Malako 4 - Le Nouveau Testament en Kikwango 1950

Kingena ya mukuni

¹ Yandi yantikaka kulonga diaka va mukidi ya mbu. Ye kibuka ya nene mingi kutakanaka kwa yandi, sambu na yai yandi kotaka ye vandaka mu bota va mbu; kibuka yonso vandaka va mukidi ya mbu. Mat. 13:1; Luk. 8:4

² Yandi longaka bau mambu mingi mu bingana, ye yandi tubaka kwa bau mu malongi ya yandi:

³ Beno kuwa, Tala, mukuni kwendaka kukuna.

⁴ Yo vandaka mpilayai, bu yandi imene kukuna, yankaka kubwaka mfinama na nzila, bandeke ya zulu kwizaka kudia yau.

⁵ Yankaka kubwaka va sika ya matadi, ya kondaka ntoto mingi, ye nswalu yau menaka, sambu na yau vandaka na ntoto nansi ve.

⁶ Kansi bu ntangu tombokaka, yau jikaka; sambu na yau kondaka mianzi, yau yumaka.

⁷ Yankaka kubwaka mu nsinga ya nsende, nsende kulaka, ye fietikisaka yau; ye yau yelaka mabundu ve.

⁸ Yankaka kubwaka va ntoto ya mbote, yau pesaka mabundu, yau menaka, yau kulaka; yau butaka mabundu, yankaka makumi tatu tatu, yankaka makumi sambanu sambanu, yankaka nkama nkama.

⁹ Yandi tubaka kwa bau: Konso muntu ya ikele na makutu, bika yandi kuwa.

Tendula ya kingana ya mukuni

¹⁰ Bu yandi vandaka yandi mosi kaka, bayina ya zungaka yandi sikamosi na banlonguki kumi ye zole yuvulaka yandi sambu na bingana yina. Mat. 13:10; Luk. 8:9

¹¹ Yandi tubaka kwa bau: Yo ikele kupeswa kwa beno kuzaba mambu ya kinsweki ya kimfumu ya Nzambi, kansi kwa bayina ya ikele nanganda mambu yai yonso ikele kusalwa mu bingana;

¹² bau ya tala, ikele kutala, kansi bau mona ve; ye bau ya kuwa ikele kuwa kansi bau zaba ve, keti bau tapindula diaka ye masumu ya bau vidiswa. Yes. 6:9; 9:10; Yoa. 12:40; Bis. 28:26

¹³ Yandi tubaka kwa bau: Beno zaba ve kingana yai ? Mpila nki beno tazaba bingana yonso ?

¹⁴ Mukuni ikele kukuna mambu ya Nzambi:

¹⁵ Kansi bayai ikele bau mfinama na nzila: Sika mambu ya Nzambi kunwaka, bu bau kuwaka yau, nswalu Satana kwiza katula mambu ya Nzambi ya kunwaka mu bau.

¹⁶ Bau ya kunwaka na sika ya matadi ikele bayai: Bu bau kuwaka mambu ya Nzambi, nswalu bau bakaka yo mu kiese;

¹⁷ kansi mianzi ikele ve mu bau kibeni, kansi bau vandaka ntangu fioti, nanima bu mpasi ye nzomono kwizaka sambu na mambu ya Nzambi, nswalu bau kutasakuba.

¹⁸ Ye bau ya kunwaka mu nsinga ya nsende ikele bau ya kuwaka mambu ya Nzambi,

¹⁹ ye mabanza ya nsi yai, ye makusa ya kimvwama ye zola ya bima yankaka kukota, yau fietikisa mambu ya Nzambi ye yo konda mabundu. 1 Tim. 6:9

²⁰ Ye bau ya kunwaka va ntoto ya mbote ikele bayai: Bau kuwaka mambu ya Nzambi ye bakaka yau ye butaka mabundu makumi tatu tatu, makumi sambanu sambanu, ye yankaka nkama nkama.

