Luka 3 - Le Nouveau Testament en Kikwango 1950

Yoane mbotiki kwenda kulonga

¹ Mu mvu kumi ye tanu ya luyalu ya Kaisali Tibelio, bu Pontio Pilatu yalaka mu Yuda, Elode yalaka mu Ngalili, mpangi ya yandi Filipo yalaka mu Itulaya ye nsi ya Takonite, ye Lisania yalaka mu Abilene, Mat. 3:1; Mal. 1:1

² Bu Anasi ye Kayafa vandaka banganga yanene, mambu ya Nzambi kwizaka kwa Yoane, mwana ya Zakalia, mu nsi ya mpamba. Yoa. 11:49

³ Yandi kwizaka ku ntoto yamvimba ya zunga Yodani, ye samunaka mbotika ya mpindulu ya mabanza ku mvidisilu ya masumu,

⁴ bonso yo imene kusonama mu nkanda ya mambu ya Yesaya, mbikudi: Ndinga mosi ikele kuboka mu nsi ya mpamba: Beno yidika nzila ya Mfumu, ye sungika tunzila ya yandi. Yes. 40:3

⁵ Bandimba yonso tafuluswa ye bamongo yanene yonso ye bamongo fioti takulumuswa, ye yonso ya ikele nioka tasungama, ye nzila yambi tasalwa mbote;

⁶ nsuni yonso tamona mpulusu ya Nzambi. Yes. 52:10; Luk. 2:30

⁷ Mpilayai yandi tubaka kwa bibuka ya basikaka sambu na kubotikwa na yandi: Beno bana ya banioka ya makasi, nani longaka beno kutina makasi ya kwiza ?

⁸ Beno buta mabundu ya lunga na mpindulu ya mabanza, ye beno yantika ve kutuba mu mintima ya beno: Beto ikele na Abalahami, tata ya beto. Kadi mono tuba kwa beno: Nzambi lenda na matadi yai kufulukisa bana kwa Abalahami. Yoa. 8:39; Bis. 2:37

⁹ Ye ntangu yai soka ikele kulala na mianzi ya banti, mpilayai konso nti ya konda kubuta mabundu ya mbote tazengwa ye loswa mu tiya.

¹⁰ Bibuka yuvulaka yandi kutuba: Buna nki beto fwiti kusala ?

¹¹ Yandi vutulaka ye tubaka kwa bau: Konsonani ya ikele na binkutu zole, bika yandi pesa kwa yandi ya konda kinkutu, ye konsonani ya ikele na madia, sala mpilayai mpe. Yoa. 2:17; Yak. 2:15

¹² Buna bafutisi kwizaka mpe kubotikwa, bau tubaka kwa yandi: Nlongi, nki beto fwiti kusala ?

¹³ Yandi tubaka kwa bau: Beno lomba ntalu yanene ve, kansi kaka yina ya beno zengwa;

¹⁴ Basoldat mpe yuvulaka yandi kutuba: Beto mpe fwiti kusala nki ? Yandi tubaka kwa bau: Beno baka kima ya muntu na ngolo ve, beno funda muntu ve mu mambu ya luvunu, bika kifutu ya beno lunga.

¹⁵ Ye bu bantu vingilaka, bau yonso banzaka mu mintima ya bau sambu na Yoane, kana yandi ikele Klisto; Mat. 3:11; Mal. 1:17

¹⁶ Yoane vutulaka kutuba kwa bau yonso: Mono ikele kubotika beno mu masa, kansi ya luta mono ngolo ikele kwiza, nsinga ya nsampatu ya yandi, mono lunga ve kukangula yo, yandi tabotika beno mu Mpeve Yanlongo ye mu tiya; Yoa. 1:26; Bis. 2:4; 11:15; 13:25; 19:4

¹⁷ vevomono ikele mu diboko ya yandi, ye yandi tasukula mbote sika ya yandi ya vevila, ye takutikisa nkeni ya ble mu lundulu ya yandi, kansi yandi tayoka mavevolo mu tiya ya konda kuzima.

Yoane tulwa mu boloko

¹⁸ Mu mbombodolo mingi yankaka, yandi samunaka nsamu mbote kwa bantu.

¹⁹ Kansi Yoane sembaka Elode, nyadi, sambu na Elodia, nkento ya mpangi ya yandi Filipo, ye sambu na mambu yanso yankaka yambi ya Elode salaka, Mat. 14:3; Mal. 6:17

²⁰ buna yandi yikaka mambu yankaka mpe va yai. Yandi tudisaka Yoane mu boloko.

Yesu botikwa

²¹ Yo vandaka bu bantu yonso botikwaka, Yesu mpe botikwaka ye kulomba, zulu kangukaka, Mat. 3:13; Mal. 1:19

²² Mpeve Yanlongo kulumukaka mu kifwani ya yembe va yandi, ye ndinga basikaka na zulu: Nge ikele mwana ya mono yazolwa, nge ikele kuyangidika mono. Yes. 42:1; Yoa. 1:32

Mbutukulu ya Yesu

²³ Yesu kibeni vandaka mvu makumi tatu; bu yandi yantikaka kulonga, bau banzaka yandi ikele mwana ya Yosefi, mwana ya Eli,

²⁴ mwana ya Matati, mwana ya Levi, mwana ya Maleki, mwana ya Yanai, mwana ya Yosefi,

²⁵ mwana ya Matatia, mwana ya Amosi, mwana ya Nahumi, mwana ya Esli, mwana ya Nangai,

²⁶ mwana ya Mahati, mwana ya Matatia, mwana ya Semei, mwana ya Yoseki, mwana ya Yoda,

²⁷ mwana ya Yoanani, mwana ya Lesa, mwana ya Zelubabeli, mwana ya Salatieli, mwana ya Neli,

²⁸ mwana ya Maleki, mwana ya Adi, mwana ya Kosami, mwana ya Elemedami, mwana ya Eli,

²⁹ mwana ya Yesu, mwana ya Elieseli, mwana ya Yolimi, mwana ya Matati, mwana ya Levi,

³⁰ mwana ya Simeoni, mwana ya Yuda, mwana ya Yosefi, mwana ya Yonami, mwana ya Eliakimi,

³¹ mwana ya Melea, mwana ya Mena, mwana ya Matata, mwana ya Natani, mwana ya Davidi,

³² mwana ya Isai, mwana ya Obedi, mwana ya Boasi, mwana ya Salamone, mwana ya Nasoni,

³³ mwana ya Aminadabi, mwana ya Adamini, mwana ya Alani, mwana ya Heseloni, mwana ya Pelesi, mwana ya Yuda,

³⁴ mwana ya Yakobi, mwana ya Isaki, mwana ya Abalahami, mwana ya Tela, mwana ya Naholi,

³⁵ mwana ya Saluki, mwana ya Lengu, mwana ya Faleki, mwana ya Ebeli, mwana ya Sela,

³⁶ mwana ya Kanani, mwana ya Alafakasadi, mwana ya Semi, mwana ya Noa, mwana ya Lemeki,

³⁷ mwana ya Metusala, mwana ya Hanoki, mwana ya Yaledi, mwana ya Malaleli, mwana ya Kanani,

³⁸ mwana ya Enosi, mwana ya Seti, mwana ya Adami, mwana ya Nzambi.