Luka 23 - Le Nouveau Testament en Kikwango 1950

Yesu natwa kwa Pilatu

¹ Buna kibuka yamvimba telemaka ye nataka yandi kwa Pilatu. Mat. 27:1, 11; Mal. 15:1; Yoa. 18:28

² Bau yantikaka kufunda yandi, kutuba: Beto monaka muntu yai kuvengumuna kikanda ya beto ye kubuya kupesa mpaku kwa Kaisali kutuba, yandi kibeni ikele Klisto ntinu. Bis. 17:7

³ Pilatu yuvulaka yandi, ye tubaka: Nge ikele Ntinu ya baYuda ? Yandi vutulaka kwa yandi, kutuba: Nge kibeni tuba yo.

⁴ Buna Pilatu tubaka kwa bambuta banganga ye kwa bibuka: Mono mona mbi ve mu muntu yai.

⁵ Kansi bau lutaka kutuba mu ngolo: Yandi ikele kuvengumuna bantu ye kulonga mu Yuda yonso, tuka mu Ngalili ti na sika yai.

Yesu nantwala ya Elode

⁶ Bu Pilatu kuwaka yo, yandi yuvulaka: kana muntu yai ikele mwisi Ngalili ?

⁷ Bu yandi zabaka, yandi katuka mu nsi ya luyalu ya Elode, buna yandi fidisaka yandi kwa Elode, yandi kibeni vandaka mu Yelusalemi mu bilumbu yai.

⁸ Bu Elode monaka Yesu, yandi vandaka na kiese mingi, kadi yandi vandaka na lutondo ntangu mingi kumona yandi, kadi yandi kuwaka mambu mingi sambu na yandi; yandi tulaka vuvu kumona kidimbu ya salwa kwa yandi. Mat. 14:1; Luk. 9:7

⁹ Yandi yuvulaka yandi mambu mingi, kansi Yesu vutulaka ndinga ve kwa yandi.

¹⁰ Bambuta banganga ye bansoniki telemaka, bau funda yandi ngolo.

¹¹ Elode ye basoldat ya yandi saulaka yandi ye sekaka yandi, ye vwatisaka yandi mvwatu ya kenzima, ye vutulaka yandi kwa Pilatu.

¹² Elode ye Pilatu bakaka kinduku kilumbu yina, kadi ntete bau vandana kimbeni.

Yesu fundiswa kwa Pilatu

¹³ Pilatu bingaka bambuta banganga ye bankuluntu ye bantu, Mat. 27:15; Mal. 15:6; Yoa. 18:39; 19:1

¹⁴ yandi tubaka kwa bau; Beno twalaka muntu yai kwa mono, bonso muntu ya vengumuna bantu. Ye tala, na luse ya beno mono sosaka mambu ya yandi, mono monaka mbi ve mu muntu yai na mambu ya beno fundaka yandi.

¹⁵ Elode mpe ve, kadi yandi vutulaka yandi kwa beto, ye tala, yandi imene kusala kima ve ya lunga na kufwa.

¹⁶ Mpilayai mono tapesa yandi ndongi ye kangula yandi.

¹⁷ Yo vandaka kifu ya bau kubikila bau muntu mosi ya boloko, na fete ya Pake.

¹⁸ Kibuka yamvimba bokaka mbala mosi, kutuba: Katula muntu yai, kangudila beto Balaba.

¹⁹ Yandi loswaka mu boloko sambu na tomboka ya kubwa mu mbanza, ye sambu na yandi kufwaka bantu.

²⁰ Pilatu tubaka kwa bau diaka, kuzola kukangula Yesu.

²¹ Kansi bau bokaka kutuba: Koma yandi va kulunsi, koma yandi va kulunsi.

²² Yandi tubaka kwa bau mbala ya tatu: Kansi nki mambu mbi ya yandi salaka ?

²³ Kansi bau luta kutuba mu ndinga ngolo, bau lomba na yandi komwa va kulunsi, ndinga ya bau lutaka ngolo.

²⁴ Pilatu zengaka na yo salwa bonso bau lombaka;

²⁵ kansi yandi kangulaka yandi ya loswa mu boloko sambu na tomboka ya kubwa mu mbanza, ye sambu na kufwa bantu, yandi ya bau lombaka, kansi yandi yekulaka Yesu ku luzolo ya bau.

Yesu natwa ku Ngolongota

²⁶ Bu bau kwendaka na yandi, bau simbaka Simoni, muntu ya Kilene, yandi katuka na nseke, bau pesaka yandi kulunsi, kunata yo nanima na Yesu. Mat. 27:31; Mal. 15:20; Yoa. 19:16

²⁷ Kibuka nene ya bantu landaka yandi ye bankento vandaka kuboka ye kudila.

²⁸ Yesu pindukaka kwa bau, kutuba: Bana bankento ya Yelusalemi, beno dila mono ve, kansi dila sambu na beno ye bana ya beno;

²⁹ kadi tala, bilumbu ikele kwiza ya bau tatuba: Kiese ikele na basita ye mavumu ya konda kubuta, ye mabele ya konda kuyamwa.

