Matai 24 - Le Nouveau Testament en Kikwango 1950

Yesu tuba sambu na kubwa ya tempelo

¹ Yesu basikaka na tempelo ye kwendaka kutambula; banlonguki ya yandi kwizaka kwa yandi kusonga yandi bantungulu ya tempelo. Mal. 13:1; Luk. 21:5

² Yandi vutulaka ye tubaka kwa bau: Beno mona yai yonso ? Kieleka, mono tuba kwa beno: Awa ditadi mosi tabikwa ve va ditadi yankaka, yau yonso takubwa. 1 Nt. 9:7; Mika 3:12

³ Kansi, bu yandi vandaka va mongo ya Olive, banlonguki kwizaka kwa yandi mu kinsona, kutuba: Tuba kwa beto, nki kilumbu mambu yai tasalwa, ye nki kidimbu ya kwiza ya nge, ye ya nsuka ya ntangu ?

⁴ Yesu vutulaka ye tubaka kwa bau: Tomatala, na muntu kusa beno ve, Ef. 5:6; Kolo. 2:8; 2 Tes. 2:3

⁵ Kadi mingi takwiza mu nkumbu ya mono, kutuba: Mono ikele Klisto, ye takusa bantu mingi.

⁶ Beno takuwa bamvita ye nsangu ya bamvita. Tala, na beno tita ve, kadi mambu yai fwiti kwiza, kansi nsuka imene kwiza ntete ve.

⁷ Kadi kikanda ya bantu tanwana na kikanda ya bantu, ye kimfumu na kimfumu, ye malema tavanda, ye ndikunu ya ntoto mu sika ye sika.

⁸ Kansi mambu yai yonso ikele luyantiku ya mpasi yina.

⁹ Buna bau tayekula beno kwa kumoniswa ya mpasi, ye takufwa beno, ye makanda yonso ya bantu tavanda na kimbeni kwa beno sambu na nkumbu ya mono. Mat. 10:17; Yoa. 15:19; 16:2

¹⁰ Buna bantu mingi tasakuba, ye tayekulana, ye tavandana na kimbeni.

¹¹ Ye bambikudi mingi ya luvunu tatelema ye kusa bantu mingi.

¹² Sambu na kimpumbulu takwiza mingi, zola ya bantu mingi takwiza madidi.

¹³ Kansi yandi ya vibidila ti na nsuka, tavuluswa.

¹⁴ Nsamu yai ya mbote ya kimfumu tasamunwa mu nsi yonso ya ikele na bantu, sambu na kitemo kwa makanda yonso ya bantu, buna nsuka takwiza.

¹⁵ Buna, bu beno mona mbungulu ya kufwa, ya mbikudi Danieli bikulaka, ikele kutelema na sika ya nlongo (konsonani ya tanga, bika yandi zaba), Dan. 9:27; 12:11; Luk. 17:31

¹⁶ buna bau ya ikele mu Yuda, bika bau tinina ku miongo;

¹⁷ yandi ya ikele va nludi, bika yandi kulumuka ve kubaka bima ya ikele mu nzo ya yandi;

¹⁸ yandi ya ikele mu dilanga, bika yandi vutuka ve kubaka kazaku ya yandi.

¹⁹ Kansi ntantu kwa bau ya ikele na divumu, ye bau ya yamwisa mu bilumbu yina.

²⁰ Lomba na kutina ya beno tavanda ve mu nsungi ya madidi, keti mu kilumbu ya luvundu.

²¹ Kadi mpasi mingi tavanda, mutindu ya imene kuvanda ntete ve tuka na luyantiku ya nsi, ti ntangu yai, ye yo tavanda diaka ve.

²² Kana bilumbu yina zengwa nkufi ve, nsuni mosi vuluswa ve, kansi sambu na basolwa, bilumbu yina zengwa nkufi.

²³ Buna kana muntu tuba kwa beno: Tala, Klisto ikele awa, keti kuna, kwikila yo ve. Luk. 17:23; 21:8

²⁴ Kadi baklisto ya luvunu ye bambikudi ya luvunu tatelema ye songa bidimbu ya nene, ye mambu ya nyitukulu, sambu na kukusa basolwa, kana yo lendwa. 2 Tes. 2:11

²⁵ Tala, mono imene kutuba yo kwa beno.

²⁶ Sambu na yai, kana bau tuba kwa beno: Tala, yandi ikele mu nsi ya mpamba, kwenda ve; tala, yandi ikele mu katikati ya nzo, kwikila yo ve.

²⁷ Kadi bonso nzazi basika na este ye monika ti na weste, mpilayai kwiza ya mwana ya muntu tavanda mpe, Luk. 17:24

²⁸ Konsosika ya mvumbi ikele, kuna bambemba takutakana.

