Luka 22 - Le Nouveau Testament en Kikwango 1950

Yuda Iskalioti yekula Yesu

¹ Fete ya mampa ya konda kufuniswa ya bau ikele kubinga Pake vandaka mfinama. 2 Mose 12:15; Mat. 26:1; Mal. 14:1

² Bambuta banganga ye bansoniki sosaka, mpila nki bau lenda kufwa yandi kadi bau tita bantu.

³ Buna Satana kotaka mu Yuda, ya bingwa Iskalioti, mosi ya bau kumi ye zole. Mat. 26:14; Mal. 14:10; Yoa. 13:27

⁴ Yandi kwendaka kusolula na bambuta banganga ye bankuluntu ye baminkengi, mpila nki yandi lenda kuyekula yandi kwa bau.

⁵ Bau yangalala, bau tulaka ndinga na bau sikamosi, sambu na kupesa yandi mbongo.

⁶ Yandi ndimaka bau, ye sosaka ntangu ya lunga kuyekula yandi kwa bau, bu kibuka ikele ve.

Yesu ikele kudia Pake

⁷ Kilumbu ya mampa ya konda kufunuswa kwizaka, yina ya bau ikele kufwa dimeme ya Pake. Mat. 26:17; Mal. 14:12

⁸ Yesu fidisaka Petelo ye Yoane kutuba: Beno kwenda kuyidikila beto Pake beto lenda kudia yo.

⁹ Bau tubaka kwa yandi: Wapi ndambu nge zola, beto kwenda kuyidikila yo ?

¹⁰ Yandi tubaka kwa bau: Tala, bu beno kota mu mbanza, muntu takutana na beno ya ikele kunata dibungu ya masa; landa yandi, kota mu nzo ya yandi ikele kukota.

¹¹ Beno tuba kwa mfumu ya nzo: Nlongi ikele kutuba kwa nge: Wapi nzo ya banzenza ya mono fwiti kudia Pake na banlonguki ya mono ?

¹² Yandi tasonga beno sika nene ya zulu ya nzo ya imene kuyidikwa, kuna yidika yo.

¹³ Bau kwendaka ye monaka bonso yandi tubaka kwa bau, bau yidika Pake.

Kintwadi ya meza ya Mfumu

¹⁴ Bu lokula longaka, yandi vanda na meza na bamtumwa ya yandi. Mat. 26:30; Mal. 14:17

¹⁵ Yandi tubaka kwa bau: Mu lutondo mingi mono tonda kudia Pake yai na beno, ntete mono imene kumoniswa ve mpasi;

¹⁶ kadi mono tuba kwa beno; Mono takudia yo diaka ve, ti bu mambu lunga mu kimfumu ya Nzambi.

¹⁷ Yandi bakaka kopo. Bu yandi pesaka matondo, yandi tubaka: Beno baka yai, ye kabana yo;

¹⁸ kadi mono tuba kwa beno: Tuka ntangu yai mono takunwa diaka ve yina ya ikele kubasika mu mabundu ya nti ya vinia, ti na kimfumu ya Nzambi takwiza.

¹⁹ Yandi bakaka dimba. Bu yandi pesaka matondo, yandi bukunaka yo, ye pesaka kwa bau, kutuba: Yai ikele nitu ya mono ya imene kupeswa sambu na beno. Beno sala yai mu bambukilu ya mono. Mat. 26:26; Mal. 14:22, 27; 1 Kol. 11:23

²⁰ Mpilayai kopo mpe, bu bau 22:9-31 imene kudia, yandi tubaka: Kopo yai ikele ya luwawanu yampa mu menga ya mono, ya tiamuka sambu na beno.

²¹ Kansi tala, diboko ya yandi ya tayekula mono ikele na mono awa na meza. Nk. 41:9; Yoa. 12:21

²² Kansi kieleka Mwana ya muntu ikele kwenda bonso yo solwaka, kansi ndola kwa muntu yina ya yekula yandi.

²³ Bau yantikaka kuyuvulana: buna nani ya bau tasala mambu yai ?

Banlonguki tulana ntembe

²⁴ Bau vandaka na ntembe mpe nakati na bau, kana nani nakati na bau taluta nene. Mat. 20:24; Mal. 10:41

²⁵ Kansi yandi tubaka kwa bau: Bantinu ya bapaien ikele kuyala bau, bau ikele ngolo va bau ya ikele kubingwa basadi ya nkenda.

