Matai 11 - Le Nouveau Testament en Kikwango 1950

Yoane mbotiki fidisa banlonguki kwa Yesu

¹ Yo vandaka, bu Yesu imene kusikidikisa banlonguki ya yandi kumi ye zole, yandi katukaka kuna ye kwendaka kulonga ye kusamuna mu bambanza ya bau.

² Bu Yoane mu boloko kuwaka nsangu ya bisalu ya Yesu, yandi fidisaka banlonguki ya yandi, Luk. 7:18

³ kutubaka kwa yandi: Nge ikele yandi ya ikele kwiza keti beto ta vingila yankaka ?

⁴ Yesu vutulaka ye tubaka kwa bau: Kwenda kutuba kwa Yoane mambu ya beno kuwa ye mona;

⁵ bampofo mona, batembidi tambula, bankwa bwazi vediswa, bafwa makutu kuwa, bafwa fulukiswa, nsamu mbote samunwa kwa bansukami. Yes. 35:5; 61:1

⁶ Kiese ikele na konsonani ya kuta sakuba ve mu mono.

Yesu tuba kitemo sambu na Yoane

⁷ Bu bayai kwendaka, Yesu yantikaka kutuba kwa bibuka sambu na Yoane: Beno kwendaka kutala nki mu nsi ya mpamba ? tutu ya ikele kunikiswa na mupepe ? Luk. 7:24

⁸ Kansi beno kwendaka kutala nki ? Muntu kuvwata lele ya lebelebe ? Tala bau ya vwata lele ya lebelebe ikele mu banzo ya bantinu.

⁹ Kansi beno kwendaka sambu na nki ? Kutala mbikudi ? E, mono tuba kwa beno, ya luta mbikudi mpe.

¹⁰ Yai ikele yandi ya bau sonikaka: Tala, mono fidisa ntumwa ya mono nantwala ya luse ya nge, yandi tayidika nzila ya nge nantwala ya nge. Mal. 3:1

¹¹ Kieleka, mono tuba kwa beno: Nakati bau yonso ya butwa na bankento, mosi ikele ve ya luta Yoane mbotiki nene, kansi yandi ya ikele fioti mu kimfumu ya zulu ikele kuluta yandi nene. Luk. 7:28

¹² Kadi tuka bilumbu ya Yoane mbotiki ti ntangu yai, kimfumu ya zulu ikele kusalwa ngolo, ye bankwa ngolo ikele kubotula yo.

¹³ Kadi bambikudi yonso ye nsi ku bikulaka ti Yoane. Luk. 16:16

¹⁴ Kana beno zola kukwikila yo, yandi ikele Elia ya zola kwiza. Malaki 4:5; Mat. 7:12; Mal. 9:13; Luk. 1:17

¹⁵ Yandi ya ikele na makutu bika yandi kuwa Mat. 13:9, 43; Nzai. 2:7

¹⁶ Kansi mono tafwanikisa mbandu yai na nki ? Yo ikele mpilamosi bana kuvanda mu mazandu, ya boka kwa bankaka, Luk. 7:31

¹⁷ ye tuba: Beto bulaka pitulu kwa beno kansi beno kinaka ve, beto yimbaka nkunga ya ntantu kansi beno bulaka ntulu ve.

¹⁸ Kadi Yoane kwizaka kudia ve ye kunwa ve, ye bau tuba: Yandi ikele na mpeve mbi.

¹⁹ Mwana ya muntu imene kwiza kudia ye kunwa, ye bau tuba: Tala, muntu ya kudia mingi ye munwi ya vinia, nduku ya bamfutisi ye bankwa masumu. Ngangu ikele kununguswa mu bisalu ya yandi.

Yesu tula ndola va Kapenaumi ye bambanza yankaka

²⁰ Nanima Yesu yantikaka kusemba bambanza mu yau yandi imene kusalaka bisalu ya nene ya yandi, sambu na bau pindulaka ntima ve. Luk. 10:12

²¹ Ndola kwa nge Kolasi. Ndola kwa nge Betesaida. Kadi kana bisalu ya ngolo salwaka mu Tilo ye Sidoni ya salwaka mu beno, ntama bau zolaka kupindula mabanza mu lele ya ngoto ye putulu.

²² Kansi mono tuba kwa beno mpe: Tilo ye Sidoni tamona mpasi fioti ye beno mingi mu kilumbu ya mfundusu.

²³ Nge Kapenaumi, nge banza nge tatombolwa ku zulu ? Nge takulumuswa ti nsi ya bafwa; kadi kana bisalu ya ngolo salwaka mu Sodoma ya salwaka mu nge, yo zolaka kuvanda ti kilumbu yai.

²⁴ Mono tuba kwa beno mpe: Ntoto ya Sodoma tamona mpasi fioti ye nge mingi mu kilumbu ya mfundusu. Mat. 10:15

Yesu kupesa matondo ye silaka luvundu kwa ya lembwa

²⁵ Ntangu yina Yesu vutulaka ye tubaka: Mono pesa nge matondo, Tata, Mfumu ya zulu ye ntoto, sambu na nge imene kusweka mambu yai na bankwa ngangu ye bantu ya zaba, ye nge imene kuzabisa yau kwa bana fioti. Luk. 10:21

²⁶ E, Tata, kadi mpilayai yo zolakana nantwala na nge.

²⁷ Tata ya mono imene kupesa mono bima yonso; muntu zaba Mwana ve kaka Tata, ye muntu zaba Tata ve kaka Mwana, ye konsonani ya Mwana zola kuzabisa yandi. Nk. 8:6; Mat. 28:18; Yoa. 1:18; 3:35; 6:46; 17:2

²⁸ Kwiza kwa mono beno yonso ya lembwa ye ya ikele ya kizitu mingi, ye mono tavundisa beno.

²⁹ Baka vangu ya mono ye beno, longuka na mono, kadi mono ikele nlembami ye ntima ya kulumuka; ye beno tamona luvundu mu miela ya beno. Yel. 6:16

³⁰ Kadi vangu ya mono ikele mpasi ve, ye kizitu ya mono ikele kilo ve.