Luka 2 - Le Nouveau Testament en Kikwango 1950

Lubutuku ya Yesu

¹ Yo vandaka mu bilumbu yina. Kaisali Augustu, fidisaka nsiku na bantu yonso sonama.

² Sonama yai ikele yantete, bu Kilenio vandaka nyadi ya Silia.

³ Bau yonso kwendaka kudisonikisa muntu na muntu na mbanza ya yandi.

⁴ Yosefi katukaka na Ngalili na mbanza ya Nazaleti, yandi kwendaka mpe ku Yuda ku mbanza ya Davidi ya bingwa Betelemi, kadi yandi vandaka muntu ya nzo ye kikanda ya Davidi, 1 Sam. 16:4; Mika 5:2; Mat. 1:1; Yoa. 7:42

⁵ sambu na kusonikisa nkumbu ya yandi ye Malia, ya silwaka kwa yandi ya vandaka na divumu.

⁶ Yo vandaka bu bau vandaka kuna, bilumbu ya yandi ya buta lungaka.

⁷ Yandi butaka mwana bakala ya yandi yantete ye zingilaka yandi lele, ye tulaka yandi mu edilu ya bambizi, kadi sika vandaka ve sambu na bau mu nzo ya banzenza. Mat. 1:25

Bemvungi sambila Yesu

⁸ Mu ntoto yina vandaka bamvungi kuvanda na nseke, ye kukenga mameme ya bau mu mpimpa.

⁹ Tala, wanjo ya Mfumu telemaka mfinama kwa bau, ye nkembo ya Mfumu tentina ye zungudilaka bau, ye bau monaka boma mingi.

¹⁰ Wanjo tubaka kwa bau: Vanda na boma ve; kadi tala, mono samuna kwa beno nsamu ya mbote ya kiese mingi, yo tavanda kwa bantu yonso;

¹¹ kadi kilumbu yai beno butilwa Mvulusi mu mbanza ya Davidi, yandi ikele Klisto Mfumu.

¹² Kidimbu kwa beno ikele yai. Beno tamona mwana fioti zingilwa lele ye lala mu edilu ya bambizi.

¹³ Ye nswalu kuna vandaka sikamosi na wanjo kibuka yanene ya banjo ya zulu kusika Nzambi, kutuba:

¹⁴ Nkembo kwa Nzambi mu zulu ya zulu, ye yenge va ntoto nakati na bantu ya yangidisa yandi. Yes. 57:19; Ef. 2:17; Luk. 19:38

¹⁵ Yo vandaka bu banjo kwendaka kuvutuka ku zulu; bamvungi tubanaka: Bika beto kwenda ti na Betelemi, beto tala mambu yai ya kubwaka ya Mfumu imene kuzabisa beto.

¹⁶ Bau kwizaka nswalu ye monaka Malia ye Yosefi ye mwana fioti lala mu edilu ya bambizi.

¹⁷ Bu bau monaka yandi, bau songaka mambu yina ya tubwaka kwa bau, sambu na mwana yai.

¹⁸ Ye bau yonso ya kuwaka yo yitukaka sambu na mambu yina ya bamvungi tubaka kwa bau.

¹⁹ Kansi Malia lundaka mambu yai yonso ye yindulaka yau mu ntima ya yandi.

²⁰ Ye bamvungi vutukaka kukembila ye kusika Nzambi sambu na mambu yonso ya bau kuwaka ye monaka, bonso yo tubwaka kwa bau.

²¹ Bu bilumbu nana lungaka sambu na kuzenga yandi, nkumbu ya yandi bingwaka YESU, yina ya wanjo tubaka ntete ngudi ya yandi yimitaka yandi. Mat. 1:25

Yandi natwa mu tempelo

²² Bu bilumbu ya divedisa lungaka, mpilamosi ikele nsiku ya Mose, bau tombokaka na yandi ku Yelusalemi kupesa yandi kwa Mfumu,

²³ bonso yo imene kusonama mu nsiku ya Mfumu: Konso mwana bakala yantete ya butuka tabingwa ya nlongo kwa Mfumu, 2 Mose 13:13; 4 Mose 3:13

²⁴ ye kupesa nkailu ya yokwa mpilamosi yo tubwaka mu nsiku ya Mfumu: Mayembe ya mfinda zole keti bana zole ya mayembe. 3 Mose 12:6

Simeoni sakumuna Yesu

²⁵ Tala, mu Yelusalemi vandaka muntu, nkumbu ya yandi Simeoni, muntu ya lunungu ye ya vumina Nzambi, yandi vingilaka mbombolo ya Isaeli, ye Mpeve Yanlongo vandaka va yandi.

²⁶ Yandi zaikuewaka na Mpeve Yanlongo, na yandi tamona lufwa ve, ti yandi mona Klisto ya Mfumu.

