Malako 14 - Le Nouveau Testament en Kikwango 1950

Bau sosa kukanga ye!

¹ Nanima na bilumbu zole, vandaka fete ya mampa ya konda lufunusu. Bambuta banganga ye bansoniki sosaka mpila nki bau lenda kusimba yandi mu kinsweki ye kufwa yandi. 2 Mose 12:15; Mat. 26:1; Luk. 22:1

² Kadi bau tubaka: Mu bilumbu ya fete ve, sambu na makelele tavanda nakati na bantu.

Nkento tula mafuta ya mananasi va ntu ya Yesu

³ Bu yandi vandaka mu Betania mu nzo ya Simoni, nkwa bwazi, bu yandi vandaka na meza, nkento kwizaka, ya vandaka na mulangi ya mafuta ya nsunga ya ntalu mingi, yo ikele mafuta ya nardi. Nkento pasulaka mulangi ye tiamunaka yo va ntu ya yandi. Yoa. 12:3; Mat. 26:6; Yoa. 12:1

⁴ Bankaka vandaka kuna, bau vandaka na makasi mu ntima, kutuba: Sambu na nki mafuta ya nsunga biviswa mpilayai ?

⁵ Kadi mafuta ya nsunga yai lenda tekwa na mbongo denali nkama tatu ye peswa kwa bansukami. Bau vandaka na makasi kwa yandi.

⁶ Yesu tubaka: Bika yandi, sambu na nki beno monisa yandi mpasi ? Yandi imene kusadila mono kisalu ya mbote.

⁷ Kadi bansukami ikele na beno ntangu yonso, ye konso ntangu na beno zola, beno lenda kusadila bau mambu mbote, kansi mono ikele na beno ntangu yonso ve.

⁸ Yandi salaka yonso ya yandi lenda kusala, yandi sitaka nitu ya mono ntete sambu na kuzika ya mono.

⁹ Kieleka, mono tuba kwa beno: Konsosika ya nsamu yai ya mbote tasamunwa mu nsi yamvimba, yai ya yandi salaka, tatubwa kubambuka yandi.

Yuda Iskalioti yekula Yesu kwa bafalisi

¹⁰ Yuda Iskalioti, mosi ya bau kumi ye zole, kwendaka kwa bambuta banganga na yandi lenda kuyekula yandi kwa bau. Mat. 26:14; Luk. 22:3

¹¹ Bu bau kuwaka mambu yai, bau yangalalaka ye silaka kupesa yandi mbongo. Yandi sosaka ntangu ya lunga kuyekula yandi.

Yesu kudia fete ya Pake sikamosi na banlonguki ya yandi

¹² Mu kilumbu ya ntete ya fete ya mampa ya konda lufunusu, bu bau kufwaka dimeme ya Pake, banlonguki ya yandi tubaka kwa yandi: Nge zola beto kwenda wapi kuyidika sika na nge lenda kudia Pake ? 2 Mose 12:17; Mat. 26:17; Luk. 22:7

¹³ Yandi fidisaka banlonguki zole ya yandi, ye tubaka kwa bau: Kota mu mbanza, muntu ya nata dibungu ya masa takutana na beno, landa yandi.

¹⁴ Konsosika ya yandi takota, beno tuba kwa mfumu ya nzo: Nlongi tubaka: Wapi nzo ya banzenza, sika ya mono fwiti kudia Pake na banlonguki ya mono ?

¹⁵ Yandi tasonga beno nzo ya nene ya zulu, ya yidikwa ye ya lunga, kuna beno yidikila beto sika.

¹⁶ Banlonguki ya yandi basikaka ye kotaka mu mbanza, bau monaka bonso yandi tubaka kwa bau, bau yidikaka Pake.

¹⁷ Bu nkokila kubwaka, yandi kumaka na bau kumi ye zole. Mat. 26:20; Luk. 22:14, 21; Yoa. 13:21

¹⁸ Bu bau vandaka na meza, ye ikele kudia, Yesu tubaka: Kieleka, mono tuba kwa beno: Mosi ya beno tayekula mono, ikele yandi ya kudia na mono. Nk. 41:10

¹⁹ Bau yantikaka kuvanda na ntantu, ye tubaka kwa yandi mosi mosi: Yo ikele mono ?

²⁰ Yandi tubaka kwa bau: Ikele mosi ya beno kumi ye zole, ikele yandi ya tula diboko sikamosi na mono mu dilonga.

²¹ Kadi Mwana ya muntu takwenda bonso yo ikele kusonama sambu na yandi, kansi ndola kwa muntu yina ya yekula Mwana ya muntu. Yo ikele mbote kwa muntu yina, kana yandi butwa ve.

