Matai 28 - Le Nouveau Testament en Kikwango 1950

Bamaria kwenda kutala ndiamu

¹ Bu lumbu ya Luvundu zolaka kumana, bu kuma kia na kilumbu ya ntete na kilumbu ya luvundu, buna Malia Mangadala ya Malia yankaka kwizaka kutala ndiamu. Mal. 16:1; Luk. 24:1; Yoa. 20:1

² Tala, ndikunu ya nene ya ntoto vandaka, sambu na wanjo ya Mfumu kulumukaka tuka zulu ye kwizaka ye nengumunaka ditadi, ye vandaka va yo.

³ Luse ya yandi vandaka bonso nzazi, ye mvwatu ya yandi vandaka mpembe bonso mvula ya mpembe.

⁴ Sambu na boma ya yandi, minkengi zakamaka ye vandaka bonso bafwa.

⁵ Wanjo vutulaka ye tubaka kwa bankento: Vanda na boma ve, sambu na mono zaba beno ikele kusosa Yesu ya komwaka va kulunsi.

⁶ Yandi ikele awa ve, kadi yandi imene kufulukiswa, bonso yandi tubaka, kwiza, tala sika ya yandi lalaka. Mat. 12:40; 16:21; 17:23

⁷ Kwenda nswalu ye tuba kwa banlonguki ya yandi, yandi imene kufulukiswa tuka bafwa; kansi tala, yandi ikele kwenda nantwala na beno ku Ngalili; kuna beno tamona yandi. Tala, mono imene kutuba kwa beno. Mat. 26:32

⁸ Bau katukaka nswalu na ndiamu, na boma ye kiese mingi, bau kwendaka nswalu kutuba kwa banlonguki ya yandi.

⁹ Tala, Yesu kutanaka na bau, yandi tubaka: Vanda na kiese! Kansi bau kwizaka ye simbaka makulu ya yandi ye sambilaka yandi.

¹⁰ Buna Yesu tubaka kwa bau: Vanda na boma ve, kwenda kutuba kwa bampangi ya mono, bau takwenda ku Ngalili, kuna bau tamona mono. Yoa. 20:17; Bis. 1:3; 13:31; 1 Kol. 15:5

Minkengi vutuka ku mbanza

¹¹ Bu bau ikele kwenda, tala, bankaka ya minkengi kwizaka ku mbanza ye tubaka kwa bambuta banganga mambu yonso ya kubwaka.

¹² Bu bau kutakanaka na bambuta ya bantu, bau tubanaka, ye pesaka basoldat mbongo mingi;

¹³ bau tubaka: Beno tuba: Banlonguki ya yandi kwizaka mu mpimpa, ye yibaka yandi, bu beto lalaka tulu.

¹⁴ Kana nyadi kuwa mambu yai, beto takwikidisa yandi ye vulusa beno.

¹⁵ Bau bakaka mbongo, ye salaka bonso bau longaka bau. Mambu yai mwanganaka nakati na baYuda ti kilumbu yai.

Yesu sikidikisa banlonguki kulonga makanda yonso

¹⁶ Kansi banlonguki kumi ye mosi kwendaka ku Ngalili ku mongo ya Yesu sikidikisaka bau.

¹⁷ Bu bau monaka yandi, bau sambilaka yandi, kansi bankaka vandaka na ntembe.

¹⁸ Yesu kwizaka kutuba kwa bau: Ngolo yonso imene kupeswa kwa mono mu zulu ye va ntoto. Nk. 2:6; Mat. 11:27; Yoa. 3:35; 13:3; 17:2; Ef. 1:22; Eb. 1:2; 2:8

¹⁹ Sambu na yai, kwenda kusala makanda yonso ya bantu banlonguki ya mono, botika bau mu nkumbu na Tata ye Mwana ye Mpeve Yanlongo; Luk. 24:47

²⁰ longa bau kukeba mambu yonso ya mono sikidikisaka beno. Tala, mono ikele na beno bilumbu yonso, ti nsuka ya ntangu.