Matai 13 - Le Nouveau Testament en Kikwango 1950

Kingana ya mambu ya Nzambi

¹ Va kilumbu yina, Yesu basikaka na nzo ye vandaka na mukidi ya mbu. Mal. 4:1

² Bibuka mingi kutakanaka kwa yandi, sambu na yai yandi kotaka mu bota ye vandaka; ye bantu yonso telemaka va mukidi.

³ Yandi tubaka mambu mingi kwa bau mu bingana, kutuba: Tala, mukuni kwendaka kukuna. Mal. 4:3; Luk. 8:4

⁴ Bu yandi kunaka yankaka kubwaka mfinama nzila ya bandeke kwizaka kudia yau.

⁵ Yankaka kubwaka va sika ya matadi ya konda ntoto mingi, nswalu yau menaka, sambu na ntoto vandaka mingi ve:

⁶ kansi bu ntangu tombokaka, yau zikaka, sambu na yau kondaka mianzi, yau yumaka.

⁷ Yankaka kubwaka va minti ya nsende, nsende kulaka ye fietikisaka yau.

⁸ Yankaka kubwaka va ntoto ya mbote ye butaka bankeni, yankaka nkama-nkama, yankaka makumi sambanu-sambanu, yankaka makumi tatu-tatu.

⁹ Yandi ya ikele na makutu, bika yandi kuwa. Mat. 11:15

¹⁰ Banlonguki kwizaka, ye tubaka kwa yandi: Sambu na nki nge tuba kwa bau mu bingana ? Mal. 4:10

¹¹ Yandi vutulaka ye tubaka: Yo peswa kwa beno kuzaba mambu ya kinsweki ya kimfumu ya zulu, kansi kwa bau yo peswa ve. 1 Kol. 2:10; 1 Yoa. 2:27

¹² Kadi konsonani ya ikele na yau, tapeswa kwa yandi ye yandi tavanda na mingi, kansi konsonani ya ikele na yau ve, yina ya ikele na yandi tabotulwa mpe. Mat. 25:29; Mal. 4:25; Luk. 8:18; 19:25

¹³ Sambu na yai mono tuba kwa bau mu bingana, na bau ya mona, mona ve, ye bau ya kuwa, kuwa ve, ye bau zaba ve.

¹⁴ Mu bau maniswa mbikudulu ya Yesaya, kutuba: Kuwa beno takuwa, kansi beno tazaba ve, kumona beno tamona, kansi beno tabakisa ve,

¹⁵ kadi ntima ya bantu yai imene kwiza mbi, makutu ya bau kuwa ve, bau imene kanga meso ya bau, na bau lenda kumona ve na meso ya bau, ye kuwa ve na makutu ya bau, ye zaba ve na ntima ya bau, ye pinduka ve, na mono lenda kubelula bau. Yes. 29:10; Yoa. 12:40; Bis. 28:26

¹⁶ Kansi kiese ikele na meso ya beno sambu na yau ikele kumona, ye makutu ya beno sambu na yau ikele kuwa. Mat. 16:17; Luk. 10:23

¹⁷ Kieleka mono tuba kwa beno: Bambikudi mingi ye balunungu mingi zolaka kumona mambu ya beno ikele kumona, kansi bau monaka yau ve, ye kuwa mambu ya beno ikele kuwa, kansi bau kuwaka yau ve. 1 Pet. 1:10

¹⁸ Buna beno kuwa kingana ya mukuni. Mal. 4:3, 14; Luk. 8:11

¹⁹ Bu muntu kuwa mambu ya kimfumu ye zaba yo ve, buna nkwa mbi ikele kwiza kubotula yina ya kunwaka mu ntima ya yandi. Yai ikele yina ya kunwaka mfinama na nzila.

²⁰ Kansi yina ya kunwaka va sika ya matadi, ikele yandi ya kuwa mambu ye bakaka yau nswalu mu kiese;

²¹ kansi yandi ikele na mianzi ve mu yandi kibeni, kansi yandi vanda ntangu fioti; bu mpasi ye nzomono kwiza sambu na mambu, nswalu yandi tasakuba.

²² Kansi yina ya kunwaka nakati ya minti ya nsende ikele yandi ya kuwa mambu, buna mabanza ya ntangu yai ye luvunu ya kimvwama ikele kufietikisa mambu ye yandi konda mabundu. 1 Tim. 6:9

²³ Kansi yina ya kunwaka mu ntoto ya mbote, ikele yandi ya kuwa mambu ye zaba yo, ye buta mabundu, mosi sala nkama-nkama, yankaka makumi sambanusambanu, yankaka makumi tatutatu.

Bingana ya kimfumu ya zulu

²⁴ Yandi tudilaka bau kingana yankaka, kutuba: Kimfumu ya zulu ikele mpilamosi muntu ya kunaka nkeni ya mbote mu dilanga ya yandi.

²⁵ Kansi bu bantu lalaka, mbeni ya yandi kwizaka ye kunaka kakala nakati ya nkeni, ye yandi kwendaka.

²⁶ Kansi bu dititi ya nkeni menaka ye salaka mabundu, buna kakala monikaka mpe.

²⁷ Ye bampika ya mfumu ya nzo kwizaka ye tubaka kwa yandi: Mfumu, nge kunaka nkeni ya mbote mu dilanga ya nge ve ? Buna kakala katukaka wapi ?

²⁸ Yandi tubaka kwa bau: Mbeni imene kusala yai. Kansi bampika tubaka kwa yandi: Nge zola beto kwenda kuvuza yau ?

²⁹ Yandi tubaka: Ve, sambu na bu beno vuza kakala, beno tavuza nkeni ble sikamosi na yau.

