Ngalata 4 - Le Nouveau Testament en Kikwango 1950

Mutindu ya kimpika ye kimwana

¹ Mono tuba: Ntangu ya mvingidi ya difwa ikele mwana, yandi ikele kitezo mosi ya mpika, bu yandi ikele mfumu ya bima yonso,

² kansi yandi ikele nansi ya minkengi ye balundi ti ntangu ya tata imene kuzenga.

³ Buna beto mpe, bu beto vandaka bana, beto vandaka mu kimpika mu mabanza ya nsi. Kolo. 2:20

⁴ Bu ntangu ya lunga kwizaka, Nzambi fidisaka Mwana ya yandi, ya butuka na nkento ya butuka nansi ya nsiku. Ef. 1:10

⁵ na yandi lenda kuvulusa bau ya ikele nansi ya nsiku, na beto lenda kubaka kimwana. Yoa. 1:12; Ngal. 3:13, 26

⁶ Sambu na beno ikele bana, Nzambi fidisaka Mpeve ya Mwana ya yandi mu mintima ya beno, kuboka: Aba, Tata. Lom. 8:15

⁷ Buna nge ikele mpika diaka ve, kansi mwana; kana nge ikele mwana, buna nge ikele mvingidi ya difwa mu Nzambi.

⁸ Kansi ntete bu beno zabaka Nzambi ve, beno vandaka bampika kwa banzambi ya ikele Nzambi kieleka ve. 1 Kol. 12:2; Ef. 2:11

⁹ Ntangu yai, bu beno imene kuzaba Nzambi ye Nzambi imene kuzaba beno, buna nki beno vutuka diaka ku mabanza ya lebakana ye ya nsukami ya kimwana, ye beno tonda kuvanda diaka mu kimpika ? 1 Kol. 8:3; Kolo. 2:20

¹⁰ Beno ikele kukeba bilumbu ye bangonda ye bansungi ye bamvu. Lom. 14:5; Kolo. 2:16

¹¹ Mono ikele na boma sambu na beno, kana na mono imene kusala kisalu va beno mpamba.

Kubedisa kwa mabundu mu nsi ya Ngalatia

¹² Bampangi, mono bombidila beno, vanda bonso mono, kadi mono mpe imene kwiza bonso beno. Beno sadilaka mono mbi ve.

¹³ Kansi beno zaba tuka na ntete mono samunaka nsamu mbote kwa beno sambu na lebakana ya nsuni,

¹⁴ beno buyaka keti saulaka ve yina ya vandaka bonso mpukumuni mu nsuni ya mono kwa beno, kansi beno bakaka mono bonso wanjo ya Nzambi, bonso Klisto Yesu kibeni.

¹⁵ Kiese yina ya beno ikele wapi ntangu yai ? Kadi mono tuba kitemo sambu na beno, kana yo lenda, beno imene kukatula meso ya beno ye kupesa yau kwa mono.

¹⁶ Buna mono imene kwiza mbeni ya beno, sambu na mono tuba kwa beno mambu ya kieleka ?

¹⁷ Bankaka ikele kusosa beno mu ngolo, kansi bonso yo lunga ve, bau tonda kukatula beno, na beno lenda kusosa bau.

¹⁸ Kansi yo ikele mbote na beno soswaka ngolo ntangu yonso mu mambu ya mbote, kaka ve, bu mono ikele na beno.

¹⁹ Beno bana fioti ya mono, mono ikele kumona mpasi ngolo diaka sambu na beno, ti na Klisto talunga mu beno. 1 Kol. 4:15; File. 10

²⁰ Kansi mono tonda kuvanda na beno ntangu yai, ye pindula ndinga ya mono; sambu na mono zaba ve kana mono tasala nki na beno.

Luwawanu zole

²¹ Tuba kwa mono, beno ya tonda kuvanda nansi ya nsiku, beno ikele kuwa nsiku ve ?

²² Kadi yo ikele kusonama: Abalahami vandaka na bana zole ya babakala, mosi ya nkento kimpika ye mosi ya nkento kimpwanza. 1 Mose 16:15; 21:2

²³ Kansi mwana ya nkento kimpika butukaka mu kinsuni, kansi mwana ya nkento kimpwanza butukaka mu nsilulu. 1 Mose 17:16; Lom. 9:7

²⁴ Mambu yai ikele bonso kingana, kadi bankento yai ikele luwawanu zole, mosi katuka na mongo ya Sinai, ya butaka bana mu kimpika, ikele Hangali.

²⁵ Kansi Hangali ikele mongo ya Sinai mu Alabia, ikele mpilamosi Yelusalemi ya ikele ntangu yai, kadi yandi ye bana ya yandi ikele mu kimpika.

²⁶ Kansi Yelusalemi ya ikele na zulu ikele ya pwanza, yai ikele ngudi ya beto.

²⁷ Kadi yo ikele kusonama: Yangalala nge nkwa sita ya buta ve, sasula ndinga ye boka, nge ya konda nsongo; kadi nkwa kinsona ikele na bana mingi, ye yandi ya ikele na bakala ikele na bana ndambu. Yes. 54:1

²⁸ Bampangi, beno ikele bana ya nsilulu bonso Isaki. Lom. 9:7

²⁹ Bonso yandi ya butukaka mu nsuni zomaka yandi ya butukaka mu Mpeve, yo ikele mpilayai ntangu yai mpe. 1 Mose 21:9

³⁰ Kansi masonukwa ikele kutuba nki ? Basisa nkento kimpika ye mwana ya yandi, kadi mwana ya nkento kimpika tavingila difwa ve sikamosi na mwana ya nkento kimpwanza. 1 Mose 21:10, 12

³¹ Mpilayai bampangi, beto ikele bana ya nkento kimpika ve, kansi bana ya nkento kimpwanza.