Malako 12 - Le Nouveau Testament en Kikwango 1950

Yesu tuba kingana ya dilanga ya vinie

¹ Yandi yantikaka kutuba kwa bau mu bingana: Muntu kunaka dilanga ya vinia ye tulaka lupangu nanganda na yo, ye timaka kamunu ya vinia ye tungaka nzo ya yongi, ye tudisaka yo kwa basadi ye kwendaka ku ntoto yankaka. Nk. 80:8; Yes. 5:1; Yel. 5:1; Yoeli 2:21; Mat. 21:33; Luk. 20:9

² Mu nsungi ya lunga, yandi fidisaka sielo kwa basadi sambu na kubaka mabundu ya dilanga ya vinia.

³ Bau simbaka yandi ye bulaka yandi mingi ye sindikaka yandi na maboko mpamba.

⁴ Yandi fidisaka sielo yankaka kwa bau, ye bau lwadisaka yandi na ntu, bau sadilaka yandi nsoni mingi.

⁵ Yandi fidisaka sielo yankaka mpe ye bau kufwaka yandi. Yandi fidisaka bankaka mingi; bau bulaka bankaka ye kufwaka bankaka.

⁶ Mosi bikaka na yandi, mwana ya yandi mosi ya zolwa. Yandi fidisaka yandi nanima kwa bau, kutuba: Bau tapesa mwana ya mono luzitu.

⁷ Kansi basadi yina tubanaka: Yai ikele mvingidi ya difwa, bika beto kufwa yandi ye difwa tavanda ya beto.

⁸ Bau bakaka yandi ye kufwaka yandi ye losaka yandi nanganda ya dilanga ya vinia.

⁹ Sambu na yai mfumu ya dilanga ya vinia tasala nki ? Yandi takwiza kufwa basadi ye pesa dilanga ya vinia kwa bankaka.

¹⁰ Beno tangaka ve masonukwa yai: Ditadi ya batungi buyaka, yo imene kwiza ntu ya fuma; Nk. 118:22; Yes. 8:14; 28:16; Bis. 4:11; Lom. 9:33; Ef. 2:20; 1 Pet. 2:7

¹¹ Mfumu salaka mpilayai, yo ikele mambu ya nyitukulu mu meso ya beto.

¹² Bau sosaka kusimba Yesu, kansi bau titaka kibuka, kadi bau zabaka yandi tubaka kingana yina sambu na bau; buna bau bikaka yandi ye bau kwendaka.

Bafalisi yuvula Yesu sambu na mpaku

¹³ Bau fidisaka kwa Yesu bankaka ya bafalisi ye bantu ya Elode, na bau lenda kubwisa yandi mu ndinga ya yandi. Mat. 22:15; Luk. 20:20

¹⁴ Bu bau kumaka, bau tubaka kwa yandi: Nlongi, beto zaba nge ikele ya kieleka, ye nge ikele kutula bantu yonso kitezo mosi, kadi nge ikele kutala luse ya muntu ve, kansi nge ikele kulonga nzila ya Nzambi mu kieleka: Nsiku pesa nzila kufuta mpaku kwa Kaisali keti ve.

¹⁵ Beto tafuta keti beto tafuta ve ? Bu yandi monaka luvunu ya bau, yandi tubaka kwa bau: Sanibu na nki beno ikele kupukumuna mono ? Twala mbongo denali mosi, na mono lenda kutala yo,

¹⁶ Bau twalaka yo, ye yandi tubaka kwa bau: Yai ikele kifwanusu ya nani ye bisono ya nani ? Bau tubaka kwa yandi: Ya Kaisali.

¹⁷ Yesu vutulaka kwa bau: Futa kwa Kaisali bima ya Kaisali, ye kwa Nzambi bima ya Nzambi. Bau yitukaka mingi sambu na yandi. Lom. 13:7

Basaduki yuvula Yesu sambu na mfulukulu ya bafwa

¹⁸ Basaduki kwizaka kwa yandi, bau ya tuba mfulukulu ya bafwa ikele ve, bau yuvulaka yandi, kutuba: Mat. 22:23; Luk. 20:27

¹⁹ Nlongi, Mose sonikaka kwa beto: Kana mpangi ya muntu imene kufwa, ye bikaka nkento, kansi mwana ve, bu na mpangi fwiti kubaka nkento yina ya mpangi ya yandi bikaka ye kutelemisila mpa, ngi ya yandi nkuna. 5 Mose 25:5

²⁰ Bampangi nsambwadi vandaka, ya ntete bakaka nkento, yandi kufwaka ye bikaka nkuna ve.

²¹ Ya zole bakaka yandi ye kufwaka ye bikaka nkuna ve, ya tatu mpilayai mpe.

²² Bau nsambwadi bakaka yandi ye bikaka nkuna ve; bu na nkento kufwaka mpa.

²³ Mu mfulukulu, nkento tavanda ya nani ya bau, kadi bau nsambwadi vandaka na yandi ?