³⁰ Buna bau tayantika kutuba ku bamongo nene: Kubwila beto, ye ku bamongo fioti: Fuka beto.

³¹ Kadi kana bau sala mpilayai mu nti mubisu, buna mpila nki tasalwa mu nti ya kuyuma. Yel. 25:29; 1 Pet. 4:18

³² Bantu zole yankaka vandaka, bankwa mbi, bau natwaka sikamosi na yandi sambu na kufwa bau mpe.

³³ Bu bau kumaka ku sika ya bingwa: Mukuwa ya ntu, bau komaka yandi va kulunsi ye bankwa mbi, mosi na diboko kibakala, mosi na diboko kinkento. Yes. 53:12; Mat. 27:35; Mal. 15:24; Yoa. 19:18

³⁴ Buna Yesu tubaka: Tata, vidisila bau, kadi bau zaba ve ya bau ikele kusala. Bau kabana mvwatu ya yandi, bau budilaka yo njeke. Nk. 22:18; Bis. 3:17; 7:60

Bau seka Yesu

³⁵ Ye bantu telemaka kutala, kansi bankuluntu fingaka yandi, kutuba: Yandi vulusaka bankaka, bika yandi divulusa, kana yandi ikele Klisto, ya solwa ya Nzambi. Mat. 27:39; Mal. 15:29; Yoa. 19:19

³⁶ Basoldat mpe sekaka yandi ye kwizaka kwa yandi, kupesa yandi vinia ya ndudi, kutuba:

³⁷ Kana nge ikele Ntinu ya baYuda, divulusa.

³⁸ Nsonokono vandaka va zulu ya yandi: YAI IKELE NTINU YA BAYUDA.

³⁹ Mosi mu bau zole ya bau tulaka va kulunsi fingaka Yesu, kutuba: Kana nge ikele Klisto, divulusa ye beto mpe!

⁴⁰ Kansi yankaka vutulaka, kusemba yandi ye kutuba: Nge ikele kuvumina Nzambi ve ta fioti ? Sambu na nge ikele na mbedoso mpilamosi yandi ?

⁴¹ Bau imene kuzenga mambu ya beto mbote, kadi beto baka nsendo ya lunga mu mambu ya beto salaka, kansi yai salaka mambu mbi ve.

⁴² Yandi tubaka: Yesu, bambuka mono bu nge kuma mu kimfumu ya nge.

⁴³ Yandi tubaka kwa yandi: Kieleka, mono tuba kwa nge; bubu yai, nge tavanda na mono mu paladiso.

Lufwa ya Yesu Klisto

⁴⁴ Yo vandaka mu lokula kumi ye zole, tombe vandaka mu ntoto yonso ti na lokula tatu, Mat. 27:45; Mal. 15:33; Yoa. 19:28

⁴⁵ ntangu yo konda kutentina, ye lele ya vandaka mu tempelo, yo pasukaka nankati. 1 Mose 26:31

⁴⁶ Yesu bokaka mu ndinga nene kutuba: Tata, mu maboko ya nge mono ikele kutula mpeve ya mono. Bu yandi tubaka yai, yandi pesaka mpeve ya yandi. Nk. 31:5; Bis. 7:59

⁴⁷ Bu nkuluntu ya basoldat monaka mambu ya salwaka yandi kembilaka Nzambi, kutuba: Kieleka yai ikele nkwa lunungu.

⁴⁸ Bibuka yonso kutakanaka kutala mambu yai, bu bau monaka mambu ya salwaka, bau dibulaka va ntulu, ye vutukaka.

⁴⁹ Bau yonso ya zabakana na yandi ye bankento ya landaka yandi tuka Ngalili, bau telemaka ntama, kutala mambu yai.

Bauzika Yesu

⁵⁰ Tala, bakala, nkumbu ya yandi Yosefi, ikele mfundisi, ikele muntu ya mbote ye ya lunungu. Mat. 27:57; Mal. 15:42; Yoa. 19:38

⁵¹ Yandi ndimaka ve mu makani ya bau ye kisalu ya bau yandi ikele mwisi ya Alimataya, mbanza ya baYuda, yandi vingilaka kimfumu ya Nzambi.

⁵² Yandi kwendaka kwa Pilatu, ye lombaka nitu ya Yesu.

⁵³ Yandi kulumuna yo, ye zingilaka yo lele ya lino, ye tulaka yandi mu ndiamu ya bau salaka mu ditadi ya bau imene kutula muntu ntete ve.

⁵⁴ Ikele kilumbu ya yidika, kilumbu ya luvundu finamaka.

⁵⁵ Bankento ya kwizaka na yandi tuka Ngalili bau landaka, ye tala ndiamu ye mpila nki bau tulaka nitu ya yandi.

⁵⁶ Bau vutukaka, ye yidikaka bima ya nsunga mbote ye mafuta. Mu kilumbu ya luvundu bau vundisaka mpilamosi ikele nsikudukusu. 2 Mose 20:10