²² Bu bau vandaka kudia, yandi bakaka dimpa, bu yandi sakumunaka, yandi bukunaka yo ye pesaka kwa bau, ye tubaka: Beno baka, yai ikele nitu ya mono. Mat. 26:26; Luk. 22:19; 1 Kol. 11:23

²³ Ye yandi bakaka kopo, bu yandi imene kupesa matondo, yandi pesaka yo kwa bau, ye bau yonso kunwaka yo.

²⁴ Yandi tubaka kwa bau: Yai ikele menga ya mono ya luwawanu yampa, ya tiamuka sambu na mingi.

²⁵ Kieleka, mono tuba kwa beno: Mono takunwa diaka ve masa ya mabundu ya nti ya vinia, ti kilumbu yina bu mono kunwa yo yampa mu kimfumu ya Nzambi.

Yesu kwenda ku mongo ya Olive

²⁶ Bu bau imene kuyimba nkunga, bau kwendaka ku mongo ya Olive. Mat. 26:30; Luk. 22:39

²⁷ Yesu tubaka kwa bau: Beno yonso tatesa sakuba, kadi yo ikele kusonama: Mono tabula mvungi, ve mameme tamwangana ndambu na ndambu. Zak. 13:7; Yoa. 16:32

²⁸ Kansi bu mono imene kufulukiswa, mono takwenda nantwala na beno ku Ngalili. Mal. 16:7

²⁹ Kansi Petelo tubaka kwa yandi: Kana bau yonso tesa sakuba, kansi mono ve.

³⁰ Yesu tubaka kwa yandi: Kieleka mono tuba kwa nge: Bubu yai mu mpimpa yai ntete na nsusu dila mbala zole, nge tabuya mono mbala tatu. Luk. 22:34; Yoa. 13:38

³¹ Buna yandi tubaka na ngolo: Kana mono takufwa na nge, mono tabuya nge ta fioti ve. Bau yonso tubaka mpilayai mpe. Luk. 22:33

Yesu mu Getesemane

³² Bau kumaka na sika ya nkumbu ya yo ikele Ngetesemane, yandi tubaka kwa banlonguki ya yandi: Vanda awa bu mono ikele kulomba. Yoa. 18:1; Mat. 26:36; Luk. 22:40

³³ Yandi twalaka Petelo ye Yakobi ye Yoane, ye yantikaka kuyituka mingi ye vandaka na kizitu mu ntima.

³⁴ Yandi tubaka kwa bau: Mwela ya mono ikele kufuluka na ntantu ti lufwa, beno vingila awa, ye tomatala. Yoa. 12:27

³⁵ Yandi kwendaka nantwala fioti ye fukamaka va ntoto, ye lombaka, kana yo lenda, lokula yina taluta yandi.

³⁶ Yandi tubaka: Aba Tata; Mambu yonso lenda kwa nge, katula kopo yai na mono, kansi bonso mono zola ve, kansi bonso nge zola. Yoa. 6:38; Eb. 5:7

³⁷ Yandi kwizaka ye monaka bau kulala tulu, yandi tubaka kwa Petelo: Simoni, nge ikele kulala ? Nge lenda kutomatala lokula mosi ve ?

³⁸ Tomatala ye lomba, na beno takota mu mpukumunu ve. Mpeve ikele kuzola, kansi nsuni ikele lebakana. 1 Pet. 5:8; Ngal. 5:17

³⁹ Yandi kwendaka diaka ye lombaka kutuba mambu mutindu mosi.

⁴⁰ Bu yandi vutukaka, yandi monaka bau diaka kulala tulu, kadi meso ya bau vandaka kizitu, bau zabaka ve mambu kuvutula kwa yandi

⁴¹ Yandi vutukaka mbala ya tatu, ye tubaka kwa bau: Lala ntangu yai, vundisa, yo imene kulunga, lokula imene kwiza. Tala, Mwana ya muntu imene kuyekulwa mu maboko ya bankwa masumu.

⁴² Telema, bika beto kwenda, tala, yandi ya yekula mono ikele mfinama. Mat. 26:47; Luk. 22:47; Yoa. 18:2

Bau simba Yesu

⁴³ Nswalu, bu yandi ikele kutuba, Yuda Iskalioti, mosi ya bau kumi ye zole, kwizaka, kibuka kwizaka sikamosi na yandi, na bambele ya mvita ye bankawa, bau katukaka na bambuta banganga ye bansoniki ye bambuta ya bantu. Mat. 26:47; Luk. 22:47; Yoa. 18:2

⁴⁴ Yandi ya yekulaka yandi, imene kupesa bau kidimbu kutuba: Konsonani ya mono tafiba, yo ikele yandi, simba yandi ye kwenda na yandi mbote.

⁴⁵ Bu bau kumaka, yandi kwendaka nswalu kwa yandi, ye tubaka: Nlongi, ye fibaka yandi.

⁴⁶ Bau tudilaka yandi maboko ye simbaka yandi.