Kwiza ya yandi ya zole

²⁹ Nswalu nanima na mpasi ya bilumbu yina, ntangu takituka ndombe, ye ngonda tapesa mwini ya yandi ve, ye bambwetete takubwa tuka zulu, ye ngolo ya zulu tanikuka. Bis. 2:20; Nzai. 6:12; Yes. 13:10; Yeh. 32:7; Yoeli 2:10, 31; 3:15; Mal. 13:24; Luk. 21:25

³⁰ Buna kidimbu ya Mwana ya muntu tamonika mu zulu, makanda yonso ya ntoto tadila, ye bau tamona Mwana ya muntu kwiza mu matuti ya zulu, na ngolo ye nkembo mingi. Dan. 7:10, 13; Mat. 25:31; Bis. 1:11; 1 Tes. 4:16; Nzai. 1:7

³¹ Yandi tafidisa banjo ya yandi na ndinga ngolo ya mpungi. Bau takutikisa basolwa ya yandi tuka ndambu iya ya mupepe, ye tuka na nsuka mosi ya zulu ti na nsuka yankaka. Mat. 13:41; 1 Kol. 15:52; 1 Tes. 4:16

Kusongo kidimbu ya lumbu yina

³² Longuka kingana ya nti ya figi; bu mavala ya yo ikele petepete, ye yo ikele kubasisa matiti, beno zaba nsungi ya mvula ikele mfinama. Mal. 13:28; Luk. 21:29

³³ Mpilayai beno mpe, bu beno mona mambu yai yonso, beno zaba yandi ikele mfinama na mielo.

³⁴ Kieleka mono tuba kwa beno: Mbandu yai tamana ve, ti mamba yai yonso tamana.

³⁵ Zulu ye ntoto tamana, kansi mambu ya mono tamana ve. Nk. 102:26; Yes. 40:8; Eb. 1:11

³⁶ Kansi lumbu yina ye lokula yina muntu zaba ve, keti banjo ya zulu ve, keti Mwana ve, kansi Tata kaka. Bis. 1:7

³⁷ Mpilamosi yo vandaka mu bilumbu ya Noa, mpilayai kwiza ya Mwana ya muntu tavanda mpe. Luk. 17:26; 1 Pet. 3:10

³⁸ Kadi bonso yo vandaka mu bilumbu yina, ntete nkuka kwizaka ve; bau vandaka kudia ye kunwa ye kukwela ye kukwedisa ti na kilumbu ya Noa kotaka mu nzaza. 1 Mose 6:2; 7:7

³⁹ Bau zabaka ve, ti nkuka kwizaka ye katulaka bau yonso, mpilayai kwiza ya Mwana ya muntu tavanda mpe.

⁴⁰ Buna babakala zole tavanda mu dilanga, mosi tabakwa, ye mosi tabikwa. Luk. 17:34

⁴¹ Bankento zole tanikuna fufu va ditadi, mosi tabakwa ye mosi tabikwa.

Yesu longa tomatala

⁴² Sambu na yai, tomatala, kadi beno zaba ve lumbu nki Mfumu ya beno takwiza. Mat. 25:13; Mal. 13:33, 35

⁴³ Kansi zaba yai, kaka mfumu ya nzo zabaka na nkengila nki mwivi ikele kwiza, yandi imene tomatala ye bika nzo ya yandi timwa ve. 1 Tes. 5:2; 2 Pet. 3:10; Nzai. 3:3

⁴⁴ Sambu na yai beno mpe diyidika, kadi Mwana ya muntu takwiza mu lokula ya beno banza ve.

⁴⁵ Buna nani ikele mpika ya kwikama ye ya ngangu, ya mfumu ya yandi tulaka va zulu ya bantu ya nzo ya yandi, sambu na kupesa bau madia mu ntangu ya lunga.

⁴⁶ Kiese ikele na mpika yina, ya mfumu ya yandi takuta yandi ikele kusala mpilayai, bu yandi kwiza.

⁴⁷ Kieleka mono tuba kwa beno: Yandi tatula yandi va zulu ya bima yonso ya yandi. Mat. 25:21, 23; Luk. 22:29

⁴⁸ Kansi kana mpika ya mbi tuba mu ntima ya yandi: Mfumu ya mono ikele kwiza ntangu yai ve;

⁴⁹ yandi tayantika kubula bampika yankaka ye kudia ye kunwa sikamosi na bau ya kolwa;

⁵⁰ mfumu ya mpika yina takwiza mu lumbu ya yandi ikele kuvingila ve, ye lokula ya yandi zaba ve;

⁵¹ ye zenga yandi nakati ye pesa ndambu ya yandi sikamosi na bankwa luvunu. Kuna tavanda kudila ye nkwetoso ya meno. Mat. 8:12; 13:42; 25:30