Malako 9 - Le Nouveau Testament en Kikwango 1950

Yesu kembiswa

¹ Yandi tubaka kwa bau: Kieleka, mono tuba kwa beno: Bankaka ikele kutelema awa bau tameka lufwa ve ti bau mona kimfumu ya Nzambi kwiza mu ngolo.

² Nanima bilumbu sambanu, Yesu bakaka Petelo ye Yakobi ye Yoane ye kwendaka na bau mu kinsweki va mongo ya nda, bau mosi; yandi kitukaka nantwala na bau. Mat. 17:1; Luk. 9:28

³ Mvwatu ya yandi kituka kenzima, mpembe mingi, musukudi ya nlele va ntoto lenda kusukula yo mpilayai ve.

⁴ Elia ye Mose monikaka kwa bau, ye bau solulaka na Yesu.

⁵ Petelo vutulaka ye tubaka kwa Yesu: Nlongi, ikele mbote bu beto ikele awa, bika beto sala mafwokula tatu, mosi ya nge, mosi ya Mose, mosi ya Elia.

⁶ Kadi yandi zabaka ve mambu ya yandi fwiti kutuba, kadi bau vandaka na boma mingi.

⁷ Buna tuti kwizaka kufuka bau, ye ndinga basikaka na dituti: Yai ikele Mwana ya mono ya zolwa, beno kuwa yandi. Mal. 1:11; 2 Pet. 1:17

⁸ Nswalu bu bau talaka ndambu yonso, bau monaka muntu diaka ve, kansi Yesu kaka vandaka na bau.

Yesu binga Yoane mbotiki Elia

⁹ Bu-bau kulumukaka va mongo, yandi sikidikisaka bau kutuba kwa muntu ve mambu ya bau monaka, ti Mwana ya muntu imene kufulukiswa tuka bafwa. Mat. 17:9

¹⁰ Bau kebaka mambu yina ye bau yuvulanaka: Fuluka ya bafwa ikele nki ?

¹¹ Bau yuvulaka yandi, kutuba: Sambu na nki bansoniki ikele kutuba Elia takwiza ntete.

¹² Yandi tubaka kwa bau: Elia takwiza ntete kuvutula bima yonso ya vandaka ntete. Kansi mpila nki ya sonama sambu na Mwana ya muntu ? Yandi tamoniswa mpasi mingi, ye tasaulwa. Yes. 53:3; Dan. 9:26; Nk. 22:6

¹³ Mono tuba kwa beno: Elia imene kwiza ye bau sadilaka yandi mambu yonso ya bau zolaka, bonso ikele kusonama sambu na yandi. Mat. 11:14; Luk. 1:17

Yesu basisa mpeve mbi

¹⁴ Bu bau kumaka kwa banlonguki ya yandi, bau monaka kibuka mingi zunga bau; bansoniki tudisaka bau ntembe. Mat. 17:14; Luk. 9:37

¹⁵ Nswalu bu kibuka yonso monaka yandi, bau yitukaka ye kwendaka ntinu kupesa yandi mbote.

¹⁶ Yandi yuvulaka bau: Sambu na nki beno ikele kutula ntembe ?

¹⁷ Mosi mu kibuka vutulaka kwa yandi: Nlongi, mono twalaka mwana ya mono kwa nge, yandi ikele na mpeve ya baba.

¹⁸ Konsosika yo twala yandi, yandi losa yandi va ntoto, yandi basisa mafulufulu ye kwetisa meno ye yandi imene kutanda mingi. Ye mono tubaka kwa banlonguki ya nge kubasisa yandi kansi bau lendaka ve.

¹⁹ Yandi vutulaka ye tubaka kwa bau: Beno mbandu yai ya konda lukwikilu, ntangu ikwa mono tavanda na beno, ntangu ikwa mono tavibidila beno ? Twala yandi kwa mono.

²⁰ Bau twalaka yandi kwa yandi. Bu mpeve monaka yandi, nswalu yandi tuntumunaka yandi ngolo ye yandi kubwaka va ntoto ye nengumukaka ye basisaka mafulufulu. Mal. 1:26

²¹ Yandi yuvulaka tata ya yandi: Ntangu ikwa tuka na yai kwizaka kwa yandi ? Yandi tubaka: Tuka kimwana.

²² Mbala mingi yandi losaka yandi mu tiya ye mu masa, sambu na kufwa yandi, kansi kana nge lenda kusala mambu, kuwila beto nkenda, sadisa beto.

²³ Yesu tubaka kwa yandi: Kana nge lenda kukwikila! Mambu yonso lenda kwiza kwa bau ya kwikila. Luk. 17:6

²⁴ Buna tata ya mwana bokaka nswalu ye tubaka: Mono imene kukwikila, sadisa kondwa lukwikilu ya mono.

²⁵ Bu Yesu monaka kibuka kwiza na ntinu kuna sikamosi, yandi sembaka mpeve ya sumuka ye tubaka kwa yandi: Nge mpeve ya baba ve ya makutu kufwa, mono tuba kwa nge: Basika tuka yandi, kota mu yandi diaka ve! munaka yandi ye basikaka.

²⁶ Mwana vandaka bonso yandi imene kufwa, sambu na yai bantu mingi tubaka: Yandi imene kufwa.

²⁷ Kansi Yesu simbaka diboko ya yandi ye telemisaka yandi; ye yandi telemaka.

²⁸ Bu yandi kotaka mu nzo, banlonguki ya yandi yuvulaka yandi mu kinsweki; Sambu na nki beto lendaka ve kubasisa yandi ?

²⁹ Yesu tubaka kwa bau: Mutindu yai lenda ve kubasiswa na kima yankaka, kansi kaka mu lombilu ye kubuya madia.

Yesu songa mpasi ya yandi

³⁰ Bau katukaka kuna ye kwendaka kuluta mu Ngalili, yandi zolaka ve na muntu kuzaba yo. Mat. 17:22; Luk. 9:43

³¹ Kadi yandi longaka banlonguki ya yandi, ye tubaka kwa bau: Mwana ya muntu tayekulwa mu maboko ya bantu, bau takufwa yandi, bu yandi imene kufwa, yandi tafulukiswa mu kilumbu ya tatu. Mal. 8:31

³² Bau zabaka mambu yina ve, bau titaka kuyuvula yandi.

Yesu longa mambu ya kieleka

³³ Bau kwizaka ku Kapenaumi. Bu yandi vandaka mu nzo, yandi Yuvulaka bau: Nki beno tulaka ntembe mu nzila ? Mat. 18:1

³⁴ Kansi bau vandaka napi, kadi mu nzila bau tulaka ntembe kana nani taluta nene.

³⁵ Bu yandi ikele kuvanda, yandi bingaka bau kumi ye zole ye tubaka kwa bau: Kana muntu zola kuvanda ya ntete, yandi tabika nanima na bantu yonso ye vanda sielo ya bau yonso. Mat. 20:26, 27; 23:11, 12; Mal. 10:43, 44

³⁶ Yandi bakaka mwana fioti ye tulaka yandi nakati ya bau, bu yandi imene kubaka yandi na maboko, yandi tubaka kwa bau:

³⁷ Konsonani ya baka mosi ya bana fioti mpilayai kaka mu nkumbu ya mono, yandi ikele kubaka mono; konsonani ya baka mono, ikele kubaka mono ve kansi yandi ya fidisaka mono.

Yesu longa mambu Ya sakuba

³⁸ Yoane tubaka kwa yandi: Nlongi, beto monaka muntu kubasisa bampeve mbi mu nkumbu ya nge. Beto kanikinaka yandi, sambu na yandi landaka beto ve. Luk. 9:49

³⁹ Kansi Yesu tubaka: Kanikina yandi ve, kadi muntu ikele ve ya sala kidimbu mu nkumbu ya mono ya lenda kutuba mbi sambu na mono nswalu. 1 Kol. 12:3

⁴⁰ Kadi konsonani ya ikele na kimbeni ve kwa beto, yandi ikele ya beto.

⁴¹ Kadi konsonani ya pesa beno kopo ya masa ya kunwa mu nkumbu ya mono sambu na beno ikele ya Klisto, kieleka mono tuba kwa beno: Yandi tavidisa ve nsendo ya yandi ta fioti.

⁴² Ye konsonani ya kutesa mosi ya bana yai ya fioti ya kwikila mono sakuba, ya ikele mbote sambu na yandi kana ditadi ya kunika fu, fu kangwa va nkingu ya yandi ye yandi loswa mu mbu. Mat. 18:6; Luk. 17:1

⁴³ Kana diboko ya nge kutesa nge sakuba, zenga yo, ikele mbote na nge, kukota mu moyo na kieta keti kwenda na maboko zole mu bilungi, yo ikele tiya ya lenda kuzima ve, Luk. 16:24

⁴⁴ Kuna banyama ya bau ikele kufwa ve, ye tiya ikele kuzima ve.

⁴⁵ Kana dikulu ya nge kutesa nge sakuba, zenga yo, ikele mbote kwa nge, kukota mu moyo na tembila keti kwenda na makulu zole mu bilungi.

⁴⁶ Kuna banyama ya bau ikele kufwa ve, ye tiya ikele kuzima ve.

⁴⁷ Kana disu ya nge kutesa nge lakuba, katula yo, ikele mbote kwa nge, kukota mu kimfumu ya Nzambi na disu mosi keti kwenda na meso zole mu bilungi,

⁴⁸ ku na banyama ya bau ikele kufwa ve, ye tiya ikele kuzima ve.

⁴⁹ Kadi bantu yonso tazenzulwa na tiya, ye bankailu yonso tazenzulwa na mungwa.

⁵⁰ Mungwa ikele mbote, kansi kana nzenzo ya mungwa imene kukatu ka, na nki beno tazenzula yo diaka ? Vanda na mungwa mu beno kibeni ye vandana na yenge. Mat. 5:13; Luk. 14:34