Malako 15 - Le Nouveau Testament en Kikwango 1950

Yesu funduswa kwa Pilatu

¹ Na suka yonso bambuta banganga ye bambuta ya bantu ye bansoniki ye bamfundisi yonso tubanaka mu kinsweki, ye kangaka Yesu ye nataka yandi ye yekulaka yandi kwa Pilatu. Mat. 27:1, 11; Luk. 23:1; Yoa. 18:28

² Pilatu yuvulaka yandi: Nge ikele Ntinu ya baYuda ? Yandi vutulaka ye tubaka kwa yandi: Nge imene kutuba yo.

³ Bambuta banganga fundaka yandi na mambu mingi.

⁴ Pilatu yuvulaka yandi diaka kutuba: Nge vutula ndinga ve ? Tala, mambu mingi ya bau funda nge.

⁵ Kansi Yesu vutulaka ndinga ta fioti ve, sambu na yai Pilatu yitukaka mingi.

⁶ Mu bilumbu ya fete yandi vandaka na kifu ya bikila bau muntu mosi ya boloko, konsonani ya bau lombaka. Mat. 27:16; Luk. 23:18; Yoa. 18:39

⁷ Kuna vandaka muntu ya bingwaka Balaba, bau kangaka yandi sikamosi na batomboki, mu tomboka ya bau, bau kufwaka bantu.

⁸ Kibuka kwendaka, ye yantikaka kulomba yandi kusadila bau bonso yandi sadilaka bau ntete.

⁹ Kansi Pilatu vutulaka kutuba kwa bau: Beno zola mono kubikila beno Ntinu ya baYuda ?

¹⁰ Kadi yandi zabaka bambuta banganga yekulaka yandi sambu na kimpala.

¹¹ Kansi bambuta banganga tubaka kwa kibuka, kulomba yandi kubikila bau Balaba. Bis. 13:14

¹² Pilatu vutulaka ye tubaka kwa bau: Buna mono tasala nki kwa yandi ya beno binga Ntinu ya baYuda ?

¹³ Bau bokaka diaka: Koma yandi va kulunsi!

¹⁴ Buna Pilatu tubaka kwa bau: Nki mbi ya yandi salaka ? Kansi bau bokaka ngolo ya luta: Koma yandi va kulunsi!

¹⁵ Pilatu zolaka kusala bonso kibuka zolaka, yandi bikilaka bau Balaba, ye yekulaka Yesu kukomwa va kulunsi, bu yandi imene kubula yandi. Yoa. 19:1

Bau sadila Yesu mbi

¹⁶ Basoldat twalaka yandi mu kianzala ya nzo ya ntinu, bau kutikisaka kibuka yamvimba ya basoldat. Mat. 27:27; Luk. 23:26; Yoa. 19:16

¹⁷ Bau vwatisaka yandi kazaku ya mpumbu, bau salaka mpu ya nsende, ye tulaka yo va ntu ya yandi. Yoa. 19:2

¹⁸ Bau yantikaka kupesa yandi mbote: Vanda na kiese, ntinu ya baYuda!

¹⁹ Bau bulaka yandi tutu va ntu, bau losilaka yandi mate, ye fukamaka ye sambilaka yandi. Yes. 50:6

²⁰ Bu bau imene kuseka yandi, bau katulaka kazaku ya mpumbu, ye vwatisaka yandi mvwatu ya yandi. Bau basisaka yandi, kukoma yandi va kulunsi.

Bau koma yandi va kulunsi

²¹ Muntu mosi lutaka mu nzila, Simoni muKilene, yandi katukaka na nseke, tata ya Alesandelo ye Lufu. Bau simbaka yandi kunatila yandi kulunsi.

²² Bau kwendaka na sika ya Ngolongota, tendula ya yo ikele: Sika ya mukuwa ya ntu.

²³ Bau pesaka yandi vinia sikamosi na mile, kansi yandi bakaka yo ve. Mat. 27:34; Luk. 23:33; Yoa. 19:18

²⁴ Bau komaka yandi va kulunsi, bau kabanaka mvwatu ya yandi, ye bulaka njeke sambu na yau, na muntu na muntu lenda kubaka ya yandi. Nk. 22:18

²⁵ Yo vandaka lokula uvwa ya bau komaka yandi va kulunsi.

²⁶ Nsonokono ya kufunda yandi, sonukwaka va zulu: NTINU YA BAYUDA.

