Malako 3 - Le Nouveau Testament en Kikwango 1950

Yesu belula muntu ya diboko ya yuma

¹ Yandi kotaka diaka mu nzo ya sambilu ye muntu vandaka kuna na diboko ya yuma. Mat. 12:9; Luk. 6:6

² Bau langidilaka yandi, kana yandi tabelula yandi mu kilumbu ya luvundu, na bau lenda kufunda yandi.

³ Yandi tubaka kwa muntu ya vandaka na diboko ya yuma: Telema kuna nakati!

⁴ Ye yandi tubaka kwa bau: Nsiku pesa nzila kusala mambu mbote kilumbu ya luvundu keti kusala mambu mbi ? Kuvulusa moyo keti kufwa yo ? Kansi bau vandaka napi.

⁵ Bu yandi talaka bau na makasi, yandi vandaka na ntantu sambu na ngolo ya ntima ya bau, yandi tubaka kwa muntu yina: Lambula diboko, ye yandi lambulaka yo, ye diboko ya yandi belukaka.

⁶ Bafalisi basikaka nswalu ye kanaka na bantu ya Elode sambu na yandi, mpila nki bau lenda kufwa yandi.

Yesu belula bantu mingi

⁷ Kansi Yesu vutukaka sikamosi na banlonguki ya yandi ku mbu, ye kibuka ya nene ya katukaka na Ngalili ye Yuda landaka yandi. Luk. 6:17

⁸ Tuka na Yelusalemi ye Idumaya ye simu ya Yodani ye ndambu ya Tilo ye Sidoni, kibuka ya nene kwizaka kwa yandi, bu bau kuwaka mambu ya nene ya yandi salaka. Mat. 4:25

⁹ Yandi tubaka kwa banlonguki ya yandi, bota fioti fwiti kuvingila yandi na kibuka tafietikisa yandi ve.

¹⁰ Kadi yandi belulaka bantu mingi, ye bau fietikisaka yandi, sambu na kuvalakana yandi, bayina ya vandaka na maladi.

¹¹ Bu bampeve ya sumuka kumonaka yandi, bau fukamaka kwa yandi, ye bokaka, kutuba: Nge ikele Mwana ya Nzambi.

¹² Yandi sikidikisaka bau ngolo, bau tazaikisa yandi ve. Mal. 1:25

Fidisa ya balongi kumi ye zole

¹³ Yandi tombokaka ku mongo, ye bingaka bau ya yandi zolaka; bau kwendaka kwa yandi. Mat. 10:2; Luk. 6:12

¹⁴ Yandi solaka kumi ye zole, sambu na kuvanda na yandi, sambu na kufidisa bau kwenda kusamuna

¹⁵ ye kuvanda na ngolo kubasisa bampeve ya mbi.

¹⁶ Yandi solaka kumi ye zole: Simoni ya yandi pesaka nkumbu Petelo;

¹⁷ ye Yakobi mwana ya Zebedai, ye Yoane mpangi ya Yakobi, ya yandi pesaka nkumbu Boanenges, yo ikele bana ya mbandanu;

¹⁸ Andele ye Filipo ye Batalomai ye Matai ye Toma ye Yakobi mwana ya Alafai ye Tadai ye Simoni mwisi Kana,

¹⁹ ye Yuda Iskalioti, ya yekulaka Yesu mpe.

Masumu kwa Mpeve Yanlongo

²⁰ Yandi kotaka mu nzo; kibuka kutakanaka diaka, sambu na yai bau lendaka ve kudia mampa. Mat. 12:22; Luk. 11:17; 12:10

²¹ Bu banduku ya yandi kuwaka yo, bau kwendaka ye simbaka yandi, kadi bau tubaka: Yandi imene kulauka.

²² Bansoniki ya kulumukaka tuka Yelusalemi tubaka: Yandi ikele na Belesbuli, ye na nkuluntu ya bampeve mbi, yandi ikele kubasisa bampeve mbi. Mat. 9:34

²³ Yandi bingaka bau kwa yandi, ye tubaka kwa bau mu bingana: Mpila nki Satana lenda kubasisa Satana ?

²⁴ Kana kimfumu kabana, kimfumu yina lenda kuvanda ve.

²⁵ Kana nzo kabana, nzo yina lenda kuvanda ve.

²⁶ Kana Satana dinwanisaka yandi kibeni, yandi ikele kudikaba, yandi lenda ve kutelema, mambu ya yandi tamana.

²⁷ Muntu lenda ve kukota mu nzo ya muntu ya ngolo sambu na kubotula bima ya yandi, bu yandi kanga ntete ve muntu ya ngolo; buna yandi tabotula bima ya nzo ya yandi.

²⁸ Kieleka, mono tuba kwa beno: Masumu yonso tavidiswa kwa bana ya bantu, ye kutuba mbi yonso konso ya bau tatuba mbi. Luk. 12:10; Eb. 6:4, 5; 1 Yoa. 5:16

²⁹ Kansi konsonani ya tatuba mbi sambu na Mpeve Yanlongo yandi tabaka ve mvidisilu ya masumu mvu ya mvu, kansi yandi imene kubaka nkanu ya masumu ya mvu ya mvu.

³⁰ Sambu na bau tubaka: Yandi ikele na mpeve ya sumuka.

Ngudi ya Yesu ye bampangi ya yandi

³¹ Ngudi ya yandi ye bampangi ya yandi kwizaka; bu bau telemaka nanganda, bau fidisaka kwa yandi, kubinga yandi. Mat. 12:46; Luk. 8:19

³² Kibuka ya vandaka na yandi ye zungaka yandi, tubaka kwa yandi: Tala, nanganda ngudi ya nge ye bampangi ya nge sosa nge.

³³ Yandi vutulaka kwa bau, ye tubaka: Nani ikele ngudi ya mono ye bampangi ya mono ?

³⁴ Bu yandi talaka bau ya vandaka ye zungaka yandi, yandi tubaka: Tala, ngudi ya mono ye bampangi ya mono!

³⁵ Kadi konsonani ya sala luzolo ya Nzambi, yandi ikele mpangi bakala ya mono ye mpangi nkento ya mono ye ngudi ya mono.