Luka 7 - Le Nouveau Testament en Kikwango 1950

Yesu belula mpika ya nkuluntu ya basoldat

¹ Bu yandi manisa kutuba mambu ya yandi yonso mu makutu ya bantu, yandi kotaka mu Kapenaumi. Mat. 8:5

² Mpika ya nkuluntu ya basoldat, ya yandi zolaka mingi, vandaka na maladi mfinama ku lufwa.

³ Bu yandi kuwaka nsangu ya Yesu, yandi fidisaka kwa yandi bambuta ya baYuda, ye yuvulaka yandi kwiza kubelula mpika ya yandi.

⁴ Bu bau kumaka kwa Yesu, bau bombidilaka yandi mingi kutuba; Yandi lunga na nge kusadila yandi mambu yai,

⁵ kadi yandi zola kikanda ya beto, yandi kibeni tungisilaka beto nzo ya sambilu.

⁶ Buna Yesu kwendaka na bau. Kansi bu yandi imene kukuma mfinama ku nzo, nkuluntu ya basoldat fidisaka banduku ya yandi, bau tubaka: Mfumu, disadila mpasi ve, kadi mono lunga ve na nge kota nansi ya nludi ya mono.

⁷ Mpilayai mono mpe banza mono lunga ve kwiza kwa nge, kansi tuba kaka ndinga, ye mpika ya mono tabeluka.

⁸ Kadi mono mpe ikele muntu ya tulwa nansi ya luyalu, mono ikele na basoldat ya mono ikele kuyala; mono tuba kwa mosi: Kwenda, yandi kwenda; ye kwa yankaka: Kwiza, yandi kwiza; ye kwa mpika ya mono: Sala yai, yandi sala yo.

⁹ Bu Yesu kuwaka mambu yai, yandi yitukaka sambu na yandi; yandi pindukaka, kutuba kwa bantu ya landaka yandi: Mono tuba kwa beno: Mono imene kumona ve lukwikilu ya mpilayai yanene mu Isaeli.

¹⁰ Bu bau ya fidiswa vutukaka ku nzo; bau monaka mpika imene kubeluka.

Yesu fulukisa toko mu Naini

¹¹ Yo vandaka kilumbu ya landa yandi kwendaka ku mbanza ya bingwa: Naini, banlonguki ya yandi ye kibuka yanene kwendaka sikamosi na yandi.

¹² Kansi bu yandi kwizaka mfinama ku mwelo ya mbanza, tala, bau nataka muntu ya kufwa, ikele mwana mosi kaka ya ngudi ya yandi, yandi vandaka fwola; kibuka yanene ya bantu ya bwala vandaka na yandi.

¹³ Bu Mfumu monaka yandi, yandi kuwilaka yandi nkenda, ye tubaka kwa yandi: Kudila ve.

¹⁴ Yandi kwizaka mfinama ye valakanaka kinatinu; bau ya nataka yo telemaka, yandi tubaka: Toko, mono tuba kwa nge: Telema. Bis. 9:40

¹⁵ Yandi ya kufwaka telemaka ye vandaka, ye yantikaka kutuba, yandi pesaka yandi kwa ngudi ya yandi.

¹⁶ Boma kubwilaka bau yonso, ye bau kembilaka Nzambi, kutuba: Mbikudi yanene imene kutelema nankati ya beto, ye Nzambi imene kwiza kutala bantu ya yandi. Mal. 7:37; Luk. 1:68; Yoa. 4:19; 6:14; 9:17

¹⁷ Ye nsangu yai sambu na yandi mwanganaka mu nsi yonso ya Yuda ye ntoto yonso ya zunga.

Yoane mbotiki fidisa banlonguki kwa Yesu

¹⁸ Banlonguki ya Yoane songaka yandi mambu yai yonso. Mat. 11:8

¹⁹ Ye Yoane bingaka banlonguki ya yandi zole, ye fidisaka bau kwa Mfumu, kutuba: Nge ikele yandi ya kwiza, keti beto vingila yankaka ?

²⁰ Kansi bu babakala yina kumaka kwa yandi, bau tubaka: Yoane Mbotiki fidisaka beto kwa nge, kutuba: Nge ikele yandi ya kwiza, keti beto tavingila yankaka ?

²¹ Na lokula yina yandi belulaka bantu mingi, na kimbevo ye maladi ye bampeve ya mbi, ye bampofo yandi pesaka kumona.

²² Yandi vutulaka ye tubaka kwa bau: Kwenda kutuba kwa Yoane, mambu ya beno ikele kumona ye kuwa: Bampofo ikele kumona, ya tembila ikele kutambula, bankwa bwazi ikele kuvediswa, ye bantu ya makutu kufwa ikele kuwa; bafwa ikele kufulukiswa, bansukami ikele kusamunwa nsamu mbote. Yes. 35:5; 61:1

²³ Kiese ikele kwa konsonani ya kuta sakuba ve sambu na mono.

Yesu tuba kitemo sambu na Yoane

²⁴ Kansi bu bantumwa ya Yoane vutukaka, yandi yantikaka kutuba kwa bantu sambu na Yoane: Nki beno kwendaka kutala mu nsi ya mpamba ? Tutu ya ikele kunikiswa mu mupepe ? Mat. 11:7

²⁵ Kansi nki beno kwendaka kutala ? Muntu ya vwata mvwatu ya lebelebe ? Tala, bau ya vwata mvwatu ya nkembo ye ikele na bima mingi, ikele mu bakianzala ya bantinu.

