Malako 11 - Le Nouveau Testament en Kikwango 1950

Yesu kota mu Yelusalemi va mpunda

¹ Bu bau kwizaka mfinama ku Yelusalemi ku Betefange ye Betania na mongo ya Olive, yandi fidisaka banlonguki ya yandi zole, Mat. 21:1; Luk. 19:29; Yoa. 12:12

² yandi tubaka kwa bau: Kwenda kota mu bwala ya ikele nantwala ya beno, bu beno imene kukota, nswalu beno tamona mwana mpunda ya kangwa, ya muntu imene kuvanda va yandi ve. Kangula yandi ye twala yandi.

³ Kana muntu tuba kwa beno: Sambu na nki beno sala mpilayai ? Buna beno tuba: Mfumu ikele na yandi kisalu, ye nswalu yandi tafidisa yandi awa.

⁴ Bau kwendaka ye monaka mwana mpunda ya kangwa nanganda ya mwelo mu nzila. Bau kangulaka yandi.

⁵ Bankaka ya telemaka kuna tubaka kwa bau: Beno ikele kusala nki na beno kangula mwana mpunda ?

⁶ Bau tubaka kwa bau bonso Yesu tubaka, buna bau bikaka bau kwenda.

⁷ Bau twalaka mwana mpunda kwa Yesu ye tulaka yandi mvwatu ya bau ye Yesu vandaka va yandi.

⁸ Bantu mingi tulaka mvwatu ya bau mu nzila, kansi bankaka tulaka mavala ya bau zengaka na nseke.

⁹ Bau ya kwendaka nantwala ye bau ya landaka, bokaka: Osana! Yandi ya kwiza mu nkumbu ya Mfumu ikele nkwa lusakumunu. Nk. 118:25

¹⁰ Lusakumunu kwa kimfumu ya ikele kwiza ya tata ya beto Davidi, Osana mu zulu!

¹¹ Yesu kotaka mu Yelusalemi ye mu tempelo, bu yandi talaka ndambu yonso na bima yonso, ye bu nkokila kubwaka, yandi basikaka ye kwendaka ku Betania sikamosi na bau kumi ye zole.

Yesu tula ndola va nti Yaligi

¹² Kilumbu ya landa, bu bau basikaka na Betania, yandi vandaka na nzala. Mat. 21:18

¹³ Yandi monaka nti ya figi ntama, ya vandaka na matiti, yandi kwendaka, kana yandi lenda kumona kima va yo, bu yandi kumaka, yandi monaka kima ve kaka matiti, kadi nsungi ya mabundu ya figi lungaka ve.

¹⁴ Yandi vutulaka ye tubaka kwa yo: Mvu ya mvu muntu mosi takudia mabundu ya nge ve, Banlonguki ya yandi kuwaka yo.

Yesu sukula tempelo

¹⁵ Bau kumaka ku Yelusalemi, bu Yesu kotaka mu tempelo, yandi yantikaka kubasisa bateki ye basumbi mu tempelo; yandi pindulaka bameza ya basompisi ya mbongo ye bakiti ya bateki ya mayembe; Mat. 21:12; Luk. 19:45; Yoa. 2:14

¹⁶ yandi bikaka ve muntu kunata wumbwa mu tempelo.

¹⁷ Yandi longaka ye tubaka kwa bau: Yo ikele kusonama ve: Nzo ya mono fwiti kubingwa nzo ya sambilu kwa makanda yonso ya bantu. Kansi beno imene kukitula yo sika ya bantani. Yel. 7:11

¹⁸ Bambuta banganga ye bansoniki kuwaka yo, ye bau sosaka mpila nki bau lenda kufwa yandi, kadi bau titaka yandi, kadi kibuka yitukaka sambu na malongi ya yandi.

¹⁹ Bu nkokila kubwaka yandi basikaka nanganda ya mbanza.

²⁰ Na suka bu bau lutaka, bau monaka nti ya figi imene kuyuma ti mianzi ya yo. Mat. 21:20

²¹ Petelo bambukaka yo, ye tuba ka kwa yandi: Nlongi, tala nti ya figi ya nge tulaka ndola imene kuyuma.

²² Yesu vutulaka ye tubaka kwa bau: Vanda na lukwikilu mu Nzambi.

²³ Kieleka mono tuba kwa beno: Konsonani ya tatuba kwa mongo yai, nanguka, dilosa mu mbu, ye tavanda na ntembe ve mu ntima ya yandi, kansi takwikila mambu ya yandi tubaka takwiza, yandi tabaka yo. Luk. 17:6

²⁴ Sambu na yai, mono tuba kwa beno: Mambu yonso konsonani ya beno talomba ye yuvula, kwikila na beno imene kubaka yau, ye beno tabaka yau. Luk. 11:9; Yoa. 15:7; 1 Yoa. 3:22; Yak. 1:5

²⁵ Bu beno ikele kutelema ye kulomba, vidisa mbi ya muntu yankaka sala kwa nge, na Tata ya beno mu zulu tavidisa mbi ya beno. Mat. 5:14; Ef. 4:32; 1 Kol. 3:13

²⁶ Kana beno vidisa masumu ya bantu yankaka ve, Tata ya beno mu zulu mpe tavidisa masumu ya beno ve.

Yesu kotaka mu nzo ya sambilu diaka, bafalisi pukumuna yandi

²⁷ Bau kumaka diaka ku Yelusalemi, bu yandi tambulaka mu tempelo, bambuta banganga ye bansoniki ye bambuta ya bantu kwizaka kwa yandi. Mat. 21:23; Luk. 20:1

²⁸ Bau tubaka kwa yandi: Mu ngolo nki nge ikele kusala mambu yai ? Ye nani pesaka nge ngolo yai, kusala mambu yai ? Bis. 4:7; 7:27

²⁹ Yesu tubaka kwa bau: Mono mpe tayuvula beno mambu mosi; beno vutula kwa mono, ye mono tatuba kwa beno mu ngolo nki mono salaka mambu yai.

³⁰ Mbotika ya Yoane katukaka na zulu keti na bantu ? Vutula kwa mono.

³¹ Bau yuvulana kutuba: Kana beto tuba, tuka zulu, yandi tatuba: Buna sambu na nki beno kwikila yandi ve.

³² Kansi kana beto tuba: Na bantu, bau titaka bantu, sambu na bantu yonso kwikilaka, kieleka Yoane ikele mbikudi. Mal. 6:20

³³ Bau vutulaka kwa Yesu ye tubaka: Beto zaba ve, Yesu tubaka kwa bau: Mono mpe tatuba kwa beno ve, mu ngolo nki mono sala mambu yai.