Matai 8 - Le Nouveau Testament en Kikwango 1950

Yesu belula nkwa bwazi

¹ Bu yandi kulumukaka na mongo, bibuka mingi landaka yandi.

² Tala, nkwa bwazi kwizaka kusambila yandi, kutuba: Mfumu, kana nge zola, nge lenda kuvedisa mono. Mal. 1:40; Luk. 5:12

³ Yandi lambulaka diboko ya yandi ye valakanaka yandi, kutuba: Mono zola, nge vanda ya vedila. Nswalu bwazi ya yandi vediswaka.

⁴ Yesu tubaka kwa yandi: Tala, tuba yo kwa muntu ve, kansi kwenda kudisonga kwa nganga, ye pesa nkailu ya Mose sikidikisaka sambu na kitemo kwa bau.

Yesu belula sielo ya nkuluntu ya basoldat

⁵ Bu yandi kotaka mu Kapenaumi, nkuluntu ya basoldat kwizaka kwa yandi ye bombidilaka yandi, Luk. 7:1

⁶ ye tubaka: Mfumu, sielo ya mono ikele kulala mu nzo na maladi ya mianzi, yandi ikele kumoniswa mpasi mingi.

⁷ Yesu tubaka kwa yandi: Mono takwiza ye belula yandi.

⁸ Nkuluntu ya basoldat vutulaka ye tubaka: Mfumu, mono lunga ve na nge kukota na nsi ya nludi ya mono, kansi tuba ndinga mosi kaka, ye sielo ya mono tabeluka.

⁹ Kadi mono mpe ikele muntu na nsi ya ngolo; ye basoldat nanima na mono: mono tuba kwa mosi: Kwenda; yandi kwenda; kwa yankaka: Kwiza; yandi kwiza; kwa mpika ya mono: Sala yai, yandi sala yo.

¹⁰ Bu Yesu kuwaka yo, yandi yitukwaka ye tubaka kwa bau ya landaka yandi: Kieleka mono tuba kwa beno: Mu Isaeli kibeni mono imene kumona lukwikilu ya nene mpilayai ve.

¹¹ Kansi mono tuba kwa beno: Bantu mingi takatuka na este ye weste ye tavanda na meza sikamosi na Abalahami ye Isaki ye Yakobi mu kimfumu ya zulu; Mat. 1:11; Luk. 13:29

¹² kansi bana ya kimfumu taloswa mu tombe ya nganda; kuna tavanda kudila ye nkwetoso ya meno. Mat. 13:42; 22:13; 25:30; Luk. 13:28

¹³ Yesu tubaka kwa nkuluntu ya basoldat: Kwenda; bonso nge imene kukwikila, yo tavanda kwa nge. Sielo ya yandi belukaka ntangu yina.

Yesu belula bukilu ya Petelo

¹⁴ Bu Yesu kotaka mu nzo va Petelo, yandi monaka bukilo ya yandi ikele kulala na maladi ya fievre. Mal. 1:29; Luk. 4:38

¹⁵ Yandi valakanaka diboko ya yandi, ye fievre bikaka yandi; yandi telemaka ye sadilaka bau.

¹⁶ Kansi bu nkokila kubwaka, bau twalaka kwa yandi bantu mingi ya bakama na bampeve mbi, ye yandi basisaka bampeve mbi na ndinga ya yandi, ye belulaka bau yonso ya vandaka na maladi, Mal. 1:32; Luk. 4:40

¹⁷ na yo lenda kumaniswa ya tubwaka mu Yesaya mbikudi, kutuba: Yandi kibeni bakaka kimbevo ya beto ye nataka maladi ya beto. Yes. 53:4

Kitezo ya kulanda Yesu

¹⁸ Kansi bu Yesu monaka bibuka mingi ikele kuzunga yandi, yandi sikidikisaka kusabuka kuna simu.

¹⁹ Nsoniki mosi kwizaka ye tubaka kwa yandi: Nlongi, mono talanda nge konsosika ya nge kwenda. Luk. 9:57

²⁰ Yesu tubaka kwa yandi: Bibulu ikele na mabulu, bandeke ya zulu ikele na bazanza ya bau, kansi Mwana ya muntu ikele na sika ve kutula ntu ya yandi.

²¹ Yankaka ya banlonguki tubaka kwa yandi: Mfumu, bika mono kwenda ntete kuzika tata ya mono.

²² Kansi Yesu tubaka kwa yandi: Landa mono; bika bafwa kuzika bafwa ya bau kibeni.

Yesu bikisa tembo

²³ Bu yandi kotaka mu bota, banlonguki ya yandi landaka yandi, Mal. 4:35; Luk. 8:22

²⁴ Tala, kitembo ya nene kwizaka va mbu, ye bota fulukaka na mayo, kansi yandi kibeni lalaka.

²⁵ Bau kwizaka kwa yandi ye sikimisaka yandi, kutuba: Mfumu, vulusa, beto ikele kufwa.

²⁶ Yandi tubaka kwa bau: Sambu ya nki beno ikele na boma, beno bankwa lukwikilu fioti ? Buna yandi telemaka ye sembaka mupepe ye mbu; buna napi ya nene vandaka. Yobi 26:12

²⁷ Bantu yitukwaka, kutuba: Yandi ikele muntu mpila nki, na mupepe ye mbu ikele kulemvuka yandi ?

Yesu basisa bampeve ya mbi

²⁸ Bu yandi kumaka kuna simu, ku ntoto ya bantu ya Ngadala, buna bantu zole ya bakama na bampeve mbi katukaka na ndiamu ye kutakanaka na yandi, bau vandaka na makasi mingi, na muntu lenda kuluta nzila yina ve. Mal. 5:1; Luk. 8:26

²⁹ Buna, bau bokaka, kutuba: Nge mwana ya Nzambi, nki mambu ikele na beto ye nge ? Nge kwiza kumonisa beto mpasi ntete ntangu imene kulunga ?

³⁰ Kansi ntama mingi na bau, kibuka ya bangulu mingi vandaka kudia.

³¹ Bampeve mbi bombidilaka yandi kutuba: Kana nge basisa beto, fidisa beto kukota mu kibuka ya bangulu.

³² Yandi tubaka kwa bau: Kwenda! Bau basikaka ye kotaka mu bangulu. Tala kibuka yamvimba kulumukaka ntinu ku nsi ya mongo mu mbu, ye bau kufwaka mu masa.

³³ Kansi bau ya pesaka bau madia tinaka, bau kwendaka ku mbanza ye tubaka mambu yonso, ye yonso ya kubwilaka bau ya bakama na bampeve mbi.

³⁴ Tala, mbanza ya mvimba basikaka kukutana na Yesu; bu bau monaka yandi, bau bombidilaka yandi kukatuka na nsi ya bau.