Ngalata 2 - Le Nouveau Testament en Kikwango 1950

Bantumwa mu Yelusalemi ndimawaka kintumwa ya Paulu

¹ Bu mvu kumi ye iya imene kuluta, mono kwenda diaka ku Yelusalemi sikamosi na Banaba, ye mono twalaka Tito mpe.

² Mono kwendaka sambu na nzaikusu, ye mono songaka bau nsamu mbote ya mono samunaka kwa bapaien, kansi mu kinsweki kwa bau ya nzitusu, na yo tavanda ve na mono ikele kutina keti imene kutina mpamba.

³ Tito mpe muntu ya Elene ya vandaka na mono, bau songaka ve na yandi tazengwa.

⁴ Mono salaka yai sambu na bampangi ya luvunu kotaka mu kinsweki, kutala kimpwanza ya beto ya ikele mu Klisto Yesu, na bau lenda kutula beto mu kimpika.

⁵ Kansi beto ndimaka ve kulemvuka, ta lokula mosi ve, na kieleka ya nsamu mbote lenda kuvanda na beno.

⁶ Bau ya banzaka na bau ikele ya luzitu—bonso bau vandaka ikele mambu ya mono ve, sambu na Nzambi ikele kutala luse ya muntu ve—bau yai ya luzitu longaka mono mambu ve. Lom. 2:11

⁷ Kansi bu bau monaka mono peswa kusamuna nsamu mbote kwa bau ya konda nzengolo, bonso Petelo kwa bazengwa. Bis. 9:15; 13:2; 22:21; Lom. 11:13; Ngal. 1:16; Ef. 3:8; 1 Tim. 2:7; 2 Tim. 1:11

⁸ Kadi yandi ya sadilaka kintumwa mu Petelo kwa bazengwa, yandi sadilaka yo mu mono mpe kwa bapaien.

⁹ Bu bau zabaka nlemvo ya peswaka kwa mono, buna Yakobi ye Kefa ye Yoane ya tangwa makunzi, bau pesaka diboko ya kibakala ya kintuadi kwa mono ye Banaba, na beto takwenda kwa bapaien, kansi bau kwa bazengwa. Bis. 15:12

¹⁰ Kansi yai kaka, na beto fwiti kubambuka bansukami, ye mono mpe zolaka kusala yai. Bis. 11:29; 24:17; Lom. 15:25; 1 Kol. 16:1; 2 Kol. 8:1; 9:1

Paulu sembaka Petelo mu Antiokia

¹¹ Bu Kefa kwizaka ku Antiokia, mono sembaka yandi na luse ya yandi, sambu na mambu ya yandi, bedisaka yandi.

¹² Kadi ntete ya bankaka katukaka na Yakobi, yandi kudiaka na bapaien, kansi bu bau imene kwiza, yandi katukaka ye vandaka yandi mosi, sambu na yandi titaka bazengwa.

¹³ Buna baYuda yankaka katukaka sikamosi na yandi, ye Banaba mpe twalwaka mu luvunu ya bau.

¹⁴ Bu mono monaka na bau tambulaka ya sungama ve mu kieleka ya nsamu mbote, mono tubaka kwa Kefa nantwala na bau yonso: Kana nge ya ikele muYuda ikele kutambula mu bifu ya bapaien, ye mu bifu ya baYuda ve, buna sambu na nki nge tula bapaien kutambula mu bifu ya baYuda ?

¹⁵ Beto ikele baYuda mu kibutu, ye bankwa masumu ya bapaien ve.

¹⁶ Kansi beto zaba muntu ikele kunungiswa mu bisalu ya nsiku ve, kansi mu lukwikilu mu Klisto Yesu, beto mpe imene kukwikila mu Klisto Yesu, na beto lenda kunungiswa mu lukwikilu mu Klisto, mu bisalu ya nsiku ve; sambu na nsuni mosi tanungiswa ve mu bisalu ya nsiku. Nk. 143:2; Bis. 13:38; Lom. 1:17; 3:20; 8:3; Ngal. 3:11

¹⁷ Kansi bu beto sosaka kunungiswa mu Klisto, beto monwaka na beto ikele bankwa masumu, buna Klisto ikele sielo ya masumu ? Mpilayai ve!

¹⁸ Kadi kana mono tunga diaka yina ya mono pasulaka, mono disonga mono ikele mufwi ya nsiku.

¹⁹ Kadi mu nsiku, mono kufwaka kwa nsiku, na mono lenda kuvanda na moyo mu Nzambi.

²⁰ Mono komwaka va kulunsi sikamosi na Klisto; yo ikele mono diaka ve ya ikele na moyo, kansi Klisto ikele na moyo mu mono; moyo ya ikele na mono ntangu yai mu nsuni, ikele na mono mu lukwikilu mu Mwana ya Nzambi ya zolaka mono ye dipesaka sambu na mono. Ef. 5:2; Tit. 2:14

²¹ Mono losa ve nlemvo ya Nzambi, kadi kana lunungu basika mu nsiku, buna Klisto kufwaka mpamba. Eb. 7:11