Malako 6 - Le Nouveau Testament en Kikwango 1950

Yesu kwenda ku Nazaleti

¹ Yandi katukaka kuna ye kwizaka ku ntoto ya yandi kibeni ye banlonguki ya yandi landaka yandi. Mat. 13:54

² Bu kilumbu ya luvundu kwizaka, yandi yantikaka kulonga mu nzo ya sambilu ye mingi ya kuwaka yandi yitukaka, kutuba: Yandi bakaka mambu yai wapi ? Ye nki ngangu yai ya peswaka kwa yandi, sambu na bisalu ya nene ikele kusalwa mu maboko ya yandi! Luk. 4:16

³ Yai ikele musadi ya mabaya ve ? Mwana ya Malia, mpangi ya Yakobi ye Yose ye Yuda ye Simoni! Ye bampangi bankento ya yandi ikele awa na beto ve ? Ye bau sakuba mu yandi. Yoa. 6:42

⁴ Yesu tubaka kwa bau: Mbikudi ikele kukonda luzitu ve, kansi kaka mu ntoto ya yandi ye nakati ya bibutu ya yandi ye mu nzo ya yandi. Mat. 13:57; Luk. 4:24; Yoa. 4:44

⁵ Yandi lendaka kusala bisalu ya nene kuna ve, kansi kaka kutula maboko va ndambu ya bantu ya maladi, ye yandi belulaka bau.

⁶ Yandi yitukaka sambu na bau kondaka lukwikilu. Yandi kwendaka kuzieta mu mabwala kulonga.

Yesu fidisa banlonguki ya yandi

⁷ Yandi bingaka banlonguki kumi ye zole, ye yantikaka kufidsa bau zole zole, ye pesaka bau ngolo kuluta bampeve ya sumuka. Mal. 3:13; Mat. 10:1; Luk. 9:1

⁸ Yandi tubaka kwa bau: Nata bima mu nzila ve, kansi nkawa kaka; madia ve, makuba ve, ye mbongo mu ngoto ve: Mat. 10:9; Luk. 9:3

⁹ kansi vwata nsampatu; ye vwata binkutu zole ve. Bis. 12:8

¹⁰ Ye yandi tubaka kwa bau: Konsosika ya beno kota mu nzo, beno vanda muna ti beno katuka kuna. Mat. 10:11

¹¹ Ye konsosika ya bau baka beno ve, ye kuwa beno ve, bu beno katuka kuna beno katula mfumfuta na nsi ya bitambi ya beno, sambu na kitemo kwa bau. Bis. 13:51

¹² Buna bau kwendaka kusamuna na bantu tapindula mabanza.

¹³ Ye bau basisaka bampeve mingi ya mbi, ye sitaka bambevo mingi mafuta, ye belulaka bau. Yak. 5:14

Elode kuwa nsamu ya Yesu

¹⁴ Ntinu Elode kuwaka mambu yai, kadi nkumbu ya Yesu zabakanaka, ye yandi tubaka: Yoane Mbotiki imene kufulukiswa tuka bafwa, buna bisalu yai ya ngolo ikele kusalwa mu yandi. Mat. 14:1; Luk. 9:7

¹⁵ Bankaka tubaka, yai ikele Elia. Bankaka tubaka ikele mbikudi keti bonso mosi ya bambikudi.

¹⁶ Bu Elode kuwaka mambu yai, yandi tubaka: Yandi ikele Yoane ya mono zengaka ntu, yandi imene kufulukiswa tuka bafwa.

Yoane mbotiki zengwa ntu

¹⁷ Kadi Elode kibeni fidisaka ye bakaka Yoane, yandi kangaka yandi mu boloko, sambu na Elodia, nkento ya mpangi ya yandi Filipo, kadi yandi imene kukwela na yandi. Mat. 14:3; Luk. 3:19

¹⁸ Kadi Yoane tubaka kwa Elode: Nsiku ikele kubuya nge kuvanda na nkento ya mpangi ya nge.

¹⁹ Buna Elodia vandaka na kimbeni kwa yandi, yandi zolaka kufwa yandi,

²⁰ kadi Elode titaka Yoane, kuzaba na yandi ikele muntu ya lunungu ye ya nlongo, yandi kebaka yandi mbote, ye bu yandi kuwaka yandi, yandi salaka mambu mingi, ye yandi kuwaka yandi na kiese. Mat. 21:26

²¹ Bu kilumbu ya lunga kwizaka, mu kilumbu ya lubutuku ya Elode, yandi salaka madia ya fete sambu na bakuluntu ya yandi ya nene ye bamfumu ya bakuluntu ya basoldat ye bankwa luzitu ya Ngalili.

²² Bu mwana nkento ya Elodia kotaka, ye kinaka ye yangidisaka Elode ye bau ya vandaka na yandi na meza. Ntinu tubaka kwa mwana nkento: Lomba mono konsonki ya nge zola, ye mono tapesa nge yo.

²³ Yandi zengilaka yandi ndefi: Konsonki ya nge talomba, mono tapesa yo ti nakati ya kimfumu ya mono.

²⁴ Yandi basikaka ye tubaka kwa ngudi ya yandi: Nki mono talomba ? Yandi tubaka: Ntu ya Yoane Mbotiki.

²⁵ Yandi kotaka nswalu kwa ntinu ye lombaka ye tubaka: Mono zola nge kupesa mono awa mu dilonga ntu ya Yoane Mbotiki.

²⁶ Buna ntinu vandaka na ntantu mingi, kansi sambu na ndefi ye sambu na bau ya vandaka na meza, yandi zolaka ve kubuya yandi yo.

²⁷ Nswalu ntinu fidisaka mosi ya basoldat ya yandi, ye tubaka kwa yandi kutwala ntu ya yandi. Yandi kwendaka ye zengaka ntu ya yandi mu boloko.

²⁸ Yandi twalaka ntu ya yandi mu dilonga ye pesaka yo kwa mwana nkento, ye mwana nkento pesaka yo kwa ngudi ya yandi.

²⁹ Bu banlonguki ya yandi kuwaka yo, bau kwizaka ye bakaka mvumbi ya yandi, ye tulaka yo mu ndiamu.

Banlonguki vutuka kwa Yesu

³⁰ Bantumwa kutakanaka kwa Yesu, bau tubaka kwa yandi mambu yonso ya bau salaka ye longaka. Mat. 14:13; Luk. 9:10; Yoa. 6:1

³¹ Yandi tubaka kwa bau: Beno kwiza beno kibeni mu kinsweki ku nsi ya mpamba, beno vunda fioti. Kadi mingi kwizaka ye kwendaka, ye bau vandaka na ntangu ve kudia. Mal. 3:20

³² Buna bau kwendaka mu bota ku nsi ya mpamba mu kinsweki.

³³ Bantu monaka bau kwenda; ye mingi zabaka bau ye bau kwendaka na makulu tuka na bambanza yonso, ye bau kumaka kuna ntete.

Yesu dikila babakala mafunda tanu

³⁴ Bu Yesu basikaka, yandi monaka kibuka mingi, yandi kuwilaka bau nkenda, sambu na bau vandaka bonso mameme ya konda mvungi, ye yandi yantikaka kulonga bau mambu mingi. Mat. 9:36

³⁵ Bu mwini zolaka kumana, banlonguki kwizaka kwa yandi ve tubaka: Yai ikele sika ya ikele nsi ya mpamba, ye mwini zola kumana;

³⁶ sindika bau, na bau takwenda ku nseke ye mabwala ya zunga ye disumbila madia; sambu na bau ikele na kima ve kudia.

³⁷ Yandi vutulaka ye tubaka kwa bau: Beno pesa bau ya kudia, Bau tubaka kwa yandi: Beto takwenda kusumba mampa na mbongo denali nkama zole, ye pesa bau kudia ?

³⁸ Yandi tubaka kwa bau: Mampa ikwa ikele na beno ? Kwenda kutala. Bu bau imene kuzaba, bau tubaka: Mampa tanu ye mbizi ya masa zole.

³⁹ Yandi sikidikisaka bau yonso kuvanda kibuka kibuka va matiti mu sika yina.

⁴⁰ Bau vandaka mu ndonga ndonga, bankaka nkama-nkama, bankaka makumu tanu-tanu.

⁴¹ Bu yandi imene kubaka mampa tanu ye mbizi zole, yandi talaka ku zulu, ye sakumunaka mampa, ye bukunaka yau, ye pesaka yau kwa banlonguki sambu na kupesa bau, ye yandi kabaka mbizi ya masa zole kwa bau yonso.

⁴² Bau yonso kudiaka, ye bau yukutaka.

⁴³ Bau logotaka bitini, yau fulukaka bitunga kumi ye zole, ye mbizi mpe.

⁴⁴ Bau ya kudiaka mampa vandaka babakala mafunda tanu.

Yesu tambula va masa

⁴⁵ Nswalu yandi kotisaka banlonguki ya yandi mu bota, sambu na kwenda ntete ku simu ya Betesaida. Yandi mosi bikaka kusindika kibuka. Mat. 14:22; Yoa. 6:15

⁴⁶ Bu yandi imene kupesa bau mbote, yandi kwendaka ye tombokaka va mongo, sambu na kulo, mba.

⁴⁷ Bu nkokila kubwaka, bota vandaka nakati ya mbu, ye yandi mosi vandaka va ntoto.

⁴⁸ Bu yandi monaka bau ikele kumona mpasi mu kusabuka, sambu na mupepe ikele kuvutula bau, yandi kwizaka kwa bau na lokula ya kengila, yandi tambulaka va mbu, mpilamosi yandi zola kuluta.

⁴⁹ Kansi bu bau monaka yandi kutambula va mbu, bau banzaka yandi ikele mpeve, ye bau bokaka.

⁵⁰ Kadi bau yonso monaka yandi, bau titaka mingi, ye nswalu yandi tubaka kwa bau: Vanda na kikesa, yai ikele mono, vanda na boma ve!

⁵¹ Yandi kotaka kwa bau mu bota, ye mupepe bikaka; bau yitukaka mingi.

⁵² Kadi bau banzaka ve mambu ya salwaka na mampa, kansi ntima ya bau vandaka ngolo.

⁵³ Bu bau imene kusabuka ku simu yina, bau kumaka ku Ngenesaleti, bau kangaka bota kuna. Mat. 14:34

Yesu belula bambevo

⁵⁴ Bu bau basikaka mu bota, nswalu bantu zabaka yandi;

⁵⁵ bau tambulaka mu nsi yina yonso ye yantikaka kutwala va bambeto bantu ya maladi ye bambevo ku sika ya bau kuwaka yandi ikele.

⁵⁶ Konsosika ya yandi kotaka, mu mabwala ya fioti, keti mu bambanza, keti mu nseke, bau tulaka bambevo mu sika ya mazandu, bau bombidilaka yandi na bau lenda kuvalakana nsongi ya mvwatu ya yandi kaka; ye bau yonso ya valakanaka yandi, bau belukaka.