²⁶ Beno ikele ve mpilayai; kansi yandi ya ikele nene nakati na beno; bika yandi vanda bonso nleke, ye yandi ya ikele mfumu vanda bonso sielo. Luk. 9:48

²⁷ Kadi nani luta nene, yandi ya vanda na meza, keti yandi ya sadila ? Ikele yandi ve ya vanda na meza ? Kansi mono ikele nakati na beno bonso yandi ya sadila. Mat. 20:28; Yoa. 13:14; Fili. 2:7

²⁸ Kansi beno ikele bau ya vandaka na mono mu mpukumunu ya mono.

²⁹ Mono tapesa beno kimfumu bonso Tata pesaka mono, Luk. 12:32

³⁰ buna beno lenda kudia ye kunwa na meza ya mono mu kimfumu ya mono; ye beno tavanda va bakiti ya nkembo ye fundisa makanda ya Isaeli kumi ye zole. Nzai. 3:21

Yesu tuba sambu na kubuya ya Petelo

³¹ Yesu tubaka: Simoni, Simoni, tala Satana lombaka nge na yandi lenda kuveva nge bonso nkeni; Yobi 1:7; Mat. 26:34; Mal. 14:30; Yoa. 13:36; 1 Pet. 5:8

³² Kansi mono lombilaka nge, na lukwikilu ya nge kumana ve. Bu nge pindula, siamisa bampangi ya nge.

³³ Yandi tubaka kwa yandi: Mfumu, mono lunga kwenda na nge ku boloko ye ku lufwa.

³⁴ Yandi tubaka: Petelo, kansi mono tuba kwa nge: Kilumbu yai nsusu tadila ve, ti nge tabuya mono mbala tatu, na nge zaba mono ve.

Yesu songa banlonguki ya yandi mpasi ya ikele kwiza

³⁵ Yandi tubaka kwa bau: Bu mono fidisaka beno na konda ngoto ya mbongo, ye makuba, ye nsampatu, buna beno kondaka kima ? Bau tubaka: Kima ve.

³⁶ Yandi tubaka kwa bau: Kansi ntangu yai yandi ya ikele na ngoto ya mbongo, bika yandi baka yo, mpilayai makuba mpe, kansi yandi ya ikele na mbele ya mvita ve, bika yandi teka kinkutu ya yandi, ye sumba yo.

³⁷ Kadi mono tuba kwa beno, na masonukwa yai fwiti kumaniswa mu mono: Yandi tangwaka nakati na bankwa kimpumbulu. Kadi mambu ya sonamaka sambu na mono imene kumaniswa.

³⁸ Bau tubaka: Mfumu, tala, awa ikele mbele zole ya mvita. Yandi tubaka kwa bau: Yo lunga.

Yesu lomba mu Ngetesemane

³⁹ Yandi basikaka, ye kwendaka, bonso vandaka kifu ya yandi, ku mongo ya Olive, ye banlonguki landaka yandi mpe. Mat. 26:30, 36; Mal. 14:26, 32; Yoa. 18:1

⁴⁰ Bu yandi kumaka na sika yina, yandi tubaka kwa bau: Beno lomba, na beno kota ve mu mpukumuni.

⁴¹ Yandi kibeni katukaka na bau ndambu ya lenda kuma ditadi ya loswa, yandi fukamaka na makungunu, ye lombaka, kutuba:

⁴² Tata, kana nge zola, katudila mono kopo yai, kansi luzolo ya mono ve, bika luzolo ya nge salwa.

⁴³ Ye kuna monikaka kwa yandi wanjo ya Mfumu.

⁴⁴ Yandi vandaka na mpasi ya luta mingi mu ntima, yandi luta kulomba ngolo, kifuta ya yandi vandaka mpilamosi matela ya menga kubwa va ntoto. Yoa. 12:27; Eb. 5:7

⁴⁵ Bu yandi telemaka na lombilu ya yandi, yandi kwizaka kwa banlonguki, yandi kutaka bau kulala tulu sambu na ntantu,

⁴⁶ yandi tubaka kwa bau: Sambu na nki beno lala ? Telema ye lomba, na beno kota ve mu mpukumuni.

