Malako 5 - Le Nouveau Testament en Kikwango 1950

Yesu basisa bampeve ya sumuka

¹ Bau kumaka ku simu ya mbu, ku ntoto ya bantu ya Ngelasa. Mat. 8:28; Luk. 8:26

² Bu yandi basikaka na bota, nswalu muntu kutakanaka na yandi, ya basikaka na bandiamu, ya vandaka na mpeve ya sumuka.

³ Yandi vandaka ntangu yonso mu bandiamu, muntu lendaka kukanga yandi ve na minyololo.

⁴ Sambu na yandi kangwa mbala mingi na mbienga ye minyololo, kansi yandi zengaka minyololo ye yandi pasulaka mbienga mu bitini, yandi lendaka ve kulemvuka kwa muntu.

⁵ Bilumbu yonso mpimpa ye mwini yandi vandaka mu bandiamu ye bamongo, yandi bokaka ye dilwadisaka na matadi.

⁶ Kansi bu yandi monaka Yesu ntama, yandi kwendaka ntinu, ye sambilaka yandi,

⁷ Yandi bokaka mu ndinga ya nene ye tubaka: Nki mambu beto ikele na nge ? Nge Mwana ya Nzambi Mpungu, Mono bombidila nge mu nkumbu ya Nzambi, monisa mono mpasi ve.

⁸ Kadi yandi tubaka kwa yandi: Nge mpeve ya sumuka, basika na muntu yai.

⁹ Yandi yuvulaka yandi: Nkumbu ya nge nani ? Yandi vutulaka ye tubaka kwa yandi: Nkumbu ya mono ikele Lengio, kadi beto ikele mingi.

¹⁰ Yandi bombidilaka Yesu mingi na yandi tabasisa bau ve mu ntoto yina.

¹¹ Kansi kuna va mongo vandaka kibuka ya nene ya bangulu, bau vandaka kudia.

¹² Bampeve bombidilaka yandi kutuba: Fidisa beto mu bangulu, na beto lenda kukota mu bau.

¹³ Yandi ndimaka, ye bampeve ya sumuka basikaka ye kotaka mu bangulu ye kibuka ya bangulu kwendaka ntinu ku nsi ya mongo mu mbu, bangulu mafunda zole, dindaka mu mbu.

¹⁴ Ye bau ya pesaka madia kwa bangulu tinaka, bau tubaka mambu yai mu mbanza ye mu nseke. Bau kwizaka kutala kana nki kubwaka.

¹⁵ Bau kwizaka kwa Yesu, bau monaka muntu ya bakama na mpeve mbi, ikele yandi ya vandaka na Lengio, kuvanda ye vwata nlele ye ikele na ngangu, buna bau vandaka na boma.

¹⁶ Bau ya monaka yo tubaka kwa bau mambu ya kwizaka kwa muntu ya bakama na bampeve mbi ye mambu ya bangulu.

¹⁷ Bau yantikaka kubombidila yandi kukatuka na nsi ya bau.

¹⁸ Bu yandi kotaka mu bota, muntu ya bakama na bampeve mbi bombidilaka yandi na yandi lenda kuvanda na yandi.

¹⁹ Kansi yandi ndimaka ve, yandi tubaka kwa yandi: Kwenda ku nzo ya nge, kwa banduku ya nge, tuba kwa bau mambu ya nene ya Mfumu sadilaka nge ye yandi kuwilaka nge nkenda.

²⁰ Yandi kwendaka ye yantikaka kutuba mu Dekapoli mambu ya nene ya Yesu sadilaka yandi; bantu yonso yitukaka.

Yandi belula nkento ya vandaka na maladi ye telemisa mwana nkento ya Yailo

²¹ Bu Yesu sabukaka diaka ku simu mu bota, kibuka ya bantu mingi kutakanaka kwa yandi; yandi vandaka mfinama ku mbu. Mat. 9:18; Luk. 8:40

²² Nkuluntu mosi ya nzo ya sambilu kwizaka, nkumbu ya yandi Yailo, bu yandi monaka yandi, yandi fukamaka na makulu ya yandi.

