Matai 22 - Le Nouveau Testament en Kikwango 1950

Kingana ya mvwatu ya fete ya makwela

¹ Yesu vutulaka ye tubaka kwa bau diaka mu bingana, kutuba:

² Kimfumu ya zulu ikele mpilamosi muntu, ntinu ya yidikaka fete ya makwela kwa mwana bakala ya yandi. Yes. 25:6; Luk. 14:16; Nzai. 19:7, 9

³ Yandi fidisaka bampika ya yandi kubinga bau ya imene kubingwa ku fete ya makwela, kansi bau zolaka kwiza ve.

⁴ Diaka yandi fidisaka bampika yankaka, kutuba: Tuba kwa bau ya bingwa: Tala, mono imene kuyidika madia ya mono, mono imene kufwa bangombe ya mono ye bangombe ya mono ya mafuta, bima yonso ikele kuyidikwa, kwiza ku fete ya makwela. Bing. 9:2

⁵ Kansi bau banzaka sambu na yo ve, bau kwendaka mosi ku dilanga ya yandi, yankaka ku mumbungu ya yandi.

⁶ Bau ya bikaka simbaka bampika ya yandi ye monisaka bau mpasi ye kufwaka bau,

⁷ Kansi ntinu vandaka na makasi, ye fidisaka basoldat ya yandi ye kufwaka bafwi yina ye yokaka mbanza ya bau.

⁸ Buna yandi tubaka kwa bampika ya yandi: Fete ya makwela ikele kuyidikwa, kansi bau ya bingwaka lungaka ve.

⁹ Sambu na yai, kwenda mu mpambu ya banzila, ye konsonani ya beno mona, binga bau ku fete ya makwela.

¹⁰ Bampika yina kwendaka mu banzila ye kutikisaka konsonani ya bau monaka, ya mbi ye ya mbote, ye nzo ya fete fulukaka na bau ya bingwa.

¹¹ Bu ntinu kotaka kutala bau ya vandaka na meza, yandi monaka muntu muna ya konda mvwatu ya fete ya makwela. 2 Kol. 5:3; Ef. 4:24; Kolo. 3:10, 12; Nzai. 3:4; 16:15; 19:8

¹² Yandi tubaka kwa yandi: Nduku ya mono, mpila nki nge kotaka awa na konda mvwatu ya fete ya makwela ? Yandi vandaka na ndinga ve.

¹³ Buna ntinu tubaka kwa basielo: Kanga makulu ye maboko ya yandi, ye losa yandi mu tombe nanganda. Kuna tavanda kudila ye nkwetoso ya meno.

¹⁴ Mingi bingwa, kansi ndambu solwa.

Bau yuvula Yesu sambu na mpaku

¹⁵ Buna bafalisi kwendaka kutubana mpila nki bau lenda kubwisa yandi mu ndinga ya yandi. Mal. 12:13; Luk. 20:20

¹⁶ Bau fidisaka banlonguki ya bau ye bantu ya Elode kwa yandi, bau tubaka: Nlongi, beto zaba na nge ikele ya kieleka, ye ikele kulonga nzila ya Nzambi mu kieleka, ye nge ti ta muntu ve, kadi nge ikele kutala luse ya bantu ve.

¹⁷ Sambu na yai tuba kwa beto: Nge banza nki ? Nsiku pesa nzila kupesa mpaku kwa Kaisali keti ve ?

¹⁸ Kansi Yesu zabaka mbi ya bau, ye tubaka: Beno bankwa luvunu, sambu na nki beno yunsa mono ?

¹⁹ Songa mono mbongo ya mpaku. Bau twalaka kitini mosi ya bongo ya denali kwa yandi.

²⁰ Yesu tubaka kwa bau: Yai ikele kifwani ye bisoni ya nani ?

²¹ Bau tubaka: Ya Kaisali. Buna yandi tubaka kwa bau: Sambu na yai, futa kwa Kaisali bima ya Kaisali, ye kwa Nzambi, bima ya Nzambi. Lom. 13:7

²² Bu bau kuwaka yo, bau yitukaka ye bikaka yandi ye kwendaka.