²⁷ Yandi kwizaka mu Mpeve ku tempelo. Ye bu tata ye ngudi kotaka na Yesu Mwana sambu na kusadila yandi mpilamosi vandaka kifu ya nsiku,

²⁸ buna yandi bakaka yandi na maboko ya yandi, ye sakumunaka Nzambi ye tubaka:

²⁹ Mfumu, ntangu yai nge ikele kubika mpika ya nge kwenda na yenge, bonso mu mambu ya nge. 1 Mose 46:30

³⁰ Kadi meso ya mono imene kumona mpulusu ya nge, Luk. 1:68

³¹ ya nge imene kuyidika nantwala na luse ya bantu yonso. Nk. 98:2; Yes. 52:10; Luk. 3:6

³² Ikele mwini ya zaikuswa kwa bapaien, ye nkembo kwa bantu ya nge Isaeli. Yes. 49:6; Bis. 13:47

³³ Tata ya yandi ye ngudi ya yandi yitukaka sambu na mambu ya tubwaka sambu na yandi.

³⁴ Simeoni sakumunaka bau, ye tubaka kwa Malia, ngudi ya yandi: Tala mwana yai ikele kutulwa sambu na kubwa ye kutelemisa ya bantu mingi mu Isaeli ye kidimbu ya bau tatuba mbi sambu na yo. Yes. 28:16; Mat. 21:44; Bis. 28:22

³⁵ Ye mbele tatobola mwela ya nge, na mabanza ya mintima mingi tazaikuswa. Yoa. 19:25

Ana sakumunaka Yesu

³⁶ Kuna vandaka Ana, mbikudi ya nkento, mwana ya Fanueli mu kikanda ya Aseli. Yandi vandaka mvu mingi, yandi vandaka na bakala ya yandi mvu nsambwadi tuka kindumba ya yandi.

³⁷ Yandi ikele fwola, ya lunga mvu makumi nana ye iya, Yandi bikaka tempelo ve, kansi yandi sadilaka Nzambi mu kubuya ya madia ye lombilu mpimpa ye mwini.

³⁸ Na lokula yina yandi kwizaka ye pesaka Nzambi matondo, ye tubaka sambu na yandi kwa bau yonso ya vingila nkudulu ya Yelusalemi.

³⁹ Bu bau manisaka mambu yonso bonso ikele nsiku ya Mfumu, bau vutukaka ku Ngalili ku mbanza ya bau Nazaleti. Mat. 2:19

⁴⁰ Mwana kulaka, ye kwizaka ngolo, fuluka na ngangu, ye nlemvo ya Nzambi vandaka va yandi. Luk. 1:80

Yosefi ye Malia ye Yesu kwenda ku Pake mu Yelusalemi

⁴¹ Tata ye ngudi ya yandi kwendaka mvu na mvu ku Yelusalemi, ku fete ya Pake. 2 Mose 23:15, 17; 34:23

⁴² Bu yandi vandaka mvu kumi ye zole, bau tombokaka, bonso vandaka kifu ya fete.

⁴³ Bu bau lungisaka bilumbu, bu bau vutukaka mwana Yesu bikaka nanima mu Yelusalemi, ye tata ya yandi ye ngudi ya yandi zabaka yo ve.

⁴⁴ Bau banzaka, yandi ikele mu kibuka ya bau; bau kwendaka mu nzila kilumbu yamvimba, bau sosaka yandi nakati ya bibutu ya bau ye basabakani ya bau.

⁴⁵ Bu bau monaka yandi ve, bau vutukaka ku Yelusalemi kusosa yandi.

⁴⁶ Yo vandaka nanima na bilumbu tatu bu bau monaka yandi mu tempelo, yandi vandaka nakati ya banlongi kuwa ye kuyuvula bau.

⁴⁷ Bau yonso ya kuwaka yandi yitukaka sambu na ngangu ya yandi ye mvutulu ya yandi.

⁴⁸ Bu bau monaka yandi, bau yitukaka, ye ngudi ya yandi tubaka kwa yandi: Mwana, sambu na nki nge sadila beto mpilayai ? Tala, tata ya nge ye mono sosaka nge na ntantu.

⁴⁹ Yandi tubaka kwa bau: Mpila nki beno sosaka mono ? Beno zaba ve, mono fwiti kuvanda mu nzo ya Tata ya mono ?

⁵⁰ Bau zabaka ve mambu ya yandi tubaka kwa bau. Luk. 9:45; 18:34

⁵¹ Yandi kulumukaka na bau, ye kwizaka ku Nazaleti, yandi lemvukaka bau, kansi ngudi ya yandi lundaka mambu yai yonso mu ntima ya yandi.

⁵² Yesu kulaka mu ngangu ye ntela ye nlemvo kwa Nzambi ye bantu.