Matai 14 - Le Nouveau Testament en Kikwango 1950

Elode zenga ntu ya Yoane Mbotiki

¹ Mu ntangu yina Elode, nyadi kuwaka nsangu ya Yesu,

² yandi tubaka kwa basielo ya yandi: Yai ikele Yoane Mbotiki. Yandi imene kufulukisa tuka bafwa, sambu na yai bisalu ya ngolo yai ikele kusalwa mu yandi. Mal. 6:14; Luk. 9:7

³ Kadi Elode imene kubakisaka Yoane ye kangisaka yandi ye tudisaka yandi mu boloko, sambu na Elodia, nkento ya Filipo. Filipo ikele mpangi ya Elode. Mat. 4:12; Mal. 6:17; Luk. 3:19

⁴ Kadi Yoane tubaka kwa yandi: Nsiku buya na nge vanda na yandi.

⁵ Elode zolaka kufwa Yoane, kansi yandi titaka bantu, sambu na bau tangaka yandi bonso mbikudi. Mat. 21:26; Luk. 20:6

⁶ Kansi bu lumbu ya lubutuku ya Elode kwizaka, mwana nkento ya Elodia kinaka nakati na bau ye yangidisaka Elode.

⁷ Sambu na yai yandi silaka mu ndefi kupesa yandi konso nki ya yandi lomba.

⁸ Kansi mpilamosi yandi longwaka ya ngudi ya yandi, yandi tubaka: Pesa mono ntu ya Yoane Mbotiki awa va dilonga.

⁹ Ntinu vandaka na ntantu, kansi sambu na bandefi ya yandi ye sambu na bau ya vandaka na yandi na meza, yandi sikidikisaka yo peswa kwa yandi.

¹⁰ Yandi fidisaka ye zengaka ntu ya Yoane mu boloko.

¹¹ Ntu ya yandi natwaka va dilonga ye peswaka kwa mwana nkento; yandi nataka yo kwa ngudi ya yandi.

¹² Banlonguki ya yandi kwizaka ye bakaka nitu ya yandi ye zikaka yandi; ye kwenda kutuba kwa Yesu.

Yesu dikila babakala malunda tanu madia

¹³ Bu Yesu kuwaka yo, yandi katukaka kuna mu bota ku nsi ya mpamba mu kinsona, bu bibuka kuwaka yo, bau landaka yandi na makulu tuka bambanza. Mat. 15:32; Mal. 6:30; Luk. 9:10; Yoa. 6:1

¹⁴ Bu yandi basikaka tuka bota ye monaka kibuka, yandi kuwilaka bau nkenda ye belulaka bimbevo ya bau.

¹⁵ Bu nkokila kubwaka, banlonguki kwizaka kwa yandi, kutuba: Sika yai ikele ya mpamba ye ntangu imene kuluta, sambu na yai sindika bibuka, na bau lenda kwenda ku mabwala ye disumbila madia.

¹⁶ Kansi Yesu tubaka kwa bau: Bau ikele na nsatu ve ya kwenda, beno pesa bau kudia.

¹⁷ Kansi bau tubaka kwa yandi: Awa beto ikele na kima ve kansi mampa tanu ye bambizi ya masa zole kaka.

¹⁸ Yandi tubaka: Twala yau awa kwa mono.

¹⁹ Yandi sikidikisaka bibuka kuvanda va matiti, yandi bakaka mampa tanu ye bambizi ya masa zole ye talaka ku zulu, yandi sakumunaka yau ye bukunaka yau ye pesaka mampa kwa banlonguki, ye banlonguki pesaka yau kwa bibuka. 1 Tim. 4:3; 6:17

²⁰ Bau yonso kudiaka ye yukutaka. Bau lokotaka bitini ya bikaka, bitunga kumi ye zole ya fuluka.

²¹ Bau ya kudiaka vandaka babakala mafunda tanu, ye konda kutanga bankento ye bana,

Yesu tambula va masa

²² Nswalu yandi kotisaka banlonguki mu bota sambu na bau kwenda nantwala na yandi ku simu, ti yandi imene kusindika bibuka. Mal. 6:45; Yoa. 6:15

²³ Bu yandi imene kusindika bibuka, yandi tombokaka va mongo, yandi kaka, kulomba. Bu nkokila kubwaka yandi vandaka kuna yandi kibeni.

²⁴ Kansi bota vandaka nakati ya mbu, ye moniswa mpasi na mayo, sambu na mupepe vutulaka bau.

²⁵ Mu kengila iya ya mpimpa, yandi kwizaka kwa bau kutambula va mbu.

²⁶ Bu bau monaka yandi tambula va mbu, bau titaka mu ntima, kutuba: Yo ikele mpeve, ye bau bokaka sambu na boma.

²⁷ Nswalu yandi tubaka kwa bau, kutuba: Yangalala, yai ikele mono, vanda ve na boma.

²⁸ Petelo vutulaka kwa yandi ye tubaka: Mfumu, kana yo ikele nge, bika mono kwiza kwa nge va masa.

²⁹ Yandi tubaka: Kwiza. Petelo basikaka tuka bota ye tambulaka va masa na kwiza kwa Yesu.

³⁰ Kansi bu yandi monaka kitembo, yandi vandaka na boma; bu yandi yantikaka kudinda, yandi bokaka, kutuba: Mfumu vulusa mono!

³¹ Nswalu Yesu lambulaka diboko, ye simbaka yandi ye tubaka kwa yandi: Nge nkwa lukwikilu fioti, sambu na nki nge kwikila ve ?

³² Bu bau imene kukota mu bota, mupepe bikaka.

³³ Bau ya vandaka mu bota sambilaka yandi, kutuba: Kieleka, nge ikele Mwana ya Nzambi.

Yesu belula bambevo

³⁴ Bu bau imene kusabuka, bau kwizaka ku simu ya Ngenesaleti. Mal. 6:53

³⁵ Bu bantu ya ntoto yina zabaka yandi, bau fidisaka mu nsi yina yonso ya ndambu kuna ye twalaka kwa yandi bambevo yonso;

³⁶ bau lombaka yandi na bau lenda kuvalakana kaka nsongi ya mvwatu ya yandi; bau yonso ya valakanaka yo belulwaka. Luk. 6:19