Malako 13 - Le Nouveau Testament en Kikwango 1950

Yesu songa kubwa ya Yelusalemi ye mpasi ya takwiza

¹ Bu yandi basikaka mu tempelo, nlonguki mosi ya yandi tubaka kwa yandi: Nlongi, tala mutindu ya matadi ye mutindu ya bantungulu, Mat. 24:1; Luk. 21:5

² Yesu tubaka kwa yandi: Nge tala bantungulu yai ya nene ? Ditadi mosi tabika va ditadi yankaka ve, yau yonso takubwa. 1 Nt. 9:7; Mika 3:12

³ Bu yandi vandaka va mongo ya Olive nantwala ya tempelo. Petelo ye Yakobi ye Yoane ye Andele yuvulaka yandi mu kinsweki:

⁴ Tuba kwa beto, nki ntangu mambu yai takwiza ye nki tavanda kidimbu ya mambu yonso ikele mfinama kumanisa.

⁵ Yesu yantikaka kutuba kwa bau: Beno tomatala na muntu kusa beno ve. Ef. 6:6; Kolo. 2:8; 2 Tes. 2:3

⁶ Mingi takwiza mu nkumbu ya mono, kutuba: Mono ikele yandi, bau takusa mingi.

⁷ Bu beno kuwa bamvita ye nsangu ya bamvita kutita ve, mambu yina fwiti kwiza kansi nsuka ikele ntangu yai ve.

⁸ Kadi makanda ya bantu tanwana na makanda ya bantu, ye kimfumu tanwana na kimfumu, kunikuna ya ntoto tavanda mu sika yankaka, ye malema tavanda. Mambu yina ikele luyantiku ya nsongo.

⁹ Kansi beno kibeni tomatala. Bau tayekula beno kwa bamfundisi, mu nzo ya sambilu bau tabula beno, Beno tatelema nantwala ya banyadi ye bantinu sambu na mono, sambu na kitemo kwa bau. Yoa. 15:19; 16:2; Nzai. 2:10

¹⁰ Kansi nsamu mbote fwiti kusamunwa ntete kwa makanda yonso ya bantu.

¹¹ Kansi bu bau nata beno ye yekula beno, vanda na mabanza ve nki beno tatuba, kansi konsonki ya tapeswa kwa beno mu lokula yina, beno tuba yau, kadi ikele beno ve ya ikele kutuba, kansi Mpeve Yanlongo. Mat. 10:19; Luk. 12:11

¹² Mpangi tayekula mpangi kwa lufwa, ye tata mwana ya yandi, ye bana tatelemina batata ye bangudi kufwisa bau.

¹³ Bantu yonso takuwila beno makasi sambu na nkumbu ya mono, kansi yandi ya vibidila ti na nsuka, yandi tavuluswa. Nzai. 2:7

¹⁴ Kansi bu beno tamona mbungulu ya mbivisu telema na sika ya yau fwiti kuvanda ve—konsomuntu ya tanga yai, bika yandi bakisa—buna bau ya ikele mu Yuda, bika bau tina ku bamongo. Dan. 9:27; 12:11

¹⁵ Yandi ya ikele va nludi, bika yandi kulumuka ve, keti kota kubaka bima mu nzo ya yandi. Luk. 17:31

¹⁶ Yandi ya ikele mu dilanga, bika yandi vutuka ve kubaka kazaku ya yandi.

¹⁷ Kansi mpasi kwa bau ya ikele na mavumu ye kwa bau ya yamwisa bana mu bilumbu yina.

¹⁸ Beno lomba na yo kwiza ve mu nsungi ya madidi.

¹⁹ Kadi mu bilumbu yina tavanda mpasi mingi, ya mpilayai vandaka ntete ve tuka luyantiku ya nsemono ya Nzambi semaka ti ntangu yai, ye yo tavanda diaka ve.

²⁰ Kana Mfumu zenga bilumbu yina nkufi ve, nsuni mosi tavuluswa ve, kansi sambu na basolwa ya yandi solaka, yandi zenga bilumbu yina nkufi.

²¹ Buna kana muntu tuba kwa beno: Tala, Klisto ikele awa, keti tala, kuna, kwikila yandi ve. Luk. 17:23; 21:8; 2 Tes. 2:11

²² Kadi baklisto ya luvunu ye bambikudi ya luvunu tatelema ye songa bidimbu ye nyitukulu, kukusa basolwa kana yo lenda.

²³ Beno tomatala. Tala, mono imene kutuba mambu yonso kwa beno ntete.

Yesu longaka vutuka ya yandi

²⁴ Mu bilumbu yina nanima na mpasi yina ntangu takwiza ndombe ye ngonda tapesa mwini ya yo ve. Yes. 13:10; Yoeli 2:10; 3:15; Bis. 2:20; Nzai. 6:12; Mat. 24:29; Luk. 21:25

²⁵ Bambwetete takubwa tuka zulu ye ngolo ya zulu tanikuka.

²⁶ Buna bau tamona Mwana ya muntu kwiza mu matuti mu ngolo mingi ye nkembo. Dan. 7:10, 13; Mal. 14:62; Bis. 1:11

²⁷ Buna yandi tafidisa banjo kutikisa basolwa tuka ndambu iya ya mupepe, tuka na nsuka ya ntoto ti nsuka ya zulu.

Yesu longa kidimbu ya kwisa ya yandi

²⁸ Beno longuka kingana ya nti ya figi, bu mavala ya yo ikele petepete, ye basisa matiti, buna beno zaba nsungi ya mvula ikele mfinama. Mat. 24:33; Luk. 21:29

²⁹ Mpilayai beno mpe, bu beno mona mambu yai yonso ikele kumaniswa buna beno zaba yo ikele mfinama na kielo.

³⁰ Kieleka mono tuba kwa beno: Mbandu yai tamana ve ti na mambu yai yonso talunga.

³¹ Zulu ye ntoto tamana, kansi mambu ya mono tamana ve. Nk. 102:26; Yes. 40:2; Eb. 1:11

³² Kansi kilumbu yina ye lokula yina muntu mosi zaba ve, banjo ya zulu mpe ve, Mwana mpe ve, kansi Tata kaka. Bis. 1:7; Mat. 24:36

Yesu longa bau na kukenga

³³ Dikeba, tomatala, ye lomba, kadi beno zaba ve bu ntangu yina takwiza. Mat. 24:42; Luk. 12:40; 21:36; 1 Tes. 5:6

³⁴ Yo ikele bonso bu muntu kwenda mu nsi yankaka, yandi bika nzo ya yandi ye pesa ngolo kwa basielo ya yandi, kwa muntu na muntu kisalu ya yandi, ye sikidikisa nkengi ya kielo mpe tomatala.

³⁵ Sambu na yai, tomatala kadi beno zaba ve ntangu ya mfumu ya nzo takwiza, keti nkokila keti kati-kati ya mpimpa keti na nsusu kudila keti na suka-suka;

³⁶ keti yandi takwiza nswalu ye mona beno na tulu.

³⁷ Kansi mambu ya mono tubaka kwa beno, mono tuba kwa bantu yonso: Tomatala.