⁴⁷ Mosi ya bau ya telemaka kuna bakaka mbele ya yandi ye bulaka mpika ya nganga yanene ye zengaka dikutu ya yandi.

⁴⁸ Yesu vutulaka kwa bau: Beno imene kwiza bonso kwa ntani na bambele ya mvita ye bankawa sambu na kusimba mono.

⁴⁹ Mono vandaka na beno mu tempelo kilumbu ye kilumbu ye longaka, ye beno simbaka mono ve. Kansi na masonukwa fwiti kumaniswa yai imene kusalwa.

⁵⁰ Buna bau yonso bikaka yandi ye tinaka.

⁵¹ Toko mosi landaka yandi ya vandaka na lele ya lino kufuka nitu ya yandi, ye bau simbaka yandi.

⁵² Kansi yandi bikaka lele ya lino ye yandi tinaka kinkonga.

Bau twala Yesu kwa nganga yanene

⁵³ Bau twalaka Yesu kwa nganga yanene, ye bambuta banganga yonso ye bambuta ya bantu ye bansoniki kutanaka sikamosi na yandi. Mat. 26:57; Luk. 22:45; Yoa. 18:12

⁵⁴ Petelo landaka ntama ti na kianzala ya nganga yanene, yandi vandaka sikamosi na bapolisi, yandi yotilaka mwini ya tiya.

⁵⁵ Bambuta banganga ye bamfundisi yonso sosaka kitemo sambu na Yesu sambu na kufwa yandi, kansi bau monaka yo ve. Mat. 26:59; Luk. 22:63; Yoa. 18:19

⁵⁶ Kadi mingi tubaka kitemo ya luvunu sambu na yandi, kansi kitemo ya bau vandaka mutindu mosi ve.

⁵⁷ Bankaka telemaka ye tubaka kitemo ya luvunu sambu na yandi, kutuba:

⁵⁸ Beto kuwaka yandi tubaka: Mono takufwa tempelo yai ya salwaka na maboko ye mu bilumbu tatu mono tatunga yankaka ya salwaka na maboko ve. Mal. 15:29; Yoa. 2:19

⁵⁹ Mu mambu yai mpe, kitemo ya bau vandaka mutindu mosi ve.

⁶⁰ Buna nganga yanene telemaka nakati na bau, yandi yuvulaka Yesu, kutuba: Nge vutula ndinga ve ? Nki kitemo ya bau ikele kutuba sambu na nge ?

⁶¹ Kansi yandi vandaka napi ye vutulaka ndinga ve. Nganga yanene yuvulaka yandi diaka ye tubaka kwa yandi: Nge ikele Klisto, Mwana ya Nkwa lusakumunu ?

⁶² Yesu tubaka: Mono ikele yandi, ye beno tamona Mwana ya muntu kuvanda na diboko kibalaka ya Ngolo ye kwiza mu matuti ya zulu. Nk. 110:1

⁶³ Buna nganga yanene pasulaka mvwatu ya yandi, ye tubaka: Nki beto sosa bantemo yankaka ?

⁶⁴ Beno imene kuwa kutuba ya mbi ya yandi. Nki beno banza ? Bau yonso bedisaka yandi sambu na kufwa.

⁶⁵ Bankaka yantikaka kulosa yandi mate, ye kanga lele va luse ya yandi, ye bulaka yandi makofi ye tubaka kwa yandi: Bikula! Bapolise bakaka yandi ye bulaka yandi bambata. Yes. 50:6

Petelo buyaka Yesu

⁶⁶ Bu Petelo vandaka mu kianzala; sielo nkento mosi ya nganga yanene kwizaka kuna. Mat. 26:69; Luk. 22:54; Yoa. 18:16

⁶⁷ Bu yandi monaka Petelo yotila tiya, yandi talaka yandi ye tubaka: Nge mpe vandaka na Yesu mwisi Nazaleti.

⁶⁸ Kansi yandi buyaka kutuba: Mono zaba ve, ye mono bakisa ve mambu ya nge ikele kutuba. Yandi basikaka nanganda ya kianzala, ye nsusu dilaka.

⁶⁹ Sielo nkento monaka yandi, ye yantikaka diaka kutuba kwa bau ya telemaka na sika yina: Yai ikele mosi ya bau.

⁷⁰ Kansi yand buyaka diaka, Nanima ntangu ndambu bau ya telemaka na sika yina tubaka diaka kwa Petelo: Kieleka, nge ikele mosi ya bau, kadi nge ikele mwisi Ngalili mpe.

⁷¹ Yandi yantikaka kudi tula ndola ye kudia ndefi: Mono zaba muntu yai ve ya beno ikele kutuba.

⁷² Nswalu nsusu dilaka mbala ya zole. Petelo bambukaka mambu ya Yesu tubaka kwa yandi: Ntete na nsusu dila mbala zole, nge tabu ya mono mbala tatu. Bu yandi banzaka sambu na yo, yandi dilaka.