Mambu ya Nzambi ikele mwini

²¹ Yandi tubaka kwa bau: Mwinda ikele kunatwa ye tulwa nansi ya sanduku keti nansi ya mbeto ? Yo ikele kunatwa sambu na kutulwa va kilundilu ya mwinda ve ? Luk. 8:16; 11:33

²² Kima ya kinsweki ikele ve ya konda kuzabakana; kadi kima ikele kuswekwa mpe ve, kansi yo tamonika.

²³ Kana muntu ikele na makutu, bika yandi kuwa.

²⁴ Yandi tubaka kwa bau: Beno tomatala mambu ya beno ikele kuwa. Kitezo ya beno tatezila, yo tatezilwa kwa beno mpe, ye beno tapeswa yankaka va zulu na yina. Luk. 8:8

²⁵ Kadi konsonani ya ikele na bima, yandi tapeswa yankaka, ye konsonani ya ikele na bima ve, yandi tabotulwa yina ya ikele na yandi. Mat. 13:12; Luk. 8:18

Kimfumu ya zulu ikele mpilamosi nkeni

²⁶ Yandi tubaka: Kimfumu ya Nzambi ikele bonso muntu ya mwangisaka nkeni va ntoto;

²⁷ yandi lalaka, yandi sikamaka mu mpimpa ye mwini, ye nkeni menaka, yau kulaka, mutindu nki yau kulaka yandi zaba ve.

²⁸ Ntoto kibeni ikele kubuta mabundu: Ntete nsongi, nanima nsesa nanima nkeni ya imene kuyela mu nsesa.

²⁹ Kansi bu nkeni imene kuyela, nswalu yandi fidisa bazengi, sambu na nsungi ya ngionzoko ya bilanga ikele mfinama. Yoeli 3:13; Nzai. 14:15

Kangana ya nkeni ya mutadi

³⁰ Yandi tubaka: Mpila nki beto tafwanikisa kimfumu ya Nzambi, keti mu kingana nki beto tatuba yo ?

³¹ Yo ikele mpilamosi nkeni ya mutade; bu yo kunwaka va ntoto, yo luta nkeni yonso fioti ya ikele va ntoto;

³² kansi bu yo kunwaka yo kulaka ye lutaka matiti yonso nene, yo ikele kubasisa mavala ya nene, na bandeke ya zulu lenda kulala mu kini ya yo.

Yesu tubaka bingana yankaka

³³ Mu bingana ya mutindu yai yandi tubaka mambu kwa bau, bonso bau lenda kuwa. Mat. 13:34

³⁴ Yandi tubaka kwa bau mpamba ve, kansi mu bingana, bu bau vandaka mu kinsweki yandi tendulaka mambu yonso kwa banlonguki ya yandi.

Yandi bikisa kitembo

³⁵ Kilumbu yina bu nkokila kubwaka, yandi tubaka kwa bau: Biko beto sabuka ku simu. Mat. 8:18; Luk. 8:22

³⁶ Bau sindikaka kibuka ye bau kwendaka na yandi mu bota, bonso yandi vandaka, kansi babota yankaka mpe kwendaka sikamosi na yandi.

³⁷ Kitembo ya ngolo ya mupepe kwizaka, ye mayo kubwaka nakati ya bota, bota zolaka kufuluka na masa.

³⁸ Yandi kibeni lalaka va cousin nansi ya bota. Bau sikimisaka yandi, bau tubaka kwa yandi: Nlongi yo ikele mambu ve kana beto kufwa ?

³⁹ Yandi telemaka ye sembaka mupepe ye tubaka kwa mbu: Bika, vanda napi. Ye mupepe bikaka, sika yina vandaka napi mingi.

⁴⁰ Yandi tubaka kwa bau: Sambu na nki beno ikele na boma mpilayai ? Beno ikele na lukwikilu ve ?

⁴¹ Bau vandaka na boma mingi, bau tubanaka: Buna yandi yai ikele nani, mupepe ye mbu ikele kulemvuka yandi ?