³⁰ Bika yau zole kula sikamosi ti ngionzoko; mu nsungi ya ngionzoko, mono tatuba kwa babuki: Ntete yonzika kakala ye kanga yau mu bibuka kuyoka yau, kansi yonzika nkeni ble mu lundulu ya mono.

³¹ Yandi tudilaka bau kingana yankaka kutuba: Kimfumu ya zulu ikele mpilamosi nkeni ya mutade ya muntu bakaka ye kunaka mu dilanga ya yandi. Mal. 4:30; Luk. 13:18

³² Yo luta nkeni yonso fioti, kansi bu yo imene kukula yo luta matiti yonso nene ye yo kwiza nti, na bandeke ya zulu kwiza ye leala mu mavala na yo.

³³ Yandi tubaka kwa bau kingana yankaka: Kimfumu ya zulu ikele mpilamosi lufunusu ya nkento bakaka, ye swekaka yo mu bitezo tatu ya fufu, ti yonso funuswaka.

³⁴ Mambu yai yonso Yesu tubaka mu bingana kwa bibuka, yandi tubaka kwa bau mu bingana kaka, Mal. 4:33, 34

³⁵ na yo lenda maniswa ya tubwaka mu mbikudi, kutuba: Mono takangula munoko ya mono mu bingana, mono tatuba mambu ya swekaka tuka tulwa ya lufulu ya nsi.

³⁶ Buna yandi bikaka bibuka ye kotaka mu nzo. Banlonguki ya yandi kwizaka kwa yandi, kutuba: Tendudila beto kingana ya kakala mu dilanga.

³⁷ Yandi vutulaka ye tubaka: Yandi ya kuna nkeni ya mbote ikele Mwana ya muntu.

³⁸ Ye dilanga ikele nsi, nkeni ya mbote ikele bana ya kimfumu, kansi kakala ikele bana ya nkwa mbi. Yoa. 8:44; Bis. 13:10; 1 Yoa. 3:8

³⁹ Mbeni ya kunaka yau ikele diable, ntangu ya yonzika ikele nsuka ya ntangu; babuki ikele banjo, Yoeli 3:13; Nzai. 14:15

⁴⁰ Bonso bau yonzika kakala ye yoka yau mu tiya, mpilayai yo tavanda mu nsuka ya ntangu.

⁴¹ Mwana ya muntu tafidisa banjo ya yandi, bau tayonzika mu kimfumu ya yandi bima yonso ya tesa sakuba ye bau ya sala mbi,

⁴² ye talosa bau mu foloni ya tiya, kuna tavanda kudila ye nkwetoso ya meno. Mat. 8:12

⁴³ Buna balunungu tatentina bonso ntangu mu kimfumu ya Tata ya bau. Yandi ya ikele na makutu, bika yandi kuwa. Dan. 12:3; 1 Kol. 15:41

⁴⁴ Kimfumu ya zulu ikele mpilamosi kima ya ntalu ya swekwa mu dilanga, ya muntu monaka ye swekaka; mu kiese ya yandi, yandi kwendaka kuteka bima yonso ya yandi ye sumbaka dilanga yina. Fili. 3:7

⁴⁵ Diaka kimfumu ya zulu ikele mpilamosi muntu ya ikele muteki, ya sosa matadi nzimbu ya mbote.

⁴⁶ Kansi bu yandi monaka ditadi nzimbu ya ntalu ya luta, yandi kwendaka kuteka bima yonso ya yandi ye sumbaka yo.

⁴⁷ Diaka kimfumu ya zulu ikele mpilamosi konde ya loswa mu mbu, yo kutikisaka bambizi mutindu yonso.

⁴⁸ Bu yo fulukaka, bau bendaka yo ku mukidi, bau vandaka ye yonzikaka ya mbote mu biwumbwa kansi bau losaka ya mbi.

⁴⁹ Mpilayai yo tavanda mu nsuka ya ntangu. Banjo tabasika ye takatula bambi nakati ya balunungu, Mat. 25:32

⁵⁰ ye talosa bau mu foloni ya tiya; kuna tavanda kudila ye nkwetoso ya meno.

⁵¹ Beno zaba mambu yai yonso ? Bau tubaka kwa yandi: E.

⁵² Yandi tubaka kwa bau: Sambu na yai konso nsoniki ya salwa nlonguki ya kimfumu ya zulu ikele mpilamosi muntu ya ikele mfumu ya nzo, yandi basisa ya lundulu ya yandi bima yampa ye ya nkulu.

⁵³ Yo vandaka, bu Yesu manisaka bingana yai, yandi katuka kuna.

⁵⁴ Bu yandi kumaka mu ntoto ya yandi kibeni, yandi longaka bau mu nzo ya bau ya sambilu, bau yitukwa ye tubaka: Muntu yai bakaka ngangu yai ye bisalu ya ngolo yai wapi ? Mal. 6:1

⁵⁵ Yai ikele ve mwana ya musadi ya mabaya ? Ngudi ya yandi bingwa Malia ve, ye bampangi ya yandi Yakobi ye Yosefi ye Simoni ye Yuda ? Mat. 12:46; Yoa. 6:42

⁵⁶ Ye bampangi bankento yonso ya yandi ikele na beto ve ? Buna muntu yai bakaka mambu yai yonso wapi ?

⁵⁷ Bau kutaka sakuba mu yandi. Kansi Yesu tubaka kwa bau: Mbikudi ikele konda luzitu ve, kansi mu ntoto ya yandi ye mu nzo ya yandi kibeni. Mal. 6:4; Luk. 4:24; Yoa. 4:44

⁵⁸ Kuna yandi salaka ve bisalu mingi ya ngolo, sambu na konda ya lukwikilu ya bau.