Matai 5 - Le Nouveau Testament en Kikwango 1950

Yesu yantika kulonge va mongo

¹ Bu yandi monaka bibuka, yandi tombokaka va mongo; bu yandi vandaka, banlonguki ya yandi kwizaka kwa yandi.

² Yandi kangulaka munoko ya yandi ye longaka bau:

³ Kiese ikele na bansukami mu mpeve, kadi kimfumu ya zulu ikele ya bau. Luk. 6:20

⁴ Kiese ikele na bau ya ikele na kiadi, kadi bau tabombwa. Yes. 61:2; Luk. 6:21

⁵ Kiese ikele na banlembami, kadi bau tabaka difwa ya ntoto.

⁶ Kiese ikele na bau ya ikele na nzala ye kiwini ya lunungu, kadi bau tayukutisawa. Yes. 55:1; 66:13; Mat. 11:28; Yoa. 6:35

⁷ Kiese ikele na bau ya kuwila nkenda, kadi bau tawilwa nkenda.

⁸ Kiese ikele na bau ya ikele vedila mu ntima, kadi bau tamona Nzambi. Nk. 24:4; 1 Kol. 13:12; Eb. 12:4; 1 Yoa. 3:2

⁹ Kiese ikele na bau ya sala yenge, kadi bau tabingwa bana ya Nzambi.

¹⁰ Kiese ikele na bau ya zomwa sambu na lunungu, kadi kimfumu ya zulu ikele ya bau. 1 Tim. 2:12; 1 Pet. 3:14

¹¹ Kiese ikele na beno, bu bantu finga beno ye zoma beno, ye bu bau tatuba luvunu ye tuba beno ikele mbi sambu na mono. Luk. 6:22; 1 Pet. 4:14

¹² Vanda na kiese ye yangalala mingi, kadi nsendo ya beno mu zulu ikele nene, sambu na mpilayai bau zomaka bambikudi ya vandaka nantwala ya beno.

¹³ Beno ikele mungwa ya ntoto; kansi kana mungwa katuka nzenzo, mu nki yo tazenzulwa diaka ? Yo ikele na mfunu diaka ve, kansi kuloswa ye bantu diata yo na makulu. Mal. 9:50; Luk. 14:34

¹⁴ Beno ikele mwini ya nsi. Bwala ya ikele va mongo lenda swekwa ve. 2 Kol. 4:6; Fili. 2:15

¹⁵ Mpe bantu kwika mwinda ve ye tula yo nansi ya kitunga, kansi va meza ya mwinda, ye yo kienzudila bantu yonso ya ikele mu nzo. Mal. 4:21; Luk. 8:16; 11:33

¹⁶ Mpilayai, bika mwini ya beno kienzula nantwala ya bantu, na bau lenda kumona bisalu ya beno ya mbote, ye kembila Tata ya beno ya ikele mu zulu. 1 Pet. 2:12

¹⁷ Banza ve mono kwizaka kufwa nsiku keti bambikudi; mono kwizaka ve kufwa yo, kansi kulungisa yo.

¹⁸ Kadi kieleka mono tuba kwa beno: Ti zulu ye ntoto mana, kisoni fioti keti kitini mosi ya kisoni takatuka na nsiku ve, ti mambu yonso maniswa. Luk. 16:17; 21:33

¹⁹ Konsonani ya takufwa nsikudukusu mosi ya fioti yai ye longa bantu mpilayai, yandi tabingwa ya fioti mu kimfumu ya zulu; kansi konsonani ya sala yau ye longa yau, yandi tabingwa ya nene mu kimfumu ya zulu. Yak. 2:10

²⁰ Kadi mono tuba kwa beno: Kana lunungu ya beno luta ve yina ya basoniki ye bafalisi, beno takota tafioti ve mu kimfumu ya zulu. Mat. 23:25; Luk. 11:39

²¹ Beno imene kuwa na yo tubwaka kwa bankulu: Nge takufwa muntu ve, ye konsonani ya kufwa muntu tabaka dikambu ya mfundusu. 2 Mose 20:13; 5 Mose 5:7

²² Kansi mono tuba kwa beno: Konsonani ya ikele na makasi na mpangi ya yandi, yandi ikele mu mfundusu ya yo; ye konsonani ya tuba kwa mpangi ya yandi: Nge nzoba, yandi tabaka dikambu ya bamayala; kansi konsonani ya tuba: Nge nzoba, yandi tabaka dikambu ya bilungi ya tiya. Nk. 4:4; 1 Yoa. 3:11, 23

²³ Sambu na yai, kana nge ikele kutula nkailu ya nge va zikwa, ye kuna nge bambuka na mpangi ya nge ikele na nge mambu, Mat. 6:14; Mal. 11:25

²⁴ bika nkailu ya nge kuna nantwala ya zikwa, ye kwenda ntete kuyidika mambu na mpangi ya nge, buna kwiza kupesa nkailu ya nge.