²⁴ Yesu tubaka kwa bau: Beno vengumuka sambu na mambu yai, sambu na beno zaba ve masonu, kwa keti ngolo ya Nzambi.

²⁵ Kadi bu bantu fulukiswa tuka bafwa; bau takwela ve ye kwedisa ve, kansi bau ikele bonso banjo ya zulu.

²⁶ Kansi sambu na bafwa ya tafulukiswa, beno tangaka ve mu nkanda ya Mose sika na mambu ya nti ya fioti, Nzambi tubaka kwa yandi, kutuba: Mono ikele Nzambi ya Abalahami ye Nzambi ya Isaki ye Nzambi ya Yakobi. Bis. 7:30; Eb. 11:16

²⁷ Yandi ikele Nzambi ya bafwa ve, kansi Nzambi ya bamoyo, beno imene kuvengumuka mingi.

Nsiku Ya luta nene

²⁸ Nsoniki mosi kwizaka ye kuwaka bu bau tulaka ntembe, bu yandi monaka yandi imene kuvutudila bau mbote, yandi yuvulaka yandi: Nki nsikudukusu ya ntete ya yonso ? Mat. 22:34

²⁹ Yesu vutulaka: Ya ntete ikele yai: Kuwa Isaeli, Mfumu Nzambi ya beto ikele Mfumu mosi kaka. 5 Mose 6:4

³⁰ Ye nge fwiti kuzola Mfumu Nzambi ya nge mu ntima ya nge yonso, ye mwela ya nge yonso, ye mabanza ya nge yonso, ye ngolo ya nge yonso.

³¹ Ya zole ikele yai: Nge fwiti kuzola bamfinangani ya nge bonso nge kibeni. Nsikudukusu yankaka ikele ve ya luta yai nene. 3 Mose 19:12; Lom. 13:9; Ngal. 5:14; 1 Tim. 1:5; Yak. 2:8

³² Nsoniki tubaka kwa yandi: Kieleka, Nlongi, nge imene kutuba mbote, yandi ikele mosi, yankaka ikele ve, kansi yandi kaka,

³³ zola yandi na ntima yonso ye mabanza yonso ye ngolo yonso, ye zola bamfinangani ya nge bonso nge kibeni, yai luta nkailu ya yokwa yamvimba ye nkailu ya zikwa. 1 Sam. 16:22; 5 Mose 6:5

³⁴ Bu Yesu monaka yandi imene kuvutula na ngangu, yandi tubaka kwa yandi: Nge ikele ntama ve na kimfumu ya Nzambi. Nanima na yina muntu mosi vandaka na ngolo mu ntima diaka ve kuyuvula yandi mambu.

Yesu longa mu tempelo

³⁵ Bu Yesu vandaka mu tempelo, yandi vutulaka ye tubaka: Mpila nki bansoniki tuba Klisto ikele Mwana ya Davidi ? Mat. 22:41; Luk. 20:41

³⁶ Davidi kibeni tubaka mu Mpeve Yanlongo: Mfumu tubaka kwa Mfumu ya mono: Vanda na diboko ya kibakala ya mono ti mono imene kutula bambeni ya nge nansi ya makulu ya nge. Nk. 110:1; Bis. 2:24; 1 Kol. 15:25; Eb. 1:13; 10:13

³⁷ Davidi kibeni bingaka yandi Mfumu, bu na mpila nki yandi ikele Mwana ya yandi ? Ye kibuka ya nene kuwaka yandi na kiese.

Yesu longa bantu sambu na bafalisi

³⁸ Yandi tubaka kwa bau mu malongi ya yandi: Beno tomatala sambu na bansoniki, bau zola kutambula mu kazaku ya nda ye kupeswa mbote mu sika ya mazandu, Mat. 23:1; Luk. 20:45

³⁹ Ye sika ya ntete mu banzo ya sambilu ye bakiti ya ntete mu fete,

⁴⁰ bau ikele kudia bima yonso ya bafwola ye bau lomba Nzambi ntama mingi kusweka mbi ya bau, bau tabaka ndola ya luta ngolo.

Mbongo centime ya fwola

⁴¹ Yesu vandaka nantwala ya lundulu ya mbongo, yandi talaka bonso bantu losaka mbongo mu lundulu. Bamvwama mingi tulaka mingi. Luk. 21:1

⁴² Kuna vandaka fwola ya nsukami, yandi tulaka mbongo centime zole ya lunga mbongo dikuta mosi.

⁴³ Yandi bingaka kwa yandi banlonguki ya yandi ye tubaka kwa bau: Kieleka mono tuba kwa beno: Fwola yai ya nsukami imene kutula ya luta bau yonso ya imene kutula mbongo mu lundulu. 2 Kol. 8:12

⁴⁴ Kadi bantu yonso tulaka ya basika tuka kimvwama ya bau, kansi yandi yai tulaka yonso ya yandi mu nsukami ya yandi ye yonso ya moyo ya yandi.