Matai 12 - Le Nouveau Testament en Kikwango 1950

Balonguki buka nkeni mu lumbu ya luvundu

¹ Mu ntangu yina, mu kilumbu ya luvundu Yesu lutaka mu bilanga ya nkeni, kansi banlonguki ya yandi vandaka na nzala, ye bau yantikaka kubuka nkeni ye kudia. Mal. 2:23; Luk. 6:1

² Bu bafalisi monaka yo, bau tubaka kwa yandi: Tala, banlonguki ya nge ikele kusala yina ya nsiku buya mu kilumbu ya luvundu. 5 Mose 23:25

³ Yandi tubaka kwa bau: Beno imene kutanga ve yina ya Davidi salaka ye bau ya vandaka na yandi, bu bau vandaka na nzala, 1 Sam. 21:6

⁴ bu yandi kotaka mu nzo ya Nzambi ye kudiaka mampa ya tala, ya nsiku buya yandi kudia, ye bau ya vandaka na yandi mpe, kansi kwa banganga kaka. 2 Mose 25:30; 29:33; 3 Mose 8:31; 24:9

⁵ Keti beno imene kutanga ve mu nsiku, va kilumbu yaluvundu banganga ikele kusumuna kilumbu ya luvundu mu tempelo, kansi ikele na mambu ve ? 4 Mose 28:9, 11

⁶ Mono tuba kwa beno: Ya luta tempelo ikele awa.

⁷ Kansi kana beno imene kuzaba yai ikele mpila nki: Mono zola nkenda kansi nkailu ya zikwa ve, beno imene kubedisa ve bau ya konda mbi, Hos. 6:6

⁸ kadi Mwana ya muntu ikele Mfumu ya kilumbu ya luvundu.

Yesu belula muntu ya diboko ya yuma

⁹ Bu yandi katukaka kuna, yandi kotaka mu nzo ya bau ya sambilu. Mal. 3:1; Luk. 6:5

¹⁰ Tala, muntu ya vandaka na diboko ya yuma. Bau yuvulaka yandi, kutuba: Nsiku buya kubelula va kilumbu ya luvundu ? Na bau lenda kufunda yandi. Luk. 13:14

¹¹ Yandi tubaka kwa bau: Nki muntu nakati na beno ya ikele na dimeme mosi kaka, Kana yo kubwa mu dibulu va kilumbu ya luvundu, yandi tasimba yo ve ye tombola yo ?

¹² Muntu ikele kuluta dimeme ntalu ikwa! Sambu na yai, nsiku buya ve kusala mbote va kilumbu ya luvundu.

¹³ Buna yandi tubaka kwa muntu: Lambula diboko ya nge. Yandi lambulaka yo, ye yo vutukaka mbote mpilamosi yankaka.

¹⁴ Kansi bafalisi basikaka ye tubaka sambu na yandi, mpila nki bau lenda kufwa yandi. Mal. 3:6; Yoa. 10:39; 11:53

Yesu tina mambu ya bafalisi

¹⁵ Bu Yesu zabaka yo, yandi katukaka kuna ye bantu mingi landaka yandi, ye yandi belulaka bau yonso.

¹⁶ Yandi kanikinaka bau, na bau tazabisa yandi ve,

¹⁷ na yo lenda maniswa ya tubwaka mu Yesaya mbikudi, kutuba:

¹⁸ Tala, sielo ya mono, mono imene kusola yandi, mono zola yandi, mwela ya mono ikele kuyangidiswa sambu na yandi. Mono tatula Mpeve ya mono va yandi. Yandi tasamuna mfundusu kwa bapaien. Yes. 42:1; Mat. 3:17; 17:5

¹⁹ Yandi tanwana ve keti boka ngolo ve, ye muntu takuwa ve ndinga ya yandi mu banzila;

²⁰ yandi tazenga ve tutu ya imene kulwala, yandi tazima ve midinga ya nsinga ya mwinda, ti yandi fidisa mfundusu ku ndungunu. Yes. 42:2-3

²¹ Bapaien tatula vuvu mu nkumbu ya yandi.

Yesu belula muntu ya bakama na mpeve yambi, yandi semba bafalisi ya tuba mbi sambu na mpeve ya longo

²² Buna bau twalaka kwa yandi muntu ya bakama na mpeve mbi, yandi vandaka mpofo ye baba, Yesu belulaka yandi; ye baba tubaka ye monaka. Mat. 9:33; Mal. 3:19; Luk. 11:14

²³ Bibuka yonso yitukaka ye tubaka: Yai ikele mwana ya Davidi ve ?

²⁴ Kansi bu bafalisi kuwaka yo, bau tubaka: Yo ikele mu Belesebuli kaka, nkuluntu ya bampeve mbi ya yandi ikele kubasisa bampeve mbi. Mat. 9:34; Mal. 3:22; Luk. 11:15

²⁵ Kansi bu yandi zabaka mabanza ya bau, yandi tubaka kwa bau: Konso kimfumu ya kabana mu kimbeni takufwa; konso mbanza keti nzo ya kabana mu kimbeni tatelema ve.

²⁶ Kana Satana basisa Satana, yandi kabana mu kimbeni, buna mpila nki kimfumu ya yandi tatelema ?

²⁷ Kana mono basisa bampeve mbi mu Belesebuli, buna bana ya beno ikele kubasisa bau mu nani ? Sambu na yai bau tavanda bamfundisi ya beno.

