Matai 20 - Le Nouveau Testament en Kikwango 1950

Kingana ya basadi ya dilanga ya vinia

¹ Kadi kimfumu ya zulu ikele mpilamosi muntu ya vandaka mfumu ya nzo, yandi basikaka na suka-suka kusonika basadi ya dilanga ya yandi ya vinia.

² Bu yandi imene kundima na basadi sambu na kitini mosi ya mbongo denali mu kilumbu mosi, yandi fidisaka bau mu dilanga ya yandi ya vinia.

³ Yandi basikaka diaka mfinama na lokula uvwa ye monaka bankaka kutelema mu zandu ya konda kisalu.

⁴ Yandi tubaka kwa bau: Beno kwenda mpe mu dilanga ya vinia, ye mono tapesa beno ya lunga. Ye bau kwendaka.

⁵ Yandi basikaka diaka mfinama na lokula kumi ye zole, ye ya tatu ye salaka mutindu mosi.

⁶ Kansi mfinama ya lokula tanu, yandi basikaka ye monaka bankaka kutelema, yandi tubaka kwa bau: Sambu na nki beno telema awa kilumbu yamvimba ye konda kisalu ?

⁷ Bau tubaka kwa yandi: Sambu na muntu imene kusonika beto ve. Yandi tubaka kwa bau: Beno kwenda mpe mu dilanga ya vinia.

⁸ Bu nkokila kubwaka, mfumu ya dilanga ya vinia tubaka kwa nkengi ya bima ya yandi: Binga basadi ye futa bau, yantika na bau ya nima ti na bau ya ntete.

⁹ Bau ya sonikwaka mfinama na lokula ya tanu kwizaka ye bakaka kitini mosi ya mbongo denali.

¹⁰ Bu bau ya ntete kwizaka, bau banzaka na bau tabaka ya luta, kansi bau bakaka mpe kitini mosi ya mbongo denali.

¹¹ Bu bau bakaka yo, bau baminaka kwa mfumu ya nzo,

¹² bau tubaka: Bayai ya nima imene kusala lokula mosi kaka, ye nge imene kupesa bau kitezo mosi na beto, beto ya monaka mpasi ya mwini ye ntangu ya ngolo.

¹³ Buna yandi vutulaka kwa mosi ya bau, ye tubaka: Nduku ya mono, mono sala nge mbi ve. Nge ndimaka ve na mono sambu na kitini mosi ya mbongo denali ?

¹⁴ Baka yai ya nge ye kwenda. Yo ikele luzolo ya mono kupesa kwa bau ya nima bonso kwa nge.

¹⁵ Nsiku pesa nzila ve na mono kusala bonso mono zola na bima ya mono ? Disu ya nge ikele mbi sambu na ya mono ikele mbote.

¹⁶ Buna bau ya nima tavanda nantwala ye ya ntwala tavanda nanima.

Yesu tuba kwa banlonguki ya yandi diaka sambu na lufwa ye mfulukulu ya yandi

¹⁷ Bu Yesu tomboka ku Ye lusalemi, yandi bakaka banlonguki kumi ye zole mu kinsona, yandi tubaka kwa bau mu nzila. Mat. 16:21; Mal. 10:32; Luk. 18:31

¹⁸ Tala, beto ikele kutomboka ku Yelusalemi, ye Mwana ya muntu tayekulwa kwa bambuta banganga ye bansoniki, ye bau tabedisa yandi ku lufwa.

¹⁹ Bau tayekula yandi kwa bapaien, kuseka yandi, kubula yandi, ye kukoma yandi va kulunsi, ye kilumbu ya tatu yandi tafulukiswa. Yoa. 18:30

Yakobi ye Yoane lomba Yesu kuzitisa bau mu kimfumu ya Nzambi

²⁰ Buna ngudi ya bana ya Zebedai kwizaka na bana ya yandi kwa yandi, ye sambilaka yandi ye lombaka yandi kima. Mat. 4:21; Mal. 10:35

²¹ Ye yandi tubaka kwa yandi: Nge zola nki ? Yandi tubaka kwa yandi: Sikidikisa bana ya mono yai zole tavanda mosi va diboko kibakala ya nge, yankaka va diboko kinkento ya nge mu kimfumu ya nge.

²² Kansi Yesu vutulaka ye tubaka: Beno zaba ve ya beno lomba. Beno lenda kunwa kopo ya mono takunwa: Bau tubaka kwa yandi: Beto lenda. Mat. 26:39, 42; Yoa. 18:11; Luk. 12:50

²³ Yandi tubaka kwa bau: Kieleka, beno takunwa kopo ya mono, kansi kuvanda na diboko kibakala ya mono ye diboko kinkento ya mono, ikele mambu ya mono ve kupesa yo, kansi kwa bau ya yidikwa yo na Tata ya mono.

²⁴ Bu bau kumi kuwaka yo, bau vandaka na makasi mingi sambu na bampangi yai zole.

²⁵ Kansi Yesu bingaka bau ye tubaka: Beno zaba na bankuluntu ya bapaien ikele na ngolo na zulu ya bau, ye bantu ya nene ya bau ikele kuyala bau. Luk. 22:25

²⁶ Yo tavanda ve mpilayai nakati na beno, kansi konsonani nakati na beno ya zola kuvanda ya nene, yandi tavanda sielo ya beno.

²⁷ Konsonani nakati na beno ya zola kuvanda ya ntete, yandi tavanda mpika ya beno.

²⁸ Mpilayai Mwana ya muntu kwizaka ve sambu na bantu tasadila yandi, kansi kusadila bantu ye kupesa moyo ya yandi sambu na nkudulu ya bantu mingi. Yoa. 13:14; Ef. 1:7; Fili. 2:7; 1 Tim. 2:6; Tit. 2:14; 1 Pet. 1:19, 21

Yesu belula bampofo zole

²⁹ Bu bau basikaka na Yeliko, kibuka ya nene landaka yandi. Mal. 10:46; Luk. 18:35

³⁰ Tala, bampofo zole vandaka mfinama na nzila, bu bau kuwaka na Yesu ikele kuluta, bau bokaka, kutuba: Mfumu, mwana ya Davidi, kuwila beto nkenda!

³¹ Kibuka sembaka bau, na bau tavanda napi, kansi bau lutaka kuboka, kutuba: Mfumu, mwana ya Davidi, kuwila beto nkenda!

³² Yesu telemaka ye bingaka bau, ye tubaka: Beno zola mono sadila beno nki ?

³³ Bau tubaka kwa yandi: Mfumu, na meso ya beto takangulwa.

³⁴ Yesu kuwilaka bau nkenda ye valakanaka meso ya bau. Nswalu bau monaka diaka ye landaka yandi.