Matai 23 - Le Nouveau Testament en Kikwango 1950

Yesu pesa ngangu kwa bantu sambu na bisetu ya bafalisi

¹ Buna Yesu tubaka kwa bibuka ye kwa banlonguki ya yandi, kutuba:

² Bansoniki ye bafalisi ikele kuvanda va kiti ya Mose. Neh 8:4

³ Sambu na yai mambu yonso ya bau tuba kwa beno, sala yau ye keba yau, kansi sala ve bonso bisalu ya bau. Sambu na bau tuba, kansi bau sala yau ve.

⁴ Bau ikele kukanga bizitu ya nene ye ya mpasi ye tula yau va mapeka ya bantu, kansi bau kibeni zola ve kutula musapi va yau. Luk. 11:46; Bis. 15:10; Ngal. 6:13

⁵ Bau ikele kusala bisalu ya bau yonso na kumonika kwa bantu, ye bau sala dititi ya nsiku ya bau kunata nene, ye sala nsongi ya mvwatu ya bau nene; 4 Mose 15:38; 5 Mose 6:8; 22:12; Mat. 6:1, 5

⁶ bau zola sika ya ntete mu bafete ye bakiti ya ntete mu banzo ya sambilu, Mal. 12:38; Luk. 20:46

⁷ ye peswa mbote mu mazandu, ye bingwa Labi ya bantu.

Luengisa banlonguki ya yandi mu lutasana

⁸ Kansi beno bingwa Labi ve, kadi mosi kaka ikele nlongi ya beno, ye beno yonso ikele bampangi. Yak. 3:1

⁹ Binga muntu ve tata ya beno va ntoto, kadi mosi kaka ikele Tata ya beno, ikele yandi ya ikele mu zulu,

¹⁰ Kansi beno bingwa bamfumu ve, kadi mosi kaka ikele Mfumu ya beno, ikele Klisto.

¹¹ Yandi ya ikele nene nakati na beno, tavanda sielo ya beno.

¹² Konsonani ya ditombola takulumuswa, konsonani ya dikulumusa tatombolwa. Yobi 22:29; Bing. 29:23; Luk. 4:11; 18:14; 1 Pet. 5:5

Yesu tula ndola va bansoniki ye bafalisi

¹³ Ndolo kwa beno, bansoniki ye bafalisi, bankwa luvunu! Kadi beno ikele kukanga kimfumu ya zulu nantwala na bantu. Kadi beno ikele kukota muna ve ye beno buya bau ya ikele kukota.

¹⁴ Ndola kwa beno bansoniki ye bafalisi, bankwa luvunu! Kadi beno ikele kumina banzo ya bafwola, bu beno ikele kulomba ti ti sambu na sweka mbi ya beno; sambu na yai beno tabediswa ya luta.

¹⁵ Ndola kwa beno, bansoniki ye bafalisi, bankwa luvunu! Kadi beno luta mbu ye ntoto kusala nzenza mosi kiYuda, bu yandi imene kusalwa, beno kitula yandi mwana ya bilungi ye yandi luta beno mbala zole.

¹⁶ Ndola kwa beno, bantwadisi ya meso kufwa! Ya tuba: Konsonani ya kudia ndefi ya tempelo yo ikele kima ve, kansi konsonani ya kudia ndefi ya wola ya tempelo, yandi takangwa ku ndefi. Mat. 5:33; 15:14

¹⁷ Beno bazoba ye bampofo, nki luta nene, wola keti tempelo ya sala wola nlongo ?

¹⁸ Ye: Konsonani ya kudia ndefi na zikwa ya yokila yo ikele kima ve, kansi konsonani ya kudia ndefi na nkailu ya ikele va yo, yandi takangwa ku ndefi.

¹⁹ Beno bampofo, nki luta nene, nkailu keti zikwa ya yokila ya sala nkailu nlongo ?

²⁰ Sambu na yai, yandi ya kudia ndefi na zikwa ya yokila ikele kudia ndefi na yo kibeni ye bima yonso ya ikele va yo.

²¹ Yandi ya kudia ndefi na tempelo ikele kudia ndefi na yo kibeni ye na yandi ya ikele kuvanda muna. 1 Nt. 8:13; 2 Lus. 6:2

²² Yandi ya kudia ndefi na zulu, ikele kudia ndefi na kiti ya nkembo ya Nzambi, ye na yandi ya vanda va yo.

