinangani ya nge bonso nge kibeni. 3 Mose 19:18; Mat. 22:39; Lom. 13:8; Yak. 2:8

¹⁵ Kansi kana beno tatikana ye kudiana, tomatala na beno manisana ve.

Nsuni ikele kunwanisaka mpeve

¹⁶ Kansi mono tuba: Beno tambula mu Mpeve, buna beno tasala lutondo ya nsuni ve. Lom. 6:12; 8:4; 1 Pet. 2:11

¹⁷ Nsuni ikele na kimbeni na Mpeve, ye Mpeve ikele na kimbeni na nsuni; bau zole ikele na kimbeni; na beno lenda kusala ve yina ya beno zola kusala.

¹⁸ Kansi kana Mpeve ikele kutwala beno, beno ikele nansi na nsiku ve. Mabundu ya nsuni ye ya Mpeve

¹⁹ Bisalu ya nsuni ikele kumonika, yau ikele yai: Bizumba, nsumukunu, mambu ya nsoni. Mat. 15:19; Lom. 1:29; 1 Kol. 6:9; Ef. 5:3; Kolo. 3:5

²⁰ sambilu ya biteki, kiloka, kimbeni, kunwana, kimpala, makasi, ntu ngolo, kabana, malongi ya luvunu, 1 Kol. 3:3; 2 Kol. 12:20

²¹ kimpala, kolwa, makinu, ye ya mpilayai, mono ikele kusonga beno ye mono imene kusonga beno, na bau ya sala mpilayai tabaka ve difwa ya kimfumu ya Nzambi. Nzai. 22:15

²² Kansi mabundu ya Mpeve ikele zola, kiese, yenge, mvibudulu, nlembami, mbote, kwikama, Ef. 5:9; Yak. 1:19

²³ nlembami, diyala, mambu yai ikele na kimbeni na nsiku ve.

²⁴ Kansi bau ya Klisto Yesu, imene kukoma nsuni sikamosi na lutondo mbi na yo va kulunsi. Lom. 6:6

²⁵ Kana beto ikele na moyo mu Mpeve, bika beto tambula mu Mpeve mpe. Lom. 8:5

²⁶ Bika beto tonda nkembo ya mpamba ve, ye basisana ntembe keti tulana kimpala ve.