Malako 2 - Le Nouveau Testament en Kikwango 1950

Yesu belula nkwa mianzi

¹ Yandi kotaka diaka mu Kapenaumi nanima bilumbu ndambu, bantu kuwaka yandi ikele mu nzo. Mat. 9:1; Luk. 5:17

² Bantu mingi kutakanaka na sika nanganda ya mwelo, sika lungaka ve sambu na bau yonso. Yandi samunaka mambu ya Nzambi kwa bau.

³ Bau kwizaka kutwala kwa yandi nkwa mianzi, ya natwaka na bantu iya.

⁴ Bu bau lendaka ve kutwala yandi kwa Yesu sambu na kibuka, bau kangulaka nludi ya nzo sika yandi vandaka, bu bau imene kusala dibulu, bau kulumunaka mbeto, va yo lalaka nkwa mianzi.

⁵ Bu Yesu monaka lukwikilu ya bau, yandi tubaka kwa nkwa mianzi: Mwana, masumu ya nge imene kuvidiswa.

⁶ Bansoniki yankaka vandaka muna, bau banzaka mu ntima ya bau:

⁷ Sambu na nki muntu yai tuba mpilayai ? Yandi ikele kutuba mbi. Nani lenda kuvidisa masumu, kansi Nzambi kaka ? Yes. 43:25

⁸ Nswalu bu Yesu zabaka mu mpeve ya yandi, bau vandaka kubanza mambu yina mu ntima ya bau, yandi tubaka kwa bau: Sambu na nki beno ikele kubanza mambu yai mu ntima ya beno ?

⁹ Nki ikele mpasi ve kutuba kwa nkwa mianzi: Masumu ya nge vidiswa, keti kutuba: Telema, baka mbeto ya nge, kwenda ?

¹⁰ Kansi na beno lenda kuzaba, Mwana ya muntu ikele na ngolo awa va ntoto kuvidisa masumu, —yandi tuba kwa nkwa mianzi:

¹¹ Mono tuba kwa nge: Telema, baka mbeto ya nge, kwenda ku nzo ya nge.

¹² Yandi telemaka nswalu, ye bakaka mbeto ya yandi, ye basikaka nantwala na bau yonso; sambu na yai, bantu yonso yitukaka, bau kembilaka Nzambi, kutuba: Beto imene kumona mambu mpilayai ntete ve.

Yesu binga Matai

¹³ Yandi kwendaka diaka ku mukidi ya mbu, ye kibuka yonso kwizaka kwa yandi, yandi longaka bau. Mat. 9:9; Luk. 5:27

¹⁴ Bu yandi lutaka, yandi monaka Levi, mwana ya Alafai, yandi vandaka na sika ya futisa mpaku, ye tubaka kwa yandi: Landa mono, ye yandi telemaka ye landaka yandi.

¹⁵ Yo vandaka, bu yandi vandaka na meza mu nzo ya yandi, bafutisi mingi ye bankwa masumu vandaka na meza sikamosi na Yesu ye banlonguki ya yandi; kadi bau vandaka mingi, ye bau landaka yandi.

¹⁶ Bansoniki ye bafalisi, bu bau monaka yandi ikele kudia sikamosi na bafutisi ye bankwa masumu, bau tubaka kwa banlonguki ya yandi: Mpila nki yandi ikele kudia ye kunwa na bafutisi ye bankwa masumu ?

¹⁷ Bu Yesu kuwaka mambu yai, yandi tubaka kwa bau: Bau ya ikele na ngolo ikele na nsatu ve ya munganga, kansi bau ya ikele na maladi. Mono kwizaka ve kubinga balunungu, kansi bankwa masumu. 1 Tim. 1:15

Yesu longa bau mutindu ya kubuya media

¹⁸ Banlonguki ya Yoane ye ya bafalisi vandaka kubuya madia. Bau kwizaka ye tubaka kwa yandi: Sambu na nki banlonguki ya Yoane ye banlonguki ya bafalisi ikele kubuya madia, kansi banlonguki ya nge ikele kubuya madia ve ? Mat. 9:14; Luk. 5:33

¹⁹ Yesu tubaka kwa bau: Banduku ya toko ya makwela lenda kubuya madia bu toko ya makwela ikele na bau ? Bilumbu ya bau ikele na toko ya makwela bau lenda ve kubuya madia.

²⁰ Kansi bilumbu ikele kwiza bu toko ya makwela takatulwa na bau, nanima bau tabuya madia mu bilumbu yina.

Kingana ya kazaku ye makuba

²¹ Muntu ikele kutula ve kitini ya lele yampa va mvwatu ya nkulu; kana mpilayai kitini yampa ya tonda kukanga dibulu tapasula nlele ya nkulu ye dibulu taluta nene.

²² Muntu ikele kutula ve, vinia yampa mu makuba ya nkulu ya nkanda ya mbizi; kana mpilayai vinia yampa tapasula makuba, ye vinia ye makuba tavila, kansi bau tula vinia yampa mu makuba yampa,

Yesu ikele mfumu ya kilumbu ya luvundu

²³ Yo vandaka, yandi lutaka mu bilanga ya nkeni ya ble mu kilumbu ya luvundu; bu bau lutaka, banlonguki ya yandi yantikaka kubaka nkeni ya ble. Mat. 12:1; Luk. 6:1

²⁴ Bafalisi tubaka kwa yandi: Tala, sambu na nki bau ikele kusala na kilumbu ya luvundu ya nsiku pesa nzila ve ?

²⁵ Yandi tubaka kwa bau: Beno imene kutanga ve ta mbala mosi, mambu ya Davidi salaka bu yandi kondaka kima, ye yandi vandaka na nzala, yandi ye bau ya vandaka na yandi ? 1 Sam. 21:6

²⁶ Mpila nki yandi kotaka mu nzo ya Nzambi mu bilumbu ya Abiatali nganga ya nene, ye yandi kudiaka mampa ya kutala, ya nsiku pesa nzila ve muntu kudia, kansi banganga kaka, ye yandi pesaka kwa bau ya vandaka na yandi mpe. 2 Mose 29:32

²⁷ Yandi tubaka kwa bau: Kilumbu ya luvundu salwaka ve sambu na muntu, kansi muntu salwaka sambu na kilumbu ya luvundu ve.

²⁸ Mpilayai Mwana ya muntu ikele Mfumu ya kilumbu ya luvundu mpe.