²³ Ndola kwa beno, bansoniki ye bafalisi, bankwa luvunu! Kadi beno ikele kupesa mosi ya kumi ya matiti ya menthe ye aneth ye kumin, ye beno imene kusala ve ya luta nene mu nsiku, mfundusu ya kieleka, ye nkenda, ye lukwikilu. Beno fwiti kusala yai, ye bika ve kusala yina yankaka. 4 Mose 18:21; Mika 6:8; Luk. 11:42

²⁴ Beno bantwadisi ya meso kufwa, beno ikele kukatula tubanyama, kansi beno ikele kumina mbizi yanene kamela.

²⁵ Ndola kwa beno, bansoniki ye bafalisi, bankwa luvunu! Beno ikele kuvedisa nganda ya kopo ye dilonga, kansi nakati fuluka na lubotulu ye mambu ya mbi. Mat. 15:20; Mal. 7:4; Luk. 11:39; Tit. 1:15

²⁶ Nge mufalisi ya meso kufwa, ntete vedisa nakati ya kopo ye dilonga, ye nganda ya yau lenda kuvediswa mpe.

²⁷ Ndola kwa beno, bansoniki ye bafalisi, bankwa luvunu! Kadi beno ikele bonso bandiamu ya mpembe, nganda ya yo monika kitoko, kansi nakati yo ikele kufuluka na mikuwa ya bafwa ye nsumukunu yonso.

²⁸ Mpilayai beno mpe ikele kumonika balunungu nanganda kwa bantu, kansi nakati beno ikele kufuluka na luvunu ye mambu ya mbi.

²⁹ Ndola kwa beno, bansoniki ye bafalisi, bankwa luvunu! Kadi beno ikele kutunga bandiamu ya bambikudi ye yidika bandiamu ya balunungu.

³⁰ Ye beno ikele kutuba: Kana beto vandaka mu bilumbu ya batata ya beto, beto imene kuvanda na kintuadi ve na bau mu menga ya bambikudi.

³¹ Mpilayai beno ikele kutuba kitemo kwa beno kibeni ya beno ikele bana ya bafwi ya bambikudi.

³² Buna fulusa kitezo ya batata ya beno.

³³ Beno banioka, beno bana ya banioka mbi, mpila nki beno tatina mfundusu ya bilungi. Mat. 12:34

³⁴ Sambu na yai, tala, mono ikele kufidisa kwa beno bambikudi ye banduenga ye bansoniki. Bamkaka ya bau, beno takufwa ye koma va kulunsi, ye bankaka ya bau beno tabula mu banzo ya beno ya sambilu, ye zoma mu mbanza ku mbanza; Luk. 11:49; Bis. 5:40; 22:19; 2 Kol. 11:20; Eb. 11:36

³⁵ na menga yonso ya lunungu ya loswaka va ntoto takwiza va beno, tuka menga ya Abeli ya lunungu ti menga ya Zakalia, mwana ya Balaki, ya beno kufwaka mu sika ya ikele na katikati ya tempelo ye zikwa ya yokila. 1 Mose 4:8; 2 Lus. 24:21

³⁶ Kieleka, mono tuba kwa beno: Mambu yai yonso takubwila mbandu yai.

Yesu tuba sambu na mfundusu ya Yelusalemi

³⁷ Yelusalemi, Yelusalemi, ya kufwa bambikudi ye kufwa na matadi bau ya fidiswa kwa nge! Mbala mingi mono zola kutikisa bana ya nge, mpilamosi nsusu ikele kutikisa bana ya yandi nansi ya maveve ya yandi, kansi beno zolaka ve. Yes. 31:5; 65:2; Yel. 7:13; Luk. 13:34

³⁸ Tala, nzo ya beno ikele kubikwa mpamba kwa beno. Yes. 1:7; Mika 3:12

³⁹ Kadi, mono tuba kwa beno: Beno tamona mono diaka ve, tuka ntangu yai, ti beno tatuba: Yandi ya kwiza mu nkumbu ya Mfumu ikele nkwa lusakumunu. Nk. 118:26; Mat. 21:9