Bau simba Yesu

⁴⁷ Bu yandi vandaka kutuba, tala, kibuka kwizaka sikamosi, na yandi ya bingwa Yuda, mosi ya bau kumi ye zole, yandi kwendaka nantwala na bau, ye kwizaka mfinama kwa Yesu kufiba yandi. Mat. 26:47; Mal. 14:43; Yoa. 18:3

⁴⁸ Kansi Yesu tubaka kwa yandi: Yuda, nge yekula Mwana ya muntu na mfibulu ?

⁴⁹ Bu bau ya zunga yandi monaka mambu ya ikele kubwa, bau tubaka: Mfumu, beto bula bau mbele ?

⁵⁰ Mosi ya bau bulaka sielo ya nganga nene, yandi zengaka dikutu kibakala ya yandi.

⁵¹ Kansi Yesu vutulaka ye tubaka: Bika bau. Yandi valakana dikutu ya yandi ye belulaka yandi.

⁵² Yesu tubaka kwa bambuta banganga ye bankuluntu ya minkengi ya tempelo, ye bambuta ya bantu kwiza ya kwa yandi: Beno ikele ya kubasika bambele ye bankawa bonso kusimba ntani.

⁵³ Kilumbu na kilumbu mono vandaka na beno mu tempelo, beno lambulaka maboko va mono ve, kansi yai ikele lokula ya beno, ya ngolo ya tombe.

Bau nata yandi kwa nganga nene

⁵⁴ Bau simbaka yandi, ye nataka yandi ye kotisaka yandi mu nzo ya nganga nene, kansi Petelo landaka ntama nanima. Mat. 26:57, 69; Mal. 14:53, 66; Yoa. 18:12, 23

⁵⁵ Bu bau kwika tiya nakati ya kianzala, ye bau imene kuvanda sikamosi, buna Petelo vandaka nakati na bau.

⁵⁶ Kansi sielo nkento monaka yandi, bu yandi vandaka na mwini ya tiya, yandi talaka yandi ti, ye tubaka: Muntu yai mpe vandaka na yandi.

⁵⁷ Kansi yandi buyaka, kutuba: Nkento, mono zaba yandi ve.

⁵⁸ Na ntangu fioti yankaka monaka yandi, ye tubaka: Nge mpe ikele mosi ya bau. Kansi Petelo tubaka: Muntu, mono ikele ve ya bau.

⁵⁹ Nanima na lokula mosi diaka, yankaka kutuba mutindu mosi: Kieleka, muntu yai vandaka na yandi mpe, kadi yandi ikele mwisi Ngalili.

⁶⁰ Petelo tubaka: Muntu, mono zaba ve ya nge ikele kutuba: Nswalu, bu yandi tubaka, nsusu dilaka.

⁶¹ Mfumu pindukaka, ye talaka Petelo. Ye Petelo bambukaka mambu ya Mfumu mpila nki yandi tubaka kwa yandi: Kilumbu yai ntete nsusu imene kudila ve, nge tabuya mono mbala tatu.

⁶² Yandi basikaka nanganda, ye dilaka ngolo.

⁶³ Babakala ya simbaka Yesu bau sekaka yandi, ye bulaka yandi; Yes. 50:6; Mat. 26:67; Mal. 14:65

⁶⁴ ye bau fukilaka yandi lele va meso, ye yuvulaka yandi, kutuba: Bikula! Nani yai ya imene kubula nge ?

⁶⁵ Bau tubaka mambu mingi yankaka sambu na yandi ye tubaka mbi sambu na yandi.

Yesu fundiswa

⁶⁶ Bu kuma kia, bambuta ya bantu ye bambuta banganga ye bansoniki kutakana sikamosi, ye bau twalaka yandi kwa bafundisi ya bau, kutuba: Kana nge ikele Klisto, tuba kwa beto ? Mat. 26:59; Mal. 14:55

⁶⁷ Kansi yandi tubaka kwa bau: Kana mono tuba kwa beno, beno takwikila ve;

⁶⁸ kansi kana mono yuvula beno ndinga, beno tavutula yo ve.

⁶⁹ Tuka ntangu yai Mwana ya muntu tavanda na diboko kibakala ya ngolo ya Nzambi. Nk. 110:1

⁷⁰ Bau yonso tubaka: Buna nge ikele Mwana ya Nzambi ? Yandi tubaka kwa bau: Beno tuba, mono ikele yandi.

⁷¹ Bau tubaka: Nki kitemo yankaka ya beto ikele kusosa ? Kadi beto kibeni imene kuwa yo na munoko ya yandi.