Matai 7 - Le Nouveau Testament en Kikwango 1950

Yesu manisa kulonga va mongo

¹ Fundisa ve, ye beno tafunduswa ve. Luk. 6:37; Lom. 2:1; 1 Kol. 4:5; Yak. 4:11

² Kadi na mfundusu ya beno fundisa, beno tafunduswa; ye kitezo ya beno teza yo tatezwa kwa beno. Mal. 4:24; Luk. 6:38

³ Sambu ma nki nge mona kanti ya ikele mu disu ya mpangi ya nge, kansi nge tala ve nti ya nene ya ikele mu disu ya nge ? Luk. 6:41

⁴ Keti nki mpila nge tatuba kwa mpangi ya nge: Bika mono katula kanti na disu ya nge, ye tala, nti ikele mu disu ya nge kibeni ?

⁵ Nge nkwa luvunu, ntete katula nti yanene na disu ya nge kibeni, buna nge tamona mbote kukatula kanti na disu ya mpangi ya nge.

⁶ Pesa yina ya ikele nlongo kwa bambwa ve, mpe losa ve matadi nzimbu ya beno nantwala ya bangulu, kadi bau tadiata yau nansi ya bitambi ya bau ye pinduka ye lwadisa beno.

⁷ Lomba ye yo tapeswa kwa beno, sosa ye beno tamona, kunkuta ye yo takangulwa kwa beno. Mat. 21:22; Mal. 11:24; Luk. 11:9; Yoa. 14:13; 15:7; 16:23; 1 Yoa. 3:22

⁸ Kadi konsonani ya lomba tabaka, konsonani ya sosa tamona, konsonani ya kunkuta yo takangulwa. Yak. 1:5-6

⁹ Muntu nki nakati ya beno, kana mwana ya yandi lomba dimpa, yandi tapesa yandi ditadi ? Luk. 11:11

¹⁰ Keti kana yandi lomba mbizi ya masa, yandi tapesa yandi nioka ?

¹¹ Buna kana beno ya ikele mbi zaba kupesa bana ya beno matabisi ya mbote, buna Tata ya beno, ya ikele mu zulu taluta kupesa bima ya mbote kwa bau ya lomba yandi ?

¹² Sambu na yai, konso nki ya beno zola bantu kusadila beno, yina beno sadila bau mpe, kadi yai ikele nsiku ye bambikudi. Mat. 22:39, 40; Luk. 6:31; Lom. 13:8, 10; Ngal. 5:14; 1 Tim. 1:5

¹³ Kota mu mwelo ya fioti, kadi mwelo ikele nene ye nzila ikele nene ya kulumuka ku lufwa, ye mingi ikele kukota muna.

¹⁴ Kadi mwelo ikele fioti ye nzila ikele fioti ya twala ku moyo, kansi ndambu ikele kumona yo.

¹⁵ Dikeba sambu na bambikudi ya luvunu, ya kwiza kwa beno mu mvwatu ya mameme, kansi nakati bau ikele bambizi ya makasi. Mika 3:5; 2 Tim. 3:5

¹⁶ Beno tazaba bau sambu na mabundu ya bau. Bantu ikele kubuka mabundu ya vinia na nti ya nsende, keti figi na matiti ya nsende ?

¹⁷ Mpilayai mpe, nti yonso ya mbote ikele kubuta mabundu ya mbote, kansi nti ya mbi ikele kubuta mabundu ya mbi. Mat. 12:33; Luk. 6:43, 44

¹⁸ Nti ya mbote lenda ve kubuta mabundu ya mbi, ye nti ya mbi mpe lenda ve kubuta mabundu ya mbote.

¹⁹ Konso nti ya buta mabundu ya mbote ve tazengwa ye loswa mu tiya. Mat. 3:10; Yoa. 15:2, 6

²⁰ Mpilayai beno tazaba bau sambu na mabundu ya bau.

²¹ Ikele yonso ve ya tuba kwa mono, Mfumu, Mfumu, takota mu zulu. Kansi yandi ya sala lusolo ya Tata ya mono ya ikele mu zulu. Hos. 8:2; Luk. 6:46; Lom. 2:13; Yak. 1:22

²² Mu lumbu yina mingi tatuba kwa mono: Mfumu, Mfumu, mono imene kubikula mu nkumbu ya nge ve ? Beto imene kubasisa bampeve mbi mu nkumbu ya nge ve ? Ye imene kusala bisalu ya ngolo mu nkumbu ya nge ve ?

²³ Buna mono tatuba kwa bau: Mono imene kuzaba beno ta mbala mosi ve, katuka na mono, beno ya sala mbi. Nk. 6:8; Mat. 25:12, 41; Luk. 13:26, 27

²⁴ Sambu na yai, konso muntu ya kuwa mambu yai ya mono, ye sala yau; ikele mpilamosi bakala ya ngangu, ya tungaka nzo ya yandi va ditadi. Luk. 6:47, 48

²⁵ Mvula kubwaka ye nkuka kwizaka ye mupepe vevumukaka ye bulaka nzo yina, ye yo kubwaka ve, kadi lufulu tulwaka va ditadi.

²⁶ Konso muntu ya kuwa mambu ya mono, ye sala yau ve, ikele mpilamosi bakala ya nzoba, ya tungaka nzo ya yandi va zelo.

²⁷ Mvula kubwaka ye nkuka kwizaka ye mupepe vevumukaka ye bulaka nzo yina, ye yo kubwaka, ye mbwilu ya yo vandaka ya nene.

²⁸ Yo vandaka, bu Yesu manisaka mambu yai, bibuka yitukaka sambu na malongi ya yandi.

²⁹ Kadi yandi longaka bau mpilamosi yandi ikele na ngolo, ye mpilamosi bansoniki ya bau ve. Mat. 1:22; Luk. 4:32; Yoa. 7:45