²⁸ Kana mono basisa bampeve mbi mu Mpeve ya Nzambi, buna kimfumu ya Nzambi imene kwiza kwa beno.

²⁹ Keti mpila nki muntu lenda kukota mu nzo ya nkwa ngolo ye botula bima ya yandi, kana yandi kanga ve ntete nkwa ngolo ? Nanima yandi tabotula nzo ya yandi. Luk. 11:22

³⁰ Konsonani ya ikele na mono ve ikele na kimbeni na mono; konsonani ya kutikisa na mono ve ikele kumwangisa.

³¹ Sambu na yai, mono tuba kwa beno: Masumu yonso ye kutuba mbi yonso tavidiswa kwa bantu, kansi yandi ya tuba mbi sambu na Mpeve Yanlongo tavidiswa ve. Mal. 3:28-29; Luk. 12:10; Eb. 6:4; 1 Yoa. 5:16

³² Ye konsonani ya tuba mambu ya mbi sambu na Mwana ya muntu, yo tavidiswa, kansi konsonani ya tuba mbi sambu na Mpeve Yanlongo, yo tavidiswa ve mu ntangu yai keti mu yina ya ikele kwiza.

³³ Sala nti mbote ye mabundu ya yo mbote keti sala nti mbi ye mabundu ya yo mbi. Sambu nti ikele kuzabakana na mabundu na yo. Mat. 7:17; Luk. 6:44

³⁴ Beno bana ya banioka ya mbi, mpila nki beno lenda kutuba mambu ya mbote bu beno ikele mbi ? Kadi munoko ikele kutuba mambu ya fuluka mu ntima.

³⁵ Muntu ya mbote ikele kubasisa bima ya mbote tuka lundulu ya yandi ya mbote, ye muntu ya mbi ikele kubasisa bima ya mbi tuka lundulu ya yandi ya mbi.

³⁶ Kansi mono tuba kwa beno: Ndinga yonso ya bantu tatuba ya konda mfunu, bau tandima mu kilumbu ya mfundusu.

³⁷ Kadi nge tanunguswa sambu na ndinga ya nge, ye nge tabediswa sambu na ndinga ya nge.

Bansoniki lomba kidimbu ya Yesu

³⁸ Buna bankaka ya bansoniki ye bafalisi vutulaka kwa yandi, kutuba: Nlongi, beto zola kumona kidimbu ya nge. Mat. 16:1; Mal. 8:11; 1 Kol. 1:22

³⁹ Kansi yandi vutulaka ye tubaka kwa bau: Mbandu ya mbi ye ya bizumba ikele kusosa kidimbu, kansi yo tapeswa kidimbu ve, kansi kidimbu ya Yona mbikudi kaka, Mat. 16:4; Luk. 11:29

⁴⁰ bonso Yona vandaka mu divumu ya mbizi ya masa ya nene bilumbu tatu ye mpimpa tatu, buna Mwana ya muntu tavanda mu ntima ya ntoto bilumbu tatu ye mpimpa tatu. Yona 2:1

⁴¹ Bantu ya Nineve tatelema sikamosi na mbandu yai mu mfundusu ye bedisa bau, kadi bau pindulaka ntima sambu na nsamunu ya Yona; tala, ya luta Yona ikele awa. Yona 3:5

⁴² Ntinu nkento ya katuka na nsi ya sude tatelema sikamosi na mbandu yai mu mfundusu ye bedisa bau, kadi yandi katukaka tuka nsuka ya ntoto sambu na kuwa ngangu ya Solomo; tala, ya luta Solomo ikele awa. 1 Nt. 10:1; 2 Lus. 9:1

⁴³ Bu mpeve ya sumuka imene kubasika na muntu, yo tambula mu sika ya konda masa kusosa luvundu, kansi yandi mona yo ve.

⁴⁴ Buna yandi tuba: Mono tavutuka ku nzo ya mono basikaka; bu yandi kwiza, yandi mona yo mpamba ye ya komba ye yidika.

⁴⁵ Buna yandi kwenda kubaka bampeve nsambwadi yankaka ya luta yandi kibeni mu mbi, bau kota ye vanda muna, buna mambu ya nsuka ya muntu yina taluta yantete mu mbi. Yo tavanda mpilayai mpe kwa mbandu yai ya mbi. 2 Pet. 2:20

Ngudi ya Yesu ye bampangi ya yandi

⁴⁶ Bu yandi ikele kutuba kwa bibuka, tala, ngudi ya yandi ye bampangi ya yandi telemaka nanganda ye sosaka kutuba kwa yandi. Mat. 13:55; Mal. 3:31; Luk. 8:19

⁴⁷ Muntu tubaka kwa yandi: Tala, ngudi ya nge ye bampangi ya nge ikele kutelema nanganda, kusosa kutuba kwa nge.

⁴⁸ Yandi vutulaka ye tubaka kwa yandi ya tubaka kwa yandi: Nani ikele ngudi ya mono ye bampangi ya mono ?

⁴⁹ Yandi lambulaka diboko ya yandi kwa banlonguki, ye tubaka: Tala ngudi ya mono ye bampangi ya mono!

⁵⁰ Kadi konsonani tasala luzolo ya Tata ya mono ya ikele mu zulu, yandi ikele mpangi ya mono ye mpangi nkento ya mono ye ngudi ya mono.