²⁵ Yidika mambu na mbeni ya nge nswalu, bu nge ikele na yandi mu nzila, keti mbeni ya nge tayekula nge kwa mfundusu, ye mfundusu kwa polisi, ye nge tatulwa mu boloko. Luk. 12:58; Ef. 4:26

²⁶ Kieleka mono tuba kwa nge: Nge tabasika kuna ve, ti nge futa mfuka yonso, na dikuta mosi bika ve.

²⁷ Beno imene kuwa yina ya tubwaka: Sala bizumba ve. 2 Mose 20:14; 5 Mose 5:18

²⁸ Kansi mono tuba kwa beno: Konsonani ya tala nkento mu lusolo ya mbi, imene kusala bizumba na yandi mu ntima ya yandi. Yobi 31:1

²⁹ Kana disu ya nge ya kibakala tesisa nge sakuba, katula yo ye losa yo; kadi yo luta mbote na kiela mosi ya nitu ya nge kufwa keti nitu ya nge yamvimba loswa mu bilungi. Mat. 18:8; Mal. 9:43

³⁰ Kana diboko ya nge ya kibakala tesisa nge sakuba, zenga yo ye losa yo, kadi yo luta mbote na kiela mosi ya nitu ya nge kufwa keti na nitu ya nge yamvimba loswa mu bilungi.

³¹ Yo tubwaka diaka: Konsonani ya bika nkento ya yandi, bika yandi pesa yandi nkanda ya kufwa makwela. 5 Mose 24:1

³² Kansi mono tuba kwa beno: Konsonani ya bika nkento ya yandi, kana yo ikele ve sambu na bizumba, yandi kitula yandi nkwa bizumba, ye konsonani ya kwela na yandi, bu yandi imene kukatulwa, yandi sala bizumba. Luk. 16:18; 1 Kol. 7:10

³³ Diaka beno imene kuwa na yo tubwaka kwa bankulu: Kudia ve ndefi ya luvunu, kansi nge tasadila Mfumu ndefi ya nge. 2 Mose 20:7; 3 Mose 19:12; 4 Mose 30:3; 5 Mose 5:11; Yes. 65:16

³⁴ Kansi mono tuba kwa beno: Kudia ndefi ta mbala mosi ve, ya zulu ve, kadi yo ikele kiti ya nkembo ya Nzambi.

³⁵ Kudia ndefi ve ya ntoto kadi yo ikele mfiduku ya makulu ya yandi, ye ya Yelusalemi ve, kadi yo ikele mbanza ya Ntinu ya nene. Nk. 48:2; Yes. 66:1

³⁶ Kudia ve ndefi na ntu ya nge, kadi nge lenda ve kukitula nsuki mosi mpembe keti ndombe.

³⁷ Bika mambu ya beno vanda: E, e, ve, ve; konso nki ya luta yai katuka na nkwa mbi. Yak. 5:12

³⁸ Beno imene kuwa na yo tubwaka: Disu na disu ye dinu na dinu. 2 Mose 21:24; 3 Mose 24:20; 5 Mose 19:21

³⁹ Kansi mono tuba kwa beno: Buya ve yandi ya ikele mbi, kansi konsonani ya bula nge na bundi ya kibakala, pindudila yandi yankaka mpe. Bing. 20:22; 24:2, 9; Luk. 6:29; Lom. 12:17; 1 Tes. 5:15; 1 Pet. 3:9

⁴⁰ Konso muntu ya zola kwenda na nge kwa mfundusi ye baka kinkutu ya nge, bikila yandi mpe kazaku ya nge.

⁴¹ Konsonani ya tambudisa nge kilometela mosi, kwenda na yandi zole.

⁴² Pesa kwa yandi ya lomba na nge, yandi ya zola kuleva na nge, buya yandi ve. 5 Mose 15:7

⁴³ Beno imene kuwa na yo tubwaka: Zola bamfinangani ya nge, ye vanda na makasi na mbeni ya nge. 3 Mose 19:18

⁴⁴ Kansi mono tuba kwa beno: Zola bambeni ya beno, ye lombila bau ya zoma beno, 3 Mose 19:18; Luk. 6:27, 35; 23:34; Bis. 7:60; Lom. 12:14, 20; 1 Kol. 4:12

⁴⁵ na beno lenda kuvanda bana ya Tata ya beno ya ikele mu zulu, kadi yandi kutelemisa ntangu ya yandi va ya mbi ye va mbote, ye yandi nokisa mvula va ya lunungu ye va konda lunungu,

⁴⁶ Kadi kana beno zola bau ya zola beno, beno ikele na nsendo nki ? Bamfutisi sala ve mpilayai ? Luk. 6:32

⁴⁷ Kana beno pesa mbote kwa bampangi ya beno kaka, beno sala nki ya luta bankaka ? Bapaien sala ve mpilayai ?

⁴⁸ Sambu na yai beno vanda ya lunga, bonso Tata ya beno mu zulu ikele ya lunga. 3 Mose 11:44; 19:2; 20:7, 26