Ngalata 1 - Le Nouveau Testament en Kikwango 1950

Luyantiku

¹ Paulu, ntumwa tuka bantu ve, ye mu bantu ve, kansi mu Yesu Klisto ye Nzambi, Tata, ya fulukisaka yandi tuka bafwa,

² ye bampangi yonso ya ikele na mono, fidisa mbote kwa mabundu ya Ngalatia.

³ Nlemvo kwa beno ye yenge ya katuka na Nzambi Tata ye Mfumu ya beto Yesu Klisto. Lom. 1:7; 1 Kol. 1:3; 2 Kol. 1:2; Ef. 1:2; 1 Tes. 1:1

⁴ Yandi dipesaka sambu na masumu ya beto, na yandi lenda kuvulusa beto tuka ntangu yai ya mbi, bonso ikele luzolo ya Nzambi ye Tata ya beto. Mat. 20:28; Ngal. 2:20; Ef. 5:2; Tit. 2:14

⁵ Nkembo kwa yandi mvu ya mvu. Amen. Lom. 16:27

Nsamu ya Paulu samunaka ikele kieleka

⁶ Mono yituka sambu na beno ikele kukatuka nswalu tuka yandi ya bingaka beno mu nlemvo ya Klisto, ye ku nsamu ya mbote mutindu yankaka.

⁷ Yo ikele nsamu ya mbote yankaka ve, kansi bankaka ikele kumonisa beno ntantu ye bau zola kupindula nsamu ya mbote ya Klisto. Bis. 15:1; 2 Kol. 11:3; Ngal. 5:10

⁸ Kansi kana beto, keti wanjo tuka zulu samuna nsamu mbote yankaka kwa beno ya beto samunaka ve, bika yandi vanda na ndola.

⁹ Bonso mono tubaka ntete, mono tuba diaka: Kana muntu samuna kwa beno nsamu mbote yankaka ya beno imene kubaka ve, bika yandi vanda na ndola.

Paulu bakaka nsamu mbote na muntu ve, kansi tuka Yesu Klisto mu nzaikusu

¹⁰ Kadi ntangu yai mono ikele kusosa luzolo ya bantu keti ya Nzambi ? Keti mono sosa kuyangidisa bantu ? Kana mono ikele kuyangidisa bantu buna mono ikele sielo ya Klisto ve. 1 Tes. 2:4; Yak. 4:4

¹¹ Bampangi, mono zabisa beno, na nsamu mbote ya mono samunaka kwa beno ikele ya kimuntu ve.

¹² Kadi mono bakaka yo ve keti longwaka yo ve na muntu, kansi mu nzaikusu ya Yesu Klisto. Ef. 3:3

¹³ Kadi beno imene kuwa nsangu ya bifu ya mono, bu mono vandaka mu kiYuda, bonso mono luta nzomono mingi kwa dibundu ya Nzambi, ye kufwaka yo. Bis. 8:3; 9:21; 22:4; 26:9; Fili. 3:6; 1 Tim. 1:13

¹⁴ Mu mambu ya kiYuda, mono lutaka bau ya mvu mosi na mono ya kikanda ya mono, mono tulaka ngolo mingi sambu na nsiku ya nkulu ya batata ya mono. Bis. 22:3

¹⁵ Kansi bu yo vandaka nzolakani mbote ya Nzambi, ya solaka mono tuka ntangu mono butukaka, ye bingaka mono mu nlemvo ya yandi. Yel. 1:5; Bis. 9:15; 13:2; Lom. 1:1

¹⁶ Bu yandi zolaka kuzabisa Mwana ya yandi mu mono, na mono lenda kusamuna nsamu mbote ya yandi kwa bapaien, buna mono yuvulaka ngangu na nsuni ye menga ve.

¹⁷ Keti mono kwendaka ku Yelusalemi ve kwa bau ya vandaka bantumwa ntete na mono, kansi mono kwendaka ku Alabia, ye vutukaka diaka ku Damasko.

¹⁸ Nanima bu mvu tatu imene kuluta, mono kwendaka ku Yelusalemi kutala Kefa, ye mono vandaka na yandi bilumbu kumi ye tanu.

¹⁹ Bankaka ya bantumwa mono monaka ve, kansi kaka Yakobi, mpangi ya Mfumu.

²⁰ Kansi sambu na mambu ya mono sonika kwa beno, tala, nantwala na Nzambi, mono kusa ve.

²¹ Buna mono kwizaka ku ndambu ya Silia ye Kilikia.

²² Kansi mabundu ya Yuda ya ikele mu Klisto zabaka luse ya mono ve ntangu yina.

²³ Bau kuwaka kaka: Yandi ya zomaka beto mpasi ntete, ntangu yai yandi ikele kusamuna nsamu mbote ya lukwikilu ya yandi zolaka kufwa.

²⁴ Ye bau kembilaka Nzambi mu mono.