Matai 9 - Le Nouveau Testament en Kikwango 1950

Yesu belula nkwa mianzi

¹ Yandi kotaka mu bota ye sabukaka ye kwizaka ku mbanza ya yandi kibeni. Mal. 2:1; Luk. 5:17

² Tala, bau nataka kwa yandi muntu ya maladi ya mianzi ya kulala va mbeto. Bu Yesu monaka lukwikilu ya bau, yandi tubaka kwa muntu ya maladi ya mianzi: Mwana, vanda na kikesa, masumu ya nge imene kuvidiswa.

³ Tala, bansoniki yankaka tubaka mu mintima ya bau: Muntu yai ikele kutuba mbi.

⁴ Bu Yesu zabaka mabanza ya bau, yandi tubaka: Sambu na nki beno banza mambu mbi mu mintima ya beno ?

⁵ Nki ikele mpasi ve kutuba: Masumu ya nge imene kuvidiswa, keti kutuba: Telema ye tambula ?

⁶ Kansi na beno lenda kuzaba na Mwana ya muntu ikele ngolo va ntoto kuvidisa masumu, yandi tubaka kwa muntu ya maladi ya mianzi: Telema, baka mbeto ya nge, kwenda ku nzo ya nge.

⁷ Yandi telemaka, ye kwendaka ku nzo ya yandi.

⁸ Kansi bu bibuka monaka yo, bau vandaka na boma, ye kembilaka Nzambi ya imene kupesa ngolo ya mpilayai kwa bantu.

Yesu binga Matai

⁹ Tuka kuna, bu Yesu ikele kuluta, yandi monaka muntu kuvanda na sika ya kufutisa mpaku, ya bingwa Matai. Yandi tubaka kwa yandi: Landa mono. Yandi telemaka ye landaka yandi. Mal. 2:13; Luk. 5:27

¹⁰ Yo vandaka, bu yandi vandaka na meza mu nzo, tala, bamfutisi mingi ye bankwa masumu kwizaka kuvanda na meza na Yesu ye banlonguki ya yandi.

¹¹ Bu bafalisi monaka yo, bau tubaka kwa banlonguki ya yandi: Sambu na nki Nlongi ya beno ikele kudia na bamfutisi ye bankwa masumu ?

¹² Kansi bu yandi kuwaka yo, yandi tubaka: Bau ya ikele na ngolo ikele na nsatu ve ya munganga, kansi bau ya ikele na maladi.

¹³ Kansi kwenda kulonguka yai ikele mpila nki: Mono zola nkenda, kansi nkailu ya zikwa ve, kadi mono kwizaka ve kubinga balunungu kansi bankwa masumu.

Yesu longa kubuyamadia

¹⁴ Buna banlonguki ya Yoane kwizaka kwa Yesu, kutuba: Sambu na nki beto ya bafalisi ikele kubuya madia, kansi banlonguki ya nge ikele kubuya madia ve ? Mal. 2:18; Luk. 5:33

¹⁵ Yesu tubaka kwa bau: Banduku ya toko ya makwela lenda kuvanda na ntantu bu toko ya makwela ikele na bau ? Kansi bilumbu takwiza, bu toko ya makwela takatulwa na bau, buna bau tabuya madia.

¹⁶ Muntu ikele kutula kitini ya lele yampa va mvwatu ya nkulu ve, sambu na yina yampa tapasula mvwatu, ye dibulu taluta nene.

¹⁷ Mpe bau ikele kutula vinia yampa ve mu makuba ya mukanda ya nkulu, mpilayai makuba tapasuka ye vinia tatiamuka, ye makuba takufwa, kansi bau ikele kutula vinia yampa mu makuba yampa, buna yau zole ikele kulundwa.

Yesu belule nkento mosi ye fulukisa mwana ya Yailo

¹⁸ Bu yandi vandaka kutuba mambu yai kwa bau; tala, nkuluntu mosi kwizaka ye sambilaka yandi, kutuba: Mwana nkento ya mono imene kufwa ntangu yai, kansi kwiza kutula diboko ya nge va yandi, ye yandi tavanda na moyo. Mal. 5:21; Luk. 8:40

¹⁹ Yesu telemaka ye banlonguki ya yandi, ye landaka yandi.

²⁰ Tala, nkento ya vandaka na maladi ya menga mvu kumi ye zole kwizaka nanima na yandi, ye valakanaka nsongi ya mvwatu ya yandi,

²¹ kansi yandi tubaka mu yandi kibeni: Kana mono valakana mvwatu ya yandi kaka, mono tabeluka.

²² Yesu pindukaka ye monaka yandi ye tubaka: Mwana nkento, vanda na kikesa! Lukwikilu ya nge imene kubelula nge. Nkento belukaka tuka lokula yina.

²³ Bu Yesu kotaka mu nzo ya nkuluntu, ye monaka bantu ya kubula pitulu, ye kibuka ikele kusala makalele, yandi tubaka:

²⁴ Beno katuka, kadi mwana nkento imene kufwa ve, kansi yandi ikele kulala. Bau sekaka yandi.

²⁵ Bu kibuka imene kubasiswa, yandi kotaka ye simbaka diboko ya yandi, ye mwana nkento telemaka.

²⁶ Nsangu ya mambu yai kwendaka mu nsi yina yonso.

Yesu belula bampofo zole

²⁷ Bu Yesu katukaka kuna, bampofo zole landaka yandi, bau bokaka, kutuba: Mwana ya Davidi, kuwila beto nkenda!

²⁸ Bu yandi kotaka mu nzo, bampofo kwizaka kwa yandi; Yesu tubaka kwa bau: Beno kwikila mono lenda kusala yai ? Bau tubaka kwa yandi: E, Mfumu.

²⁹ Buna yandi valakanaka meso ya bau, kutuba: Yo vanda kwa beno bonso beno imene kukwikila.

³⁰ Meso ya bau kangukaka. Yesu kanikinaka bau, kutuba: Tala, na muntu zaba yo ve.

³¹ Kansi bau basikaka ye mwangisaka nsangu ya yandi mu ntoto yina yonso.

Yesu belula baba

³² Bu bau basikaka, tala, bau twalaka kwa yandi nkwa baba ya bakama na mpeve ya mbi. Luk. 11:14

³³ Bu yandi imene kubasisa mpeve ya mbi, baba tubaka. Bibuka yitukwaka, kutuba: Mambu ya mpilayai monikaka mu Isaeli ta mbala mosi ve.

³⁴ Kansi bafalisi tubaka: Mu nkuluntu ya bampeve mbi, yandi ikele kubasisa bampeve mbi. Mat. 12:24; Mal. 3:22; Luk. 11:15

Yesu zieta ye samuna nsamu mbote

³⁵ Yesu kwendaka kutambula mu mabanza yonso ya nene ye ya fioti, kulonga mu banzo ya bau ya sambilu, ye kusamuna nsamu ya mbote ya kimfumu, ye kubelula maladi mutindu yonso ye kimbevo yonso. Mat. 12:24; Mal. 3:22; Luk. 11:15

³⁶ Kansi bu yandi monaka bibuka, yandi kuwilaka bau nkenda, kadi bau vandaka na ntantu, ye mwanganaka bonso mameme ya konda mvungi. Mat. 14:14; Mal. 6:34

³⁷ Buna yandi tubaka kwa banlonguki ya yandi: Ngionzoko ikele mingi, kansi basadi ikele ndambu. Luk. 10:2; Yoa. 4:35

³⁸ Sambu na yai, lomba Mfumu ya ngionzoko, na yandi fidisa basadi ya yandi mu ngionzoko ya yandi.