²⁷ Sikamosi na yandi bau komaka bantani zole va kulunsi, mosi na diboko kibakala ya yandi, ye mosi na diboko kinkento ya yandi. Yes. 53:12; Mat. 27:38; Luk. 23:33; Yoa. 19:18

²⁸ Yai manisaka masonukwa ya tubaka: Bau tangaka yandi sikamosi na bankwa mbi.

²⁹ Bantu ya lutaka na nzila tubaka mbi sambu na yandi, bau nikisaka ntu ya bau, kutuba: Sia! Nge ya pasula tempelo ye tunga yo diaka mu bilumbu tatu, Mal. 14:58; Yoa. 2:19; Mat. 27:39; Luk. 23:35, 39

³⁰ divulusa ye kulumuka tuka kulunsi.

³¹ Bonso mpe bambuta banganga sakanaka yandi, bau ye bansoniki, ye tubaka: Yandi vulusaka bankaka, kansi yandi lenda kudi vulusa ve.

³² Bika Klisto Ntinu ya baIsaeli kulumuka ntangu yai tuka kulunsi, na beto lenda kumona ye kukwikila. Ye bau ya komwaka na yandi va bakulunsi fingaka yandi mpe.

Lufwa ya Yesu

³³ Bu lokula kumi ye zole lungaka, tombe kubwaka va ntoto yonso ti lokula tatu. Mat. 27:45; Luk. 23:44; Yoa. 19:28

³⁴ Mu lokula tatu Yesu bokaka mu ndinga ya nene: Eloi, Eloi, lama sabakatani ? Tendula ya yo ikele: Nzambi ya mono; Nzambi ya mono, sambu na nki nge imene kubika mono ? Nk. 22:1

³⁵ Bankaka ya telemaka sika yina, bu bau kuwaka yo, tubaka: Tala, yandi ikele kubinga Elia.

³⁶ Ye mosi kwendaka ntinu, ye fulusaka eponge na vinia ya ndudi, ye tulaka yo va tutu, ye pesaka yandi kunwa, kutuba: Bika beto mona kana Elia takwiza kukatula yandi.

³⁷ Yesu bokaka mu ndinga ya nene, ye pesaka mpeve ya yandi.

³⁸ Buna ngumbu ya tempelo pasukaka ndambu zole tuka zulu ti nansi. 2 Mose 26:31; Mat. 27:51; Luk. 23:45, 47

³⁹ Bu nkuluntu ya soldat ya telemaka sika yina nantwala ya yandi; monaka, na yandi pesaka mpeve ya yandi, yandi tubaka: Kieleka muntu yai ikele Mwana ya Nzambi.

⁴⁰ Kuna vandaka mpe bankento ya talaka ntama. Nakati ya bau vandaka Malia mwisi Mangadala, ye Malia, ngudi ya Yakobi ya fioti ye Yose, ye Salome. Mat. 27:55; Luk. 23:48

⁴¹ Bu yandi vandaka mu Ngalili, bau landaka yandi ye sadilaka yandi; bankento mingi yankaka mpe tombokaka na yandi ku Yelusale Luk. 8:2

Bau kuzika yandi

⁴² Bu nkokila kubwaka, sambu na yo vandaka kilumbu ya yidika, ikele kilumbu ya ntete ya luvundu. Mat. 27:57; Luk. 23:50; Yoa. 19:38

⁴³ Yosefi, mwisi Alimataya, yandi ikele mfundisi ya luzitu, yandi kibeni mpe vingilaka kimfumu ya Nzambi, yandi kwendaka na kikesa kwa Pilatu, ye lombaka nitu ya Yesu.

⁴⁴ Kansi Pilatu yitukaka, kana yandi imene kufwaka. Yandi bingaka nkuluntu ya basoldat, yandi yuvulaka yandi, kana yandi imene kufwa ntama.

⁴⁵ Bu yandi zabaka yo na nkuluntu ya basoldat, yandi pesaka mvumbi kwa Yosefi.

⁴⁶ Yandi sumbaka lele ya lino, ye yandi kulumunaka yandi, ye zingila yandi na lele ya lino, ye tula yandi mu ndiamu ya timwaka mu ditadi, ye nengumuna ditadi va mwelo ya ndiamu.

⁴⁷ Kansi Malia, mwisi Mangadala, ye Malia ngudi ya Yose, talaka sika bau tulaka yandi.