Bau yuvula Yesu sambu na mfulukulu ya bafwa

²³ Kilumbu yina basaduki ya tuba mfulukulu ikele ve, kwizaka kwa yandi ye yuvulaka yandi. Mal. 12:18; Luk. 20:27

²⁴ Bau tubaka: Nlongi, Mose tubaka: Kana muntu kufwa ya konda bana, buna mpangi ya yandi fwiti kubaka nkento ya yandi sambu na kutelemisila nkuna kwa mpangi ya yandi. 5 Mose 25:5

²⁵ Kansi bampangi nsambwadi vandaka na beto, mpangi ya ntete kwelaka ye kufwaka ye yandi kondaka nkuna, yandi bikilaka mpangi ya yandi nkento ya yandi.

²⁶ Mpilayai mpe ya zole salaka, ye ya tatu, ti ya nsambwadi.

²⁷ Nanima na bau yonso, nkento kufwaka mpe.

²⁸ Sambu na yai mu mfulukulu, yandi tavanda nkento ya nani ya bau nsambwadi ? Kadi bau yonso vandaka na yandi.

²⁹ Yesu vutulaka ye tubaka kwa bau: Beno vengumuka, sambu na beno zaba ve masonukwa ye ngolo ya Nzambi.

³⁰ Kadi mu mfulukulu bau ikele kukwela ve ye kukwedisa ve, kansi bau ikele bonso banjo ya Nzambi mu zulu.

³¹ Kansi sambu na mfulukulu ya bafwa, beno imene kutanga ve ya Nzambi tubaka kwa beno, kutuba:

³² Mono ikele Nzambi ya Abalahami, ye Nzambi ya Isaki, ye Nzambi ya Yakobi ? Nzambi ikele Nzambi ya bafwa ve, kansi ya bamoyo. Bis. 7:32; Eb. 7:28

³³ Bu bibuka kuwaka yo, bau yitukaka sambu na malongi ya yandi. Mat. 7:28

Yesu songa nsikudukusu ya luta nene

³⁴ Bu bafalisi kuwaka na yandi imene kukangisaka munoko ya basaduki, bau kutakanaka sikamosi. Mal. 12:28

³⁵ Mosi ya bau ikele nlongi ya nsiku yuvulaka yandi, kuyunsa yandi:

³⁶ Nlongi, nsikudukusu nki luta nene mu bansiku ?

³⁷ Yandi tubaka kwa yandi: Zola Mfumu Nzambi ya nge mu ntima ya nge yonso, ye mu mwela ya nge yonso, ye mu mabanza ya nge yonso.

³⁸ Yai ikel nsikudukusu ya nene ye ya ntete. 5 Mose 6:5

³⁹ Ya zole ikele mpilamosi yo: Zola bamfinangani ya nge bonso nge kibeni. Lom. 13:9; Ngal. 5:14; 1 Tim. 1:5; Yak. 2:8

⁴⁰ Mu nsikudukusu yai zole ikele kukanga nsiku yonso ye bambikudi. Mat. 7:12

Yesu yuvula bafalisi kana Klisto ikele nani

⁴¹ Bu bafalisi imene kutakana, Yesu yuvulaka bau, kutuba: Mal. 12:35; Luk. 20:41

⁴² Beno banza nki sambu na Klisto ? Yandi ikele mwana ya nani ? Bau tubaka kwa yandi: Ya Davidi.

⁴³ Yandi tubaka kwa bau: Buna na nki Davidi mu mpeve bingaka yandi Mfumu, bu yandi tubaka:

⁴⁴ Mfumu tubaka kwa Mfumu ya mono: Vanda na diboko kibakala ya mono, timono tula bambeni ya nge nansi makulu ya nge. Nk. 110:1; Bis. 2:34; 1 Kol. 15:25; Eb. 1:13; 10:12

⁴⁵ Kana Davidi bingaka yandi Mfumu, buna mpila nki yandi ikele mwana ya yandi ?

⁴⁶ Muntu mosi ve lendaka kuvutula yandi ndinga mosi. Tuka kilumbu yina, muntu vandaka na kikesa ve kuyuvula yandi mambu yankaka.