Matai 25 - Le Nouveau Testament en Kikwango 1950

Yesu fwanikisa kwiza ya yandi mu kingana ya bandumba kumi

¹ Buna kimfumu ya zulu tavanda mpilamosi bandumba kumi ya bakaka minda ya bau, ye kwendaka kutakana na toko ya makwela.

² Tanu vandaka nzoba ye tanu vandaka na ngangu.

³ Bau ya nzoba bakaka minda ya bau, kansi bakaka mafuta ve.

⁴ Bau ya ngangu bakaka mafuta mu mumbwa ya bau sikamosi na mvinda ya bau.

⁵ Bu toko ya makwela vingilaka, bau yonso lekaka ye lalaka tulu.

⁶ Kansi mu katikati ya mpimpa mbokolo vandaka: Tala, toko ya makwela! Basika ye kutana na yandi!

⁷ Buna bandumba yonso telemaka ye yidikaka minda ya bau.

⁸ Bau ya nzoba tubaka kwa bau ya ngangu: Pesa beto ndambu ya mafuta ya beno, kadi ya beto ikele kuzima.

⁹ Bau ya ngangu vutulaka, kutuba: Yo lunga ve kwa beto ye beno. Kwenda kwa bateki ya yau, ye disumbila.

¹⁰ Bu bau kwendaka kusumba, toko ya makwela kwizaka, ye bau ya vanda kuyidikwa kotaka na yandi mu fete ya makwela, ye kielo kangaka.

¹¹ Bandumba yankaka kwizaka ye tubaka: Mfumu, mfumu, kangudila beto.

¹² Kansi yandi vutulaka ye tubaka: Kieleka, mono tuba kwa beno: Mono zaba beno ve. Mat. 7:23; Luk. 13:25

¹³ Sambu na yai, beno tomatala, kadi beno zaba ve lumbu keti lokula yina. Mat. 24:42, 44; Mal. 13:33, 35; Luk. 21:36; 1 Kol. 16:13; 1 Pet. 5:8; Nzai. 16:15

Muntu pesaka batalanta kwa basadi ya yandi

¹⁴ Yo ikele mpilamosi muntu ya kwendaka ku ntoto yankaka, yandi bingaka bampika ya yandi, ye pesaka bau mbongo ya yandi. Luk. 19:11

¹⁵ Yandi pesaka mbongo talanta tanu kwa mosi, ye zole kwa yankaka, ye mosi kwa yankaka, kwa muntu na muntu bonso yandi lenda; buna yandi kwendaka ku nsi yankaka.

¹⁶ Yandi ya bakaka talanta tanu, kwendaka nswalu ye sumbaka ye tekaka na yau, ye bakaka talanta tanu yankaka ndandu.

¹⁷ Mpilayai mpe yandi ya bakaka zole, bakaka zole yankaka ndandu.

¹⁸ Kansi yandi ya bakaka mosi, kwendaka ye timaka mu ntoto ye swekaka mbongo ya mfumu ya yandi.

¹⁹ Ntangu mingi nanima, mfumu ya bampika yina kwizaka, ye tangaka ntalu ya bau.

²⁰ Yandi ya bakaka talanta tanu, kwizaka na talanta tanu yankaka, kutuba: Mfumu, nge pesaka mono talanta tanu; tala, talanta tanu yankaka ya mono imene kubaka ndandu.

²¹ Mfumu ya yandi tubaka kwa yandi: Mbote, nge mpika ya mbote ye ya kwikama; nge imene kuvanda kwikama na bima ndambu, mono tatula nge va zulu ya bima mingi. Kota mu kiese ya mfumu ya nge. Mat. 24:47; Luk. 22:29

²² Yandi mpe ya bakaka talanta zole kwizaka, ye tubaka: Mfumu, nge pesaka mono talanta zole, tala, talanta zole yankaka ya mono imene kubaka ndandu.

²³ Mfumu ya yandi tubaka kwa yandi: Mbote, nge mpika ya mbote ye ya kwikama; nge imene kuvanda kwikama va bima ndambu, mono tatula nge va zulu ya bima mingi: Kota mu kiese ya Mfumu ya nge.

²⁴ Yandi mpe ya bakaka talanta mosi kwizaka, ye tubaka: Mfumu, mono zabaka nge ikele muntu ya makasi, nge ikele kuyonzika ya nge kunaka ve, ye kutikisa ya nge mwangisaka ve.

²⁵ Mono vandaka na boma ye kwendaka ye swekaka mbongo talanta ya nge mu ntoto. Tala, ya nge yo yai.

