Matai 6 - Le Nouveau Testament en Kikwango 1950

Yesu longa va mongo

¹ Toma tala, na beno sala ve lunungu ya beno nantwala ya bantu, sambu na kumonikwa kwa bau; kana mpilayai beno ikele na nsendo ve ya Tata ya beno ya ikele mu zulu. Lom. 12:8

² Mpilayai, kana nge pesa matabisi ya nkenda, bula mpungi ve nantwala na nge, bonso bankwa luvunu ikele kusala mu banzo ya sambilu ye mu banzila, na bau lenda kubaka nkembo ya bantu. Kieleka mono tuba kwa beno: Bau imene kubaka nsendo ya bau.

³ Kansi bu nge pesa matabisi ya nkenda, zabisa ve diboko kinkento ya nge ya diboko kibakala ya nge ikele kusala,

⁴ na matabisi ya nkenda ya nge lenda kuvanda mu kinsweki; ye Tata ya nge ya tala mu kinsweki tavutudila nge. Luk. 14:14

⁵ Bu beno lomba, vanda ve bonso bankwa luvunu, kadi bau zola kutelema ye lomba mu banzo ya sambilu, ye mu fuma ya banzila, na bau lenda kumonika kwa bantu. Kieleka mono tuba kwa beno: Bau imene kubaka nsendo ya bau.

⁶ Kansi bu nge lomba, kota mu nzo ya nge ya kati, bu nge imene kukanga kielo ya nge, lomba Tata ya nge ya ikele mu kinsweki: Tata ya nge ya tala mu kinsweki tavutudila nge.

⁷ Kansi bu nge lomba, tuba bituba-tuba ve bonso bapaien sala, kadi bau banza bau takuwilwa sambu na ndinga mingi ya bau.

⁸ Sambu na yai vanda ve bonso bau, kadi Tata ya beno zaba nsatu ya beno ntete na beno lomba yandi.

⁹ Sambu na yai beno lomba mpilayai: Tata ya beto ya ikele mu zulu, bika nkumbu ya nge zitiswa; Luk. 11:2

¹⁰ bika kimfumu ya nge kwiza; bika luzolo ya nge salwa va ntoto bonso mu zulu,

¹¹ madia ya beto ya lumbu na lumbu, pesa beto lumbu yai,

¹² vidisa mfuka ya beto bonso beto mpe imene kuvidisa bau ya ikele na beto mfuka,

¹³ twala beto mu mpukumunu ve, kansi vulusa beto na nkwa mbi. Kadi kimfumu ye ngolo ye nkembo ikele ya nge mvu ya mvu. Amen.

¹⁴ Kadi kana beno vidisa masumu ya bantu, Tata ya beno ya zulu tavidisa beno mpe. Mat. 5:23; Mal. 11:25; Kolo. 3:13

¹⁵ Kansi kana beno vidisa ve masumu ya bantu, Tata ya beno tavidisa ve masumu ya beno. Mat. 18:35; Yak. 2:13

¹⁶ Bu beno buya madia, vanda ve na luse ya ntantu bonso bankwa luvunu, sambu na bau ikele kupindula luse ya bau, na bau lenda kumonika kwa bantu na bau ikele kubuya madia. Kieleka mono tuba kwa beno. Bau imene kubaka nsendo ya bau.

¹⁷ Kansi bu nge buya madia, sita ntu ya nge na mafuta ye sukula luse ya nge,

¹⁸ na nge tamonika ve kwa bantu, nge ikele kubuya madia, kansi kwa Tata ya nge ya ikele mu kinsweki; ye Tata ya nge ya tala mu kinsweki tavutudila nge.

¹⁹ Dibumbila bima ya ntalu va ntoto ve, sika ya banyama ye nkazu ikele kubivisa yau, ye bamwivi ikele kutima ye kuyiba; Bing. 23:4

²⁰ kansi dibumbila bima ya ntalu ya beno mu zulu, sika ya banyama ye kubaka matadi ikele kubivisa yau ve, ye bamwivi ikele kutima ye kuyiba ve; Mat. 19:21; Luk. 12:33; 1 Tim. 6:9, 18-19

²¹ kadi sika ya kima ya ntalu ya nge ikele, kuna ntima ya nge ikele mpe.

²² Mwinda ya nitu ikele disu. Mpilayai kana disu ya nge ikele mbote, nitu ya nge yonso tafuluka na mwini. Luk. 11:34

²³ Kansi kana disu ya nge ikele mbi, nitu ya nge yonso tafuluka na tombe. Mpilayai kana mwini ya ikele mu nge ikele tombe buna tombe yina ikele kuluta mingi.

²⁴ Muntu lenda ve kusadila bamfumu zole, kadi yandi tavanda na makasi na mosi ye zola yankaka, keti yandi tavanda na mosi ye saula yankaka. Beno lenda ve kusadila Nzambi ye kimvwama. Luk. 16:13

²⁵ Sambu na yai mono tuba kwa beno: Vanda na mbanza ve sambu na moyo ya beno, na beno takudia nki, keti beno takunwa nki, keti sambu na nitu ya beno, na beno tavwata nki. Moyo luta madia ve, ye nitu luta mvwatu ve ? Luk. 12:22; Fili. 4:6; 1 Tim. 6:8; Eb. 13:5; 1 Pet. 5:7

²⁶ Tala bandeke ya zulu, bau ikele kukuna ve kubuka ve ye kutikisa ve mu lundulu: kansi Tata ya beno ya zulu ikele kudikila bau. Beno luta bau ntalu mingi ve ? Yobi 39:3; Nk. 147:9; Luk. 12:24

²⁷ Nani ya beno mu mabanza ya yandi lenda kuyika centimetela makumi tanu ku nda ya yandi ?

²⁸ Sambu ya nki beno vanda na mabanza sambu na mvwatu ? Tala, bintuntu ya nseke, bonso yau kula. Yau sala ve ye tunga bwanda ve.

²⁹ Kansi mono tuba kwa beno, Solomo na nkembo ya yandi yonso vwataka ve bonso mosi ya bayai.

³⁰ Kansi kana Nzambi vwatisa matiti ya nseke mpilayina, ya ikele bubu ye mbazi taloswa mu foloni, buna yandi taluta vwatisa beno, beno bankwa lukwikilu fioti.

³¹ Sambu na yai vanda na mabanza ve kutuba: Beto takudia nki ? Keti beto takunwa nki ? Keti beto tavwata nki ?

³² Kadi bapaien ikele kusosa bima yai yonso. Kadi Tata ya beno ya zulu, ikele kuzaba na beno ikele na nsatu ya bima yai yonso. Nk. 55:2

³³ Kansi beno sosa ntete kimfumu ya Nzambi ya lunungu ya yandi, ye bima yai yonso mpe tapeswa kwa beno.

³⁴ Sambu na yai, vanda na mabanza ve ya mbazi, kadi mbazi tavanda na mabanza ya yo mosi. Lumbu ye mbi na yo ikele kulunga.