²⁶ Kansi nki beno kwendaka kutala ? Mbikudi ? E, kansi mono tuba kwa beno ya luta mbikudi mpe.

²⁷ Yo imene kusonama sambu na yandi: Tala, mono ikele kufidisa ntumwa ya mono nantwala ya luse ya nge, yandi tayidika nzila ya nge nantwala ya nge.

²⁸ Mono tuba kwa beno: Nakati ya bau ya butukwa na bankento, ya luta Yoane Mbotiki ikele ve; kansi yandi ya ikele fioti mu kimfumu ya Nzambi ikele kuluta yandi.

²⁹ Bantu yonso ya kuwaka yandi, ye bafutisi, nungisaka Nzambi, kadi bau botikwaka mu mbotika ya Yoane.

³⁰ Kansi bafalisi ye bazabi ya nsiku buyaka lukanu ya Nzambi, sambu na bau botikwaka na yandi ve.

³¹ Mu nki mono tafwanikisa bantu ya mbandu yai ? Ye bau ikele mpila nki ? Mat. 11:16

³² Bau ikele mpilamosi bana ya vanda na sika ya zandu, bau boka kwa bankaka ye tuba: Beto bulaka pitulu, kansi beno kinaka ve, beto yimbilaka beno nkunga ya ntantu, kansi beno dilaka ve.

³³ Kadi Yoane Mbotiki kwizaka kudia mampa ve, ye kunwa vinia ve, ye beno tuba: Yandi ikele na mpeve ya mbi.

³⁴ Mwana ya muntu kwizaka, kudia ye kunwa, ye beno tuba: Tala, muntu yai ikele nkwa mbiki ye munwi ya vinia, nduku ya bafutisi ye bankwa masumu.

³⁵ Kansi ngangu ikele kunungiswa kwa bana ya yandi yonso.

Yesu kudia mu nzo ya mufalisi

³⁶ Mufalisi mosi yuvulaka yandi sambu na kudia na yandi, buna yandi kotaka mu nzo ya mufalisi, ye vandaka na mesa.

³⁷ Tala, nkento vandaka mu mbanza yina, nkwa masumu, bu yandi zabaka, na Yesu imene kuvanda na mesa mu nzo ya mufalisi, yandi bakaka mulangi ya mafuta ya nsunga mbote,

³⁸ yandi telemaka nanima na makulu ya yandi ye dilaka, ye yantikaka kutula mansanga va makulu ya yandi, ye kunguna yau na nsuki ya yandi, ye fibaka makulu ya yandi, ye sitaka yau mafuta nsunga.

³⁹ Bu mufalisi ya bingaka yandi, monaka mambu yai, yandi tubaka mu ntima ya yandi: Muntu yai, kana yandi ikele mbikudi, tazaba nani ye nki mutindu nkento yai ikele, ya valakana yandi, na yandi ikele nkwa masumu. Luk. 15:2

⁴⁰ Yesu vutulaka kutuba kwa yandi: Simoni, mono ikele na mambu kutuba kwa nge. Yandi tubaka: Nlongi, tuba yo.

⁴¹ Muntu ya levisa vandaka na bantu zole, ya ikele na mfuka kwa yandi; mosi levaka mfuka ya mbongo denali nkama tanu, kansi yankaka ya mbongo denali makumi tanu.

⁴² Bu bau vandaka na kima ve ya futila, yandi vidisilaka bau zole. Buna nani ya bau luta kuzola yandi ?

⁴³ Simoni vutulaka, ye tubaka: Mono banza yandi ya luta kuvidiswa mfuka. Yandi tubaka kwa yandi: Nge zenga mbote.

⁴⁴ Bu yandi pindukaka kwa nkento, yandi tubaka kwa Simoni: Nge mona nkento yai ? Mono kotaka mu nzo ya nge, nge pesaka mono masa ve sambu na makulu ya mono, kansi yandi tulaka mansanga va makulu ya mono, ye kungunaka yau na nsuki ya yandi. 1 Mose 18:4

⁴⁵ Nge fibaka mono ve, kansi tuka na mono kotaka yandi bikaka ve kufiba makulu ya mono.

⁴⁶ Ntu ya mono, nge sitaka mafuta ve, kansi yandi sitaka makulu ya mono na mafuta nsunga.

⁴⁷ Mpilayai mono tuba kwa nge: Masumu ya yandi mingi, imene kuvidiswa kadi yandi zolaka mingi. Kansi konsonani ya vidiswa masumu fioti, ikele kuzola fioti.

⁴⁸ Yandi tubaka kwa yandi: Masumu ya nge imene kuvidiswa.

⁴⁹ Ye bau ya vandaka na yandi na mesa, yantikaka kutubana: Yai ikele nani ya vidisa masumu mpe ? Mat. 9:2; Mal. 2:7

⁵⁰ Kansi yandi tubaka kwa nkento: Lukwikilu ya nge imene kuvulusa nge; kwenda na yenge. Luk. 8:48; 18:42