Matai 17 - Le Nouveau Testament en Kikwango 1950

Yesu kembiswa

¹ Nanima na bilumbu sambanu, Yesu bakaka Petelo ye Yakobi ye Yoane mpangi ya yandi, ye twalaka bau va mongo ya nda mu kinsona. Mal. 9:2; Luk. 9:28

² Yandi kitukaka nantwala na bau, luse ya yandi tentinaka bonso ntangu, mvwatu ya yandi kwizaka mpembe bonso mwini.

³ Tala, Mose ye Elia monikaka kwa bau ye solulaka na yandi.

⁴ Petelo vutulaka ye tubaka kwa Yesu: Mfumu, yo ikele mbote na beto ikele awa. Kana nge zola, mono tasala basombolo tatu, mosi ya nge, mosi kwa Mose, mosi kwa Elia.

⁵ Bu yandi vanda kutuba, tala dituti ya mwini fukaka bau, tala, ndinga mu dituti tubaka: Yai ikele Mwana ya mono ya zolwa, ya yangidisa mono, beno kuwa yandi. Mal. 3:17; 2 Pet. 1:17

⁶ Bu banlonguki kuwaka yo, bau kubwaka va luse ya bau, ye bau vandaka na boma mingi.

⁷ Yesu kwizaka ye valakanaka bau ye tubaka: Telema, vanda na boma ve,

⁸ Bu bau sendula meso ya bau, bau monaka muntu ve, kansi Yesu kaka.

Yesu binga Yoane Mbotiki Elia

⁹ Bu bau kulumukaka va mongo, Yesu sikidikisaka bau, kutuba: Tuba kwa muntu ve mona mesa yai, ti Mwana ya muntu fulukisa tuka bafwa. Mat. 16:20; Mal. 9:9

¹⁰ Banlonguki yuvulaka yandi, kutuba: Mpila nki bansoniki tuba na Elia fwiti kwiza ntete ?

¹¹ Yandi vutulaka ye tubaka: Elia takwiza kieleka, ye tavutula yonso bonso yo vandaka ntete. Mat. 11:14; Mal. 4:5; 9:11

¹² Kansi mono tuba kwa beno: Elia imene kwiza ye bau zabaka yandi ve, kansi bau salaka kwa yandi bonso bau zolaka. Mpilayai mpe, Mwana ya muntu tamoniswa mpasi kwa bau. Luk. 1:17

¹³ Buna banlonguki zabaka na yandi tubaka sambu na Yoane Mbotiki.

Yesu belula mwana ya vanda na mbikula ya ngonda

¹⁴ Bu bau kwizaka kwa kibuka, muntu kwizaka kwa yandi, ye fukamaka kwa yandi va makungunu, Mal. 9:14; Luk. 9:37

¹⁵ ye tubaka: Mfumu, kuwila mwana ya mono nkenda, sambu yandi ikele na mbikula ya ngonda, ye ikele mona mpasi mingi, kadi mbala na mbala yandi ikele kubwa mu tiya, ye mbala na mbala mu masa.

¹⁶ Mono twalaka yandi kwa banlonguki ya nge, kansi bau lendaka ve kubelula yandi.

¹⁷ Yesu vutulaka ye tubaka: O mbandu yai ya konda lukwikilu ye ya mbi, bilumbu ikwa mono tavanda na beno ? Bilumbu ikwa mono tavibidila beno ? Twala yandi awa kwa mono.

¹⁸ Yesu sembaka yandi, ye mpeve ya mbi basikaka na yandi; ye mwana belukaka tuka lokula yina.

¹⁹ Buna banlonguki kwizaka kwa Yesu mu kinsona ye tubaka: Sambu na nki beto lendaka ve kubasisa yandi.

²⁰ Yandi tubaka kwa bau: Sambu na lukwikilu ya beno ikele fioti, kadi kieleka mono tuba kwa beno: Kana beno ikele na lukwikilu bonso nkeni ya mutade, beno tatuba ku mongo yai: Katuka awa kwenda kuna, ye yo takatuka; ye kima ikele ve ya beno lenda kusala ve. Mat. 21:21; Mal. 11:23; Luk. 17:6

²¹ Kansi mutindu yai ikele kubasika ve, kansi kaka mu lombilu ya buya madia.

Yesu tuba kwa banlonguki ya yandi sambu lufwa ye mfulukulu ya yandi

²² Bu bau vandaka mu Ngalili, Yesu tubaka kwa bau: Mwana ya muntu tayekulwa mu maboko ya bantu; Mal. 9:30; Luk. 9:42

²³ bau takufwa yandi ye lumbu ya tatu yandi tafulukiswa. Bau vandaka na ntantu mingi.

Yesu futa mpaku

²⁴ Bu bau kwizaka ku Kapenaumi, bau ya futisa ndambu ya mbongo ya sekeli ya mpaku, kwizaka kwa Petelo ye tubaka: Nlongi ya beno ikele kufuta mpaku ve.

²⁵ Yandi tubaka, E. Bu yandi kwizaka mu nzo, Yesu tubaka kwa yandi ntete, kutuba: Simoni, nge banza nki, bantinu ya ntoto ikele kubaka mpaku ya bima keti ya nsi ya banani ? Kwa bana ya bau keti na banzenza ? Mat. 22:21; Lom. 13:7

²⁶ Bu yandi tubaka: Kwa banzenza, Yesu tubaka kwa yandi: Mpilayai bana tafuta ve.

²⁷ Kansi na beto tatesa bau sakuba ve, kwenda ku mbu, losa ndobo, baka mbizi ya masa yange tasimba ntete; bu nge imene kukangula munoko ya yandi, nge tamona mbongo sekeli mosi, baka yo ye pesa yo kwa bau sambu na mono ye nge.