²⁶ Mfumu ya yandi vutulaka, ye tubaka kwa yandi: Nge mpika ya mbi ye ya bumolo, nge zabaka na mono yonzika ya mono kunaka ve, kutikisa ya mono mwangisaka ve.

²⁷ Buna mbote kana nge tulaka mbongo ya mono mu nzo ya mbongo, ye bu mono vutukaka, mono zolaka kubaka ya mono ye ndandu.

²⁸ Sambu na yai, beno baka talanta ya yandi, ye pesa yo kwa yandi ya ikele na talanta kumi.

²⁹ Kadi konsonani ya ikele na yo, tapeswa, ye yandi tavanda na mingi; kansi yandi ya ikele na yo ve, bau tabaka mpe ya ikele na yandi. Mat. 13:12; Mal. 4:25; Luk. 8:18

³⁰ Kansi losa mpika ya konda mfunu mu tombe ya nganda. Kuna tavanda kudila ye nkwetoso ya meno.

Mfundusu ya makanda bu yandi kwiza

³¹ Bu Mwana ya muntu takwiza mu nkembo ya yandi, ye banjo yonso sikamosi na yandi, buna yandi tavanda va kiti ya nkembo ya yandi. Zak. 14:5; Mat. 16:27; 1 Tes. 4:16; 2 Tes. 1:7; Yud. 14

³² Makanda yonso takutakana nantwala na yandi, ye yandi takabisa bau mpilamosi mvungi kabisa mameme ye bankombo. Lom. 14:10; 2 Kol. 5:10; Yeh. 34:17, 20

³³ Yandi tatula mameme va diboko kibakala ya yandi, kansi bankombo va diboko kinkento.

³⁴ Buna Ntinu tatuba kwa bau va diboko kibakala: Kwiza beno bankwa lusakumunu ya Tata ya mono, baka difwa ya kimfumu ya yidikilwaka beno tuka lufulu ya nsi.

³⁵ Kadi mono vandaka na nzala, ye beno pesaka mono ya kudia; mono vandaka na kiwini, ye beno pesaka mono ya kunwa; mono vandaka nzenza ye beno bakaka mono; Yes. 58:7; Yeh. 18:7

³⁶ mono kondaka lele ye beno vwatisaka mono; mono vandaka na maladi ye beno kwizaka kutala mono; mono vandaka mu boloko ye beno kwizaka kwa mono. Yak. 1:27

³⁷ Buna balunungu tavutula ye tuba kwa yandi: Mfumu, ntangu nki beto monaka nge na nzala ye pesaka nge ya kudia, keti na kiwini ye pesaka nge ya kunwa ?

³⁸ Kilumbu nki beto monaka nge nzenza ye bakaka nge, keti ya konda lele ye vwatisaka nge ?

³⁹ Kilumbu nki beto monaka nge na maladi keti mu boloko, ye beto kwizaka kwa nge ?

⁴⁰ Ntinu tavutula ye tuba kwa bau: Kieleka, mono tuba kwa beno: Mpilamosi beno salaka yo kwa mosi ya bampangi ya mono yai ya luta fioti, beno salaka yo kwa mono. Bing. 19:17; Eb. 6:10

⁴¹ Buna yandi tatuba kwa bau va diboko kinkento ya yandi: Katuka na mono, beno ya ikele na ndola, ye kwenda mu tiya ya mvu ya mvu, ya yidikwa sambu na diable ye banjo ya yandi. Nk. 6:8; Mat. 7:23; Luk. 13:27

⁴² Kadi mono vandaka na nzala ye beno pesaka mono ya kudia ve; mono vandaka na kiwini ye beno pesaka mono ya kunwa ve;

⁴³ mono vandaka nzenza ye beno bakaka mono ve; mono kondaka lele ye beno vwatisaka mono ve; mono vandaka na maladi ye mu boloko, ye beno kwizaka ve kutala mono.

⁴⁴ Buna bau mpe tavutula kutuba: Mfumu, ntangu nki beto monaka nge na nzala keti na kiwini keti nzenza keti ya konda lele keti na maladi keti mu boloko, ye beto sadilaka nge ve ?

⁴⁵ Buna yandi tavutula ye tuba kwa bau: Kieleka mono tuba kwa beno: Mpilamosi beno salaka yo ve kwa mosi ya bayai ya luta fioti, beno salaka yo kwa mono ve.

⁴⁶ Bayai takwenda ku mpasi ya mvu ya mvu, kansi balunungu ku moyo ya mvu ya mvu. Dan. 12:2; Yoa. 5:29