Malako 8 - Le Nouveau Testament en Kikwango 1950

Yesu dikila babakala malunda iya

¹ Mu bilumbu yina bu kibuka mingi kutakanaka ye bau vandaka na kima ve ya kudia, Yesu bingaka banlonguki ya yandi, ye tubaka kwa bau: Mat. 15:32

² Mono kuwila kibuka nkenda, sambu na bau imene kuvanda na mono bilumbu tatu ye bau ikele na kima ve ya kudia.

³ Kana mono sindika bau na nzala ku banzo ya bau, bau talembwa mu nzila, bankaka ya bau imene kukatuka ntama.

⁴ Ye banlonguki ya yandi vutulaka kwa yandi: Beto lenda kubaka mampa wapi awa mu nsi ya mpamba, kuyukutisa bantu yai ?

⁵ Yandi yuvulaka bau: Mampa ikwa ikele na beno ? Bau tubaka: Nsambwadi.

⁶ Yandi sikidikisaka kibuka kuvanda va ntoto; yandi bakaka mampa nsambwadi, yandi pesaka matondo ye bukunaka yau ye pesaka yau kwa banlonguki ya yandi kutula yau nantwala ya bantu ye bau tulaka yau nantwala ya kibuka.

⁷ Bau vandaka na ndambu ya bambizi ya fioti ya masa; bu yandi sakumunaka yau, yandi sikidikisaka bau, kutula yau mpe nantwala ya bau.

⁸ Bau kudiaka ye yukutaka, bau logotaka bitini ya bikaka bitunga nsambwadi.

⁹ Bau ya kudiaka vandaka bantu mafunda iya. Buna yandi sindikaka bau.

¹⁰ Nswalu yandi kotaka mu bota ye banlonguki ya yandi, ye bau kumaka ku ndambu ya Dalmanuta.

Bafalisi lomba kidimbu ya zulu

¹¹ Bafalisi kwizaka ye yantikaka kutudisa ntembe, bau lombaka yandi kidimbu ya zulu, kuyunsa yandi. Mat. 16:1; Luk. 11:29; Yoa. 6:30

¹² Yandi vumukaka mu mpeve ya yandi, yandi tubaka: Sambu na nki mbandu yai ikele kulomba bidimbu ? Kieleka mono tuba kwa beno: Mbandu yai tapeswa kidimbu ve.

¹³ Yandi bikaka bau diaka ye kotaka mu bota ye sabukaka ku simu.

Yesu luengisa bantu sambu na lufunusu ya bafalisi

¹⁴ Banlonguki vilaka kunata mampa, bau vandaka na dimpa mosi kaka na bau mu bota. Mat. 16:5

¹⁵ Yandi sikidikisaka bau kutuba: Beno tomatala, dikeba sambu na lufunusu ya bafalisi ye lufunusu ya Elode.

¹⁶ Bau yuvulaka sambu na bau konda mampa.

¹⁷ Bu Yesu zabaka yo, yandi tubaka kwa bau: Sambu na nki beno ikele kutu bana, sambu na beno ikele na mampa ve ? Beno bakisa ve ye beno zaba ve ? Beno ikele na ntima ya ngolo ?

¹⁸ Beno ikele na meso ye mona ve ? Beno ikele na makutu ye kuwa ve ? Beno bambuka ve ?

¹⁹ Bu mono bukunaka mampa tanu kwa bantu mafunda tanu, bitunga ikwa fulukaka na bitini ya beno logotaka ? Bau tubaka kwa yandi: Kumi ye zole. Mat. 14:17; Mal. 6:41; Luk. 9:13; Yoa. 6:6

²⁰ Ye bu mono bukunaka mampa nsambwadi kwa bantu mafunda iya, bitunga ikwa fulukaka na bitini ya beno logotaka ? Bau tubaka: Nsambwadi. Mat. 15:34

²¹ Yandi tubaka kwa bau: Beno bakisa ve ti ntangu yai ?

Yesu belula mpolo mfinama ku Betesaida

²² Yandi kumaka ku Betesaida, bau twalaka muntu ya mpofo, bau bombidilaka yandi kuvalakana yandi.

²³ Yandi simbaka diboko ya muntu mpofo ye twalaka yandi nanganda ya mbanza, bu yandi imene kulosa mate va meso ya yandi ye tula yandi maboko, yandi yuvulaka: Nge imene kumona kima ?

²⁴ Yandi sendulaka meso, ye tubaka: Mono mona bantu bonso banti ya tambula.

²⁵ Buna yandi tulaka maboko diaka va meso ya yandi, yandi talaka ti ti ye yandi belukaka ye monaka bima yonso mbote.

²⁶ Yesu sindikaka yandi ku nzo ya yandi, kutuba: Kota mu mbanza ve.

Kitemo ya Petelo

²⁷ Yesu ye banlonguki ya yandi kwenda ku bambanza ya Kaisalia Filipi; mu nzila yandi yuvulaka banlonguki ya yandi kutuba kwa bau: Bantu ikele kutuba, mono ikele nani ? Mat. 16:13; Luk. 9:18

²⁸ Bau vutulaka kutuba: Yoane Mbotiki; ye bankaka tuba: Elia, kansi bankaka tuba: Mosi ya bambikudi.

²⁹ Ye yandi yuvulaka bau kibeni: Kansi beno tuba mono ikele nani ? Petelo vutulaka ye tubaka kwa yandi: Nge ikele Klisto.

³⁰ Yandi sikidikisaka bau, kutuba mambu yai ya yandi kwa muntu ve.

Yesu songa mpasi ya yandi tamoniswa

³¹ Yandi yantikaka kulonga bau, na Mwana ya muntu tamoniswa mpasi mingi, ye bambuta ya bantu ye bambuta banganga ye bansoniki tabuya yandi ye takufwa yandi ye mu kilumbu ya tatu yandi tafulukiswa. Mat. 16:21; Luk. 9:22

³² Yandi tubaka mambu yina mu kinsweki ve. Buna Petelo bakaka yandi ye sembaka yandi.

³³ Kansi yandi pindukaka ye talaka banlonguki ya yandi, yandi sembaka Petelo, ye tubaka: Kwenda nanima na mono, Satana, kadi nge yindula mambu ya Nzambi ve, kansi ya bantu. Mat. 4:10

Yesu songa banlonguki ya yandi sambu na kulunsi ye mpasi

³⁴ Ye yandi bingaka kwa yandi kibuka ye banlonguki ya yandi, ye tubaka kwa bau: Konsonani ya zola kulanda mono, bika yandi dibuya ye baka kulunsi ya yandi ye landa mono. Mat. 16:24; Luk. 9:25; Yoa. 12:25

³⁵ Kadi konsonani ya zola kuvulusa moyo ya yandi, yandi tavidisa yo, kansi konsonani ya vidisa moyo ya yandi sambu na mono ye sambu na nsamu mbote, yandi tavulusa yo.

³⁶ Kadi yo tasadisa muntu na nki ka na yandi baka ndandu ya nsi yamvimba ye vidisa moyo ya yandi ?

³⁷ Keti muntu fwiti kupesa nki kukula moyo ya yandi ?

³⁸ Konsonani ya kuwa nsoni sambu na mambu ya mono mu mbandu yai ya bizumba ye masumu, Mwana ya muntu tawila yandi nsoni bu yandi kwiza mu nkembo ya Tata ya yandi na banjo ya nlongo. Zak. 14:5; Mat. 25:31; 26:65; Lom. 1:15; 2 Tim. 1:8, 12