²³ Yandi bombidilaka yandi mingi, kutuba: Mwana nkento ya mono ya fioti ikele mfinama na lufwa, mono lomba nge, kwiza tula maboko va yandi, na yandi lenda kubeluka ye yandi tavanda na moyo.

²⁴ Yesu kwendaka na yandi. Kibuka mingi landaka, bau fietikisaka yandi.

²⁵ Nkento ya vandaka na maladi ya menga basika, mvu kumi ye zole. Mat. 9:20; Luk. 8:43

²⁶ Yandi moniswaka mpasi mingi ya bamunganga mingi, ye yandi futaka bima yonso ya vandaka na yandi, yandi kwizaka mbote tafioti ve, kansi maladi lutaka;

²⁷ bu yandi kuwaka sambu na Yesu, yandi kwizaka nanima na Yesu mu kibuka, ye valakanaka mvwatu ya yandi,

²⁸ kadi yandi tubaka: Kana mono lenda kuvalakana mvwatu ya yandi kaka, mono tabeluka.

²⁹ Nto ya menga ya yandi yumaka nswalu; yandi zabaka mu nitu ya yandi na yandi imene kubeluka mu mpasi yina.

³⁰ Yesu zabaka nswalu na ngolo imene kubasika na yandi, yandi pindukaka kwa kibuka, ye tubaka: Nani imene kuvalakana mvwatu ya mono ? Mat. 14:36; Luk. 6:19

³¹ Banlonguki ya yandi tubaka kwa yandi: Nge mona kibuka imene kufietikisa nge, ye nge tuba: Nani valakanaka mono ?

³² Yandi talaka ndambu yonso sambu na kumona yandi ya salaka mpilayai.

³³ Nkento yina vandaka na boma, ye zakamaka; bu yandi zabaka mambu yasalwaka mu yandi, yandi kwizaka kufukama kwa yandi, ye tubaka kwa yandi mambu yonso kieleka.

³⁴ Kansi Yesu tubaka kwa yandi: Mwana, lukwikilu ya nge imene kuvulusa nge. Kwenda mu yenge, vanda ya beluka ya mpasi ya nge. Mal. 10:52

³⁵ Bu yandi ikele kutuba, bantu ya katukaka na nkuluntu ya nzo ya sambilu tubaka: Mwana nkento ya nge imene kufwa, sambu na nki nge ikele kubombidila Nlongi ? Luk. 8:49

³⁶ Bu Yesu kuwaka mambu ya bau tubaka, yandi tubaka kwa nkuluntu ya nzo ya sambilu: Vanda na boma ve, kwikila kaka.

³⁷ Yandi bikaka muntu yankaka landa yandi ve, kansi Petelo ye Yakobi ye Yoane mpangi ya Yakobi.

³⁸ Bau kumaka ku nzo ya nkuluntu ya nzo ya sambilu, yandi monaka bantu kudila ye makelele ye boka mingi. Mat. 9:23

³⁹ Bu yandi kotaka, yandi tubaka kwa bau: Sambu na nki beno ikele kusala makelele ye kudila ? mwana imene kufwa ve, kansi ikele kulala. Yoa. 11:11

⁴⁰ Bau sekaka yandi mingi. Kansi bu yandi imene kubasisa bau yonso, yandi bakaka tata ye ngudi ya mwana ye bau ya vandaka na yandi, kotaka mu sika ya mwana vandaka.

⁴¹ Yandi simbaka diboko ya mwana, ye tubaka kwa yandi: Talita kumi, tendula ya yo ikele: Mwana nkento, mono tuba kwa nge: Telema!

⁴² Nswalu mwana nkento telemaka ye tambulaka, kadi yandi vandaka mvu kumi ye zole, bau yitukaka na nyitukulu ya nene.

⁴³ Yandi sikidikisaka bau ngolo, na muntu tazaba yo ve, yandi sikidikisaka: Kupesa yandi ya kudia.