Matai 16 - Le Nouveau Testament en Kikwango 1950

Bafalisi ye basaduki yuvulaka kidimbu ya katuka na zulu

¹ Bafalisi ye basaduki kwizaka kuyunsa yandi, bau lombaka yandi kusonga bau kidimbu ya zulu. Mat. 12:38; Mal. 8:11

² Kansi yandi vutulaka ye tubaka kwa bau: Bu nkokila kubwa, beno tuba: Yo tavanda mbote kadi zulu ikele mbwaki.

³ Mu nsuka beno tuba: Bubu yo tavanda mbi, kadi zulu ikele mbwaki ye pinduka. Beno zaba kutendula luse ya zulu, kansi beno lenda ve tendula bidimbu ya ntangu yai ?

⁴ Mbandu ya mbi ye ya bizumba ikele kusosa kidimbu, kansi yo tapeswa kidimbu ve, kansi kidimbu ya Yona kaka. Yandi bikaka bau ye kwendaka. Yona 2:1

Yesu luengisa balongi mu malongi ya bafalisi ye basaduki

⁵ Banlonguki kwizaka ku simu, bau vilaka kutwala mampa. Mal. 8:14

⁶ Yesu tubaka kwa bau: Tomatala ye dikeba sambu na lufunusu ya bafalisi ye basaduki. Luk. 12:1

⁷ Kansi bau banzanaka, kutuba: Beto twalaka mampa ve.

⁸ Bu Yesu zabaka yo, yandi tubaka: Beno bankwa lukwikilu fioti, sambu na nki beno banzana sambu na beno twalaka mampa ve ?

⁹ Beno zaba ve, keti bambuka ve, mampa tanu kwa mafunda tanu, ye beno lokotaka bitunga ikwa ? Mat. 14:17; Mal. 6:41; Luk. 9:13; Yoa. 6:9

¹⁰ Keti mampa nsambwadi kwa mafunda iya, ye beno lokotaka bitunga ikwa ?

¹¹ Mpila nki beno zaba ve na mono tubaka kwa beno ve sambu na mampa ? Kansi dikeba sambu na lufunusu ya bafalisi ye ya basaduki.

¹² Buna bau bakisaka na yandi tubaka kwa bau ve, kudikeba sambu na lufunusu ya bafalisi ye ya basaduki, kansi sambu na malongi ya bafalisi ye basaduki.

Kitemo ya Petelo

¹³ Bu Yesu kumaka ku nsi ya Kaisalia Filipi, yandi yuvulaka banlonguki ya yandi, kutuba: Bantu tuba na Mwana ya muntu ikele nani ? Mal. 8:27; Luk. 9:18

¹⁴ Bau tubaka: Bankaka tuba Yoane Mbotiki, bankaka Elia, bankaka Yelemia keti mosi ya bambikudi. Mat. 14:2

¹⁵ Yandi tubaka kwa bau: Kansi beno tuba na mono ikele nani ?

¹⁶ Simoni Petelo vutulaka ye tubaka: Nge ikele Klisto Mwana ya Nzambi ya ikele na moyo. Yoa. 6:69; 11:27; Bis. 8:37; 9:20; 1 Yoa. 4:15; 5:5

¹⁷ Kansi Yesu vutulaka ye tubaka kwa yandi: Simoni mwana ya Yona, kiese ikele na nge kadi nsuni ye menga imene kuzabisa yo kwa nge ve kansi Tata ya mono ya ikele mu zulu. 1 Kol. 2:10

¹⁸ Mono tuba mpe kwa nge, nge ikele Petelo, va ditadi yai, mono tatunga dibundu ya mono, mielo ya nsi ya bafwa taluta yo ngolo ve. Yoa. 1:42; Ef. 2:20

¹⁹ Mono tapesa nge nsabi ya kimfumu ya zulu; yonso ya nge takanga va ntoto takangwa mu zulu, yonso ya nge takangula va ntoto takangulwa mu zulu.

²⁰ Buna yandi sikidikisaka banlonguki ya yandi na bau tuba ve kwa muntu na yandi ikele Klisto. Mat. 17:9

Yesu tuba kwa banlonguki sambu lufwa ye mfulukulu ya yandi

²¹ Tuka ntangu yina, Yesu yantikaka kusonga banlonguki ya yandi, yandi fwiti kwenda ku Yelusalemi, ye moniswa mpasi mingi na bambuta ya bantu ye bambuta banganga ye bansoniki, ye takufwa ye tafulukiswa va kilumbu ya tatu. Mat. 20:17; Mal. 8:30; Luk. 9:21

²² Petelo bakaka yandi ye yantikaka kusemba yandi, kutuba: Nzambi keba nge, Mfumu. Yai tavanda na nge ta mbala mosi ve.

²³ Kansi yandi pindukaka ye tubaka kwa Petelo: Satana, katuka na mono, nge ikele mutesi ya sakuba kwa mono, kadi nge banza ve mambu ya Nzambi, kansi ya bantu.

²⁴ Buna Yesu tubaka kwa banlonguki ya yandi: Kana muntu zola kulanda nanima na mono, bika yandi dibuya ye baka kulunsi ya yandi ye landa mono. Mat. 10:38; Mal. 8:34; Luk. 9:23

²⁵ Kadi konsonani ya zola kuvulusa moyo ya yandi, tavidisa yo, kansi konsonani ya vidisa moyo ya yandi sambu na mono, tamona yo. Yoa. 12:25

²⁶ Kadi yo tasadisa muntu na nki, kana yandi baka nsi yamvimba ndandu, kansi yandi tavidisa moyo ya yandi ? Keti muntu tapesa nki kukula moyo ya yandi ?

²⁷ Kadi Mwana ya muntu takwiza mu nkembo ya Tata ya yandi ye banjo ya yandi, buna yandi tafuta muntu na muntu bonso bisalu ya yandi. Zak. 14:5; Mat. 25:31; 26:64; Lom. 2:6; Yud. 14; Nzai. 2:23

²⁸ Kieleka mono tuba kwa beno: Bankaka ya bau ya telema awa tameka lufwa ve, ti bau mona Mwana ya muntu kwiza mu kimfumu ya yandi.