Ngalata 3 - Le Nouveau Testament en Kikwango 1950

Paulu semba bantu ya Ngalatia, yandi songa, bau ya kwikila ikele bana ya Abalahami kieleka

¹ Beno bisi Ngalatia ya bunzoba, nani imene kuvengumuna beno ? Beno ikele kusongwa mbote Yesu Klisto komwa va kulunsi.

² Mambu yai kaka mono zola kuzaba na beno: Beno bakaka Mpeve sambu na bisalu ya nsiku keti mu kuwa ya lukwikilu ? Bis. 15:8; Ef. 1:13

³ Beno ikele bunzoba mpilayai ? Bu beno yantikaka mu Mpeve, ntangu yai beno maniswa mu nsuni ?

⁴ Beno monaka mpasi mingi yai mpamba ? Kana yo ikele mpamba kieleka.

⁵ Buna yandi ya pesa beno Mpeve ye sala bidimbu nakati na beno, yandi ikele kusala yo mu bisalu ya nsiku keti mu kuwa ya lukwikilu ?

⁶ Bonso Abalahami kwikilaka Nzambi ye yo tangwaka lunungu kwa yandi. 1 Mose 15:6; Lom. 4:3; Yak. 2:23

⁷ Mpilayai, zaba bau ya ikele mu lukwikilu ikele bana ya Abalahami.

⁸ Kansi masonukwa zabaka ntete Nzambi tanungisa bapaien mu lukwikilu, samunaka ntete nsamu yai ya mbote kwa Abalahami: Mu nge bapaien yonso tasakumunwa. Bis. 3:25

⁹ Mpilayai bau ya ikele mu lukwikilu ikele kusakumunwa sikamosi na Abalahami nkwa lukwikilu.

¹⁰ Kadi bantu yonso ya ikele mu bisalu ya nsiku ikele nansi ya ndola, sambu na yo ikele kusonama: Ndola ikele na konsonani ya vanda ve mu mambu yonso ya sonikwa mu nkanda ya nsiku, sambu na kusala yo. 5 Mose 27:26

¹¹ Yo ikele kuzabakana na muntu ikele kunungiswa nantwala na Nzambi sambu na nsiku ve, kadi: Nkwa lunungu tavanda na moyo mu lukwikilu. Hab. 2:4; Lom. 1:17; Eb. 10:38

¹² Nsiku katuka na lukwikilu ve, kansi: Yandi ya sala tavanda na moyo mu yau. 3 Mose 18:5; Yeh. 20:11; Lom. 10:5

¹³ Klisto imene kuvulusa beto tuka ndola ya nsiku, bu yandi ditulaka ndola sambu na beto, kadi yo ikele kusonama: Ndola ikele va konsonani ya bangwa va nti. 4 Mose 21:23; Ngal. 4:5

¹⁴ Na lusakumunu ya Abalahami lenda kwiza mu Klisto Yesu kwa bapaien, na beto lenda kubaka nsilulu ya Mpeve mu lukwikilu.

Bansilulu ya Nzambi yau lenda ve kabana

¹⁵ Bampangi, mono tuba bonso ikele kifu ya bantu. Kana yo ikele luwawanu ya muntu, kansi bu yo imene kusiamiswa, muntu lenda kusala yo mpamba ve keti kuyika mambu yankaka na yo.

¹⁶ Kansi bansilulu peswaka kwa Abalahami ye kwa nkuna ya yandi. Yandi tubaka ve: Kwa bankuna ya nge bonso yo ikele mingi, kansi bonso yo ikele mosi kaka. Kwa nkuna ya nge, ikele Klisto.

¹⁷ Mono tuba yai: Luwawanu ya Nzambi siamisaka ntete, ye nsilulu lenda kwiza mpamba ve, sambu na nsiku ya kwizaka kulanda mvu nkama iya ye makumi tatu nanima.

¹⁸ Kadi kana difwa kwizaka tuka nsiku, buna yo ikele sambu na nsilulu diaka ve, kansi Nzambi pesaka yo kwa Abalahami mu nsilulu. Lom. 4:13

Kisalu ya nsiku

¹⁹ Buna nsiku ikele nki ? Yo yikwa sambu na kufwa ya nsiku, ti nkuna kwiza ya nsilulu peswaka kwa yandi, yo solwaka ntete kwa banjo mu kisielo ya nwawasi. Bis. 7:53; Lom. 5:20; Eb. 2:2

²⁰ Kansi nwawasi ikele nwawasi ya muntu mosi ve, kansi Nzambi ikele mosi.

²¹ Buna nsiku ikele kubuya bansilulu ya Nzambi ? Mpilayai ve! Kadi kana nsiku peswaka ya lenda kupesa moyo, kieleka lunungu imene kwiza tuka nsiku.

²² Kansi masonukwa imene kutula bantu yonso nansi ya masumu, na mu lukwikilu ya Yesu Klisto nsilulu lenda kupeswa kwa bau ya kwikila. Lom. 11:32

²³ Kansi ntete ya lukwikilu kwizaka ve, beto kubwa bonso bampika nansi ya nsiku, beto vingila lukwikilu ya tazaiswa.

²⁴ Mpilayai nsiku imene kwiza nlongi ya beto sambu na kutwala beto kwa Klisto, na beto lenda kunungiswa mu lukwikilu. Lom. 10:4

²⁵ Kansi ntangu yai lukwikilu imene kwiza, beto ikele nansi ya nlongi diaka ve.

Bau ya kwikila kangulwa tuka nsiku

²⁶ Kadi beno yonso ikele bana ya Nzambi mu lukwikilu mu Klisto Yesu. Yoa. 1:12; Lom. 8:15; Ngal. 4:5

²⁷ Kadi yonso nakati na beno ya imene kubotikwa mu Klisto imene kuvwata Klisto. Lom. 6:3; 13:14

²⁸ MuYuda ikele ve ye muElene ikele ve, mpika ikele ve ye mpwanzi ikele ve, bakala ikele ve ye nkento ikele ve, sambu na beno yonso ikele mosi mu Klisto Yesu. Yoa. 17:21; Lom. 10:2; 1 Kol. 12:13; Ef. 2:14; Kolo. 3:1

²⁹ Kana beno ikele ya Klisto, buna beno ikele nkuna ya Abalahami ye mvingidi ya difwa bonso ikele